ମୁମ୍ବାଇ,୧୨।୧୧: ବଲିଉଡର ଷ୍ଟାର ସାହିଦ କପୁର ଏବେ ପୁଣି ଚର୍ଚ୍ଚାରେ। ନିଜର ନଟଖଟ ଆନ୍ଦାଜ ପାଇଁ ପରିଚିତ ସାହିଦ ବର୍ତ୍ତମାନ ଏକ ଭିନ୍ନ କାରଣକୁ ନେଇ ଚର୍ଚ୍ଚାରେ ରହିଛନ୍ତି । ସାହିଦଙ୍କ ଓ ତାଙ୍କ ପତ୍ନୀ ମୀରା କପୁର ମୁମ୍ବାଇର ୱର୍ଲି ଅଞ୍ଚଳରେ ଥିବା ତାଙ୍କର ଏକ ବିଳାସପୂର୍ଣ୍ଣ ଆପାର୍ଟମେଣ୍ଟକୁ ଭଡାରେ ଦେଇଛନ୍ତି । ଯାହାର ମାସିକ ଭଡା ୨୦ ଲକ୍ଷ ଟଙ୍କା ରହିଛି। 

ରିଏଲଇଷ୍ଟେଟ କ୍ଷେତ୍ରରେ ବ୍ୟବସାୟ କରୁଥିବା ଏକ ଘରୋଇ ସଂସ୍ଥା ସ୍କୋୟାରୟାର୍ଡ ନିକଟରେ ଏହି ଖବର ପ୍ରକାଶ କରିଛି । ଖବର ମୁତାବକ ଏହି ବିଳାସପୂର୍ଣ୍ଣ ଆପାର୍ଟମେଣ୍ଟଟି ୱର୍ଲିର ଓବରୟ ରିଏଲିଟି ପ୍ରୋଜେକ୍ଟ ମଧ୍ୟରେ ରହିଛି । ୫୩୯୫ ସ୍କୋୟାରଫିଟର ଏହି ବହୁତଳ ଆପାର୍ଟମେଣ୍ଟର ନାମ ହେଉଛି ‘ଥ୍ରୀ ସିକ୍ସ୍ଟି ୱେଷ୍ଟ’, ଏଥିରେ ୩ଟି କାର ପାର୍କିଂ କରିବାକୁ ରହିଛି ପାର୍କିଂ ପ୍ଲେସ୍ । ସାହିଦ ୫ବର୍ଷ ପାଇଁ ଏହି ଆପାର୍ଟମେଣ୍ଟକୁ ଡି-ଡେକୋର ହୋମ ଫାବ୍ରିକ୍ସର ବରିଷ୍ଠ କାର୍ଯନିର୍ବାହି ଅଧିକାରି ଦୀପନ ଭୂପତାନିଙ୍କୁ ଭଡା ସୁତ୍ରରେ ପ୍ରଦାନ କରିଛନ୍ତି ।

ସାହିଦ ଗତ ମେ ମାସରେ ଚନ୍ଦକ ରିଏଲଟୋରସ ପ୍ରାଇଭେଟ ଲିମି଼ଟେଡଠୁ ୬୦ କୋଟି ଟଙ୍କାରେ ଉକ୍ତ ଆପାର୍ଟମେଣ୍ଟର ଉପର ମହଲାକୁ କିଣିଥିଲେ।   ଏହି ଘରର ଏଗ୍ରିମେଣ୍ଟ ୧.୨୩ କୋଟି ଟଙ୍କା ଅଗ୍ରିମ ରେ ଚଳିତ ନଭେମ୍ବର ମାସରେ ଶେଷ ହୋଇଛି । ଅଗ୍ରିମ ବାବଦକୁ ୧.୨୩ କୋଟି ଟଙ୍କା ପୈଠ କରିଥିବାକୁ ଦୀପନ ଭୂପତାନିଙ୍କୁ ପ୍ରଥମ ଦଶମାସର ଭଡା ଦେବକୁ ପଡିବ ନାହିଁ ବୋଲି ସ୍କୋୟାରୟାର୍ଡ ଏହାର ରିପୋର୍ଟରେ ଉଲ୍ଲେଖ କରିଛି । ବର୍ତ୍ତମାନ ଘରର ଭଡା ୨୦.୫ ଲକ୍ଷ ହୋଇଥିଲାବେଳେ, ଏହା ବାର୍ଷିକ ୪-୫%  ହାରରେ  ବୃଦ୍ଧି ହେବା ସହିତ ୫ ବର୍ଷର ମିଆଦ ଶେଷ ହେଲା ବେଳକୁ ଘର ଭଡା ୨୩.୯୮ ଲକ୍ଷ ପହଞ୍ଚିଯାଇଥିବ ବୋଲି କୁହାଯାଇଛି । 

କେବଳ ସାହିଦ ନୁହଁନ୍ତି,ବଲିଉଡର ବହୁ କଳାକାର ମୁମ୍ବାଇରେ ନିଜର ଲଗଜାରୀ ପ୍ରପଟି ଭଡାରେ ଦେଇସାରିଛନ୍ତି।  ପୂର୍ବରୁ କାର୍ତ୍ତିକ ଆର୍ଯ୍ୟନ, ରଣବୀର ସିଂ, ପିଲ୍ମ ନିର୍ମାତା ସାଜିଦ ନାଦିଆଦୱାଲାଙ୍କ ନାମ ଥିବା ବେଳେ ଏହି କ୍ଲବରେ ବର୍ତ୍ତମାନ ସାହିଦଙ୍କ ନାଁ ମଧ୍ୟ ଯୋଡି ହୋଇଯାଇଛି ।