ଭୁବନେଶ୍ୱର,୨୬/୧୦: ୬ଷ୍ଠ ଓଡ଼ିଶା ରାଜ୍ୟ ପୁସ୍ତକ ମହୋତ୍ସବ-‘ଅକ୍ଷର’ । ଆସନ୍ତା ଡିସେମ୍ବର ୬ରୁ ୧୭ ତାରିଖ ୧୨ ଦିନ ବ୍ୟାପୀ ଅନୁଷ୍ଠିତ ହେବ । ସେଥିପାଇଁ ଏବେଠୁ ଏହାର ପ୍ରସ୍ତୁତି ପର୍ବ ଆରମ୍ଭ ହୋଇଛି । ନୂଆ ସରକାରରେ ପୁସ୍ତକ ମହୋତ୍ସବକୁ ନୂଆ ରୂପ ଦେବାକୁ ଯୋଜନା ହୋଇଛି । ଏନେଇ ଓଡ଼ିଶା ସରକାରଙ୍କ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୂଲ୍ୟରେ କାର୍ଯ୍ୟକ୍ରମ ଗ୍ରହଣ କରାଯାଇଥିବା ସୂଚନା ମିଳିଛି ।
ଭୁବନେଶ୍ୱର ୟୁନିଟ୍-୩ ସ୍ଥିତ ଇଡ୍କୋ ପ୍ରଦର୍ଶନୀ ପଡ଼ିଆଠାରେ ରାଜ୍ୟ ସଂସ୍କୃତି ବିଭାଗ ଆନୁକୂଲ୍ୟରେ ରାଜଧାନୀ ପୁସ୍ତକ ମେଳା, ଏକାମ୍ର ପୁସ୍ତକ ମହୋତ୍ସବ କମିଟି, ଓଡ଼ିଶା ପୁସ୍ତକ ପ୍ରକାଶକ ଓ ବିକ୍ରେତା ସଂଘ ସହଯୋଗରେ ‘ଅକ୍ଷର’ ଆୟୋଜିତ ହେବ । ଏନେଇ ଗତ ଅକ୍ଟୋବର ୧୮ ତାରିଖରେ ସଂସ୍କୃତି ବିଭାଗ ନିର୍ଦ୍ଦେଶକ ଡ. ବିଜୟ କେତନ ଉପାଧ୍ୟାୟଙ୍କ ଅଧ୍ୟକ୍ଷତାରେ ଏକ ବୈଠକ ହୋଇଥିଲା । ଏଥିରେ ପୁସ୍ତକ ମହୋତ୍ସବକୁ ଅଧିକ ଆକର୍ଷଣୀୟ କରିବା ଉପରେ ବିଶଦ୍ ଆଲୋଚନା ହୋଇଥିଲା । ମହୋତ୍ସବ ପରିସର ୩ଟି ମୁଖ୍ୟ ଥିମ୍ ବା ବିଷୟ ଉପରେ ଆଧାରିତ ହେବ । ଯଥା³ ମହାନ ବିପ୍ଲବୀ ବିର୍ସା ମୁଣ୍ଡା ଓ ଅନ୍ୟ ସ୍ୱାଧୀନତାଙ୍କ ସଂଗ୍ରାମୀଙ୍କ ଅବଦାନ, ଡ. ହରେକୃଷ୍ଣ ମହତାବ ଶତବାର୍ଷିକୀ ଓ ଓଡ଼ିଶାର ବୌଦ୍ଧ ଐତିହ୍ୟକୁ ସ୍ଥାନିତ କରାଯାଇ ପାଠାକମାନଙ୍କୁ ଅବଗତ କରାଯିବ । ଏଥିସହିତ ପ୍ରତିବର୍ଷ ପରି ଅନ୍ୟାନ୍ୟ କାର୍ଯ୍ୟକ୍ରମ ମଧ୍ୟ ରହିଛି ।
ଚଳିତ ବର୍ଷ ପୁସ୍ତକ ମେଳା ଆୟୋଜନ ନେଇ ସରକାରୀ ସୂତ୍ରରୁ ସବୁଜ ସଂକେତ ମିଳିବା ପରେ ଷ୍ଟଲ୍ ବୁକିଂ ଆରମ୍ଭ ହୋଇଛି । ବର୍ତ୍ତମାନ ସୁଦ୍ଧା ୧୦୦ରୁ ଅଧିକ ଷ୍ଟଲ୍ ବୁକିଂ ସରିଲାଣି । ମାତ୍ର ଷ୍ଟଲ୍ ଆବଣ୍ଟନକୁ ନେଇ ସାମାନ୍ୟ ଦ୍ୱନ୍ଦ୍ୱ ଏବଂ କିଛି ଅସନ୍ତୋଷ ସୃଷ୍ଟି ହୋଇଥିବାରୁ ଏହା ଉପରେ ସଂସ୍କୃତି ବିଭାଗ ସହ ଆଲୋଚନା ଚାଲିଛି । ସରକାର ଏ ବିଷୟରେ ଖୁବ୍ଶୀଘ୍ର ଏକ ସ୍ପଷ୍ଟ ନିର୍ଦ୍ଦେଶନାମା ଘୋଷଣା କରିବେ ଏବଂ ସଂସ୍କୃତି ବିଭାଗ ନିଜେ ଏହାର ତଦାରଖ କରିବେ । ଆସନ୍ତା ନଭେମ୍ବର ୧୫ ତାରିଖ ସୁଦ୍ଧା ଷ୍ଟଲ୍ ଆବେଦନ ଶେଷ ତାରିଖ ଥିବାବେଳେ ଡିସେମ୍ବର ୫ରେ ଷ୍ଟଲ୍ ଆବଣ୍ଟନ ହେବ । ପାଠକଙ୍କ ଲାଗି ପାର୍କିଂ ବ୍ୟବସ୍ଥା ମାଗଣା ରହିବା ସହ ଦିନ ୨ଟାରୁ ରାତି ୯ଟା ପର୍ଯ୍ୟନ୍ତ ଖୋଲା ରହିବ । ୬ ତାରିଖରେ ଉଦ୍ଘାଟନ ପର୍ବ ପରେ ପ୍ରତି ସନ୍ଧ୍ୟାରେ ସାହିତ୍ୟ ଓ ସାଂସ୍କୃତିକ ସଭା ହେବ । ବୈଠକରେ ବିଭାଗୀୟ ଯୁଗ୍ମ ସଚିବ ତଥା ଏହି ପୁସ୍ତକ ମେଳାର ନୋଡାଲ୍ ଅଧିକାରୀ ଦେବପ୍ରସାଦ ଦାଶ ଏବଂ ୩ଟି ଯାକ ସହଯୋଗୀ ସଂସ୍ଥାର ପ୍ରତିନିଧି ଓ ଭୁବନେଶ୍ୱରର କିଛି ବିଶିଷ୍ଟ ପ୍ରକାଶକ ଉପସ୍ଥିତ ଥିଲେ ।
