ଭୁବନେଶ୍ବର,୨୧/ ୧: ଅଟୋ କି ଟ୍ରକ ପଛରେ କିଛି ଲେଖା ଥିବା ଦେଖିବାକୁ ମିଳେ । ସଡକ ସୁରକ୍ଷା ହେଉ କି ପ୍ରିୟଜନଙ୍କ ପାଇଁ ପଦେ ଲେଖା ହୋଇଥିବା ଦେଖିବାକୁ ମିଳିଥାଏ । କିଛି ନା କିଛି ବାର୍ତ୍ତା ଲେଖା ଥାଏ । ଯେମିତି ଟିକେ ହସିଦେ... ପୁଣି ଦେଖା ହେବା..., ଅପେକ୍ଷା କରନ୍ତୁ ନିଶ୍ଚୟ ଫେରିବି..., ମୁଁ ଫେରିଲେ ତୁମର..., ଏ ସମୟ ବି ଦିନେ ସରିଯିବ... । ବ୍ୟାନର କିମ୍ବା ପୋଷ୍ଟରର ଲେଖା ପରି ଲାଗୁଥିବ ନିଶ୍ଚୟ । ମାତ୍ର ଏହା ଅଟୋ ଓ ଟ୍ରକ ପଛରେ ଲେଖାହୋଇଥିବା ଧାଡ଼ିଗୁଡିକ ଯାହା ଦେଖିଲାକ୍ଷଣି ଆଖି ସେଇଠି ଲାଖିଯାଏ । ମନଛୁଆଁ ସେହି ଧାଡ଼ି ଗୁଡିକ ମନ ଗୁଣୁଗୁଣାଏ । ଏହିପରି ଲେଖାଥିବା ଅନେକ ଆଟୋ ଓ ଟ୍ରକ ରାଜଧାନୀ ରାସ୍ତାରେ ଗଡ଼ୁଥିବାର ଦେଖିବାକୁ ମିଳିଥାଏ । ଯାହାକୁ ପଥିକଟିଏ ପଢି ସ୍ମିତ ହାସ୍ୟ ଦେଇଥାଏ ।
ସବୁ ମଣିଷ ନିଜ ଭାବନାକୁ ପ୍ରକାଶ କରିବା ପାଇଁ ଶବ୍ଦର ସାହାଯ୍ୟ ଲୋଡ଼ିଥାଏ । ଆଉ ତାହାକୁ ଲେଖା ମାଧ୍ୟମରେ ପ୍ରକାଶ କରେ । ଏଥିରୁ ଜଣେ ଗାଡ଼ି ଚାଳକ କେମିତି ବା ବାଦ୍ ପଡ଼ିବ । ଜଣେ ଗାଡ଼ି ଚାଳକ ପାଇଁ ତା’ର ଗାଡ଼ି ହେଉଛି ସବୁକିଛି । ଆଉ ସେଇ ଗାଡ଼ିରେ ସେ ଯାତ୍ରୀମାନଙ୍କୁ ଲକ୍ଷ୍ୟସ୍ଥଳକୁ ପହଞ୍ଚାଇବା ସହିତ ଅନେକ ଶିକ୍ଷଣୀୟ ଓ ମନୋରଞ୍ଜନଭିତ୍ତିକ ବାର୍ତ୍ତା ଦେଇଥାଏ । ଘରୁ ଗାଡ଼ି ନେଇ ବାହାରିଲେ କେତେବେଳେ କେଉଁ କଥା । ଦ୍ରୁତ ଗତି, ପ୍ରବଳ ଟ୍ରାଫିକ୍ ଜାମ୍ ଓ ଦୁର୍ଘଟଣା ପ୍ରବଣ ସ୍ଥାନକୁ ପାର୍ କରି ସୁରକ୍ଷିତ ଘରକୁ ଫେରିଲେ ପରିବାର ଲୋକେ ଆଶ୍ୱସ୍ତି ହୁଅନ୍ତି । ଏପରି ସ୍ଥଳେ ଡ୍ରାଇଭର୍ ନିଜର ପ୍ରିୟ ପରିଜନଙ୍କ ଉଦ୍ଦେଶ୍ୟରେ ଲେଖିଥାଏ ‘ମୁଁ ଫେରିଲେ ତୁମର’ । ସମାନ ରୁଟ୍ରେ ଗାଡ଼ି ଚଲାଉଥିବା ଚାଳକ ଯାତ୍ରୀମାନଙ୍କ ଉଦ୍ଦେଶ୍ୟରେ ତା’ ଗାଡ଼ିରେ ଲେଖିଥାଏ ‘ଅପେକ୍ଷା କରନ୍ତୁ ନିଶ୍ଚୟ ଫେରିବି’ ପରି କୌତୁହଳ ପୂର୍ଣ୍ଣ ଲେଖା ଦେଖିବାକୁ ମିଳିଥାଏ ।
ଏହା ବି ପଢନ୍ତୁ...ଦାରିଙ୍ଗବାଡ଼ିରେ ତୁଷାରପାତ, ହାଡ଼ଭଙ୍ଗା ଜାଡ଼ରେ ଥରୁଛନ୍ତି ଲୋକେ
ଉଚ୍ଚ ଆକାଂକ୍ଷା ଓ ଅଭିଳାଷ ନେଇ ମଣିଷ ବଞ୍ଚେ । ଆଗକୁ ବଢିବା ପାଇଁ ପ୍ରାୟସ କରିଥାଏ । ଜଣେ ଅଟୋ ଚାଳକର ମନରେ ଏପରି ଆଶା ଆକାକ୍ଷାଂ ଥାଏ । ଦିନେ ଅଟୋରୁ ଟ୍ରକ ଚଳାଇବାକୁ ସ୍ବପ୍ନ ଦେଖିଥାଏ । ତାହାକୁ ‘ମୁଁ ବଡ଼ ହେଲେ ଟ୍ରକ ହେବି’ ଲେଖାରେ ପ୍ରତିଫଳିତ କରିଥାଏ । ସଡ଼କ ସୁରକ୍ଷାର ବାର୍ତ୍ତା ଦେଇ ଚାଳକ ଜଣକ ଲେଖିଥାଏ ‘ନିର୍ଦ୍ଦିଷ୍ଟ ଦୂରତା ରକ୍ଷା କରନ୍ତୁ’। ନିଜର ଭାବନା ଓ ଅନ୍ୟକୁ କିଛି ବାର୍ତ୍ତା ଦେବାପାଇଁ ଚାଳକ ଜଣକ ଅନେକ କିଛି ଲେଖିଥାଏ । ଏହିସବୁ ଲେଖା ମଧ୍ୟରୁ କେତେଗୁଡ଼ିକ ହେଉଛି ମୁଁ ଓଡ଼ିଆ ପୁଅ, ଆଇ ଲଭ୍ ଇଣ୍ଡିଆ, ମେରା ଭାରତ ମହାନ୍, ସୁବିଧା ଦେଖି ସାଇଡ୍ ଦେବି, କର୍ମ ହିଁ ଭଗବାନ, ଚଲ୍ତେ ଚଲ୍ତେ, ଫିର୍ ମିଲେଙ୍ଗେ, ବାପା ମା’ ଙ୍କ ଆଶୀର୍ବାଦ, ଏ ସମୟ ବି ସରିଯିବ ପରି ଲେଖା ବଟୋଇର ଦୃଷ୍ଟି ଆକର୍ଷଣ କରିଥାଏ । ଏହି ଲେଖା ପଢି ପଥିକଟିଏ ମୁହଁରେ ହସର ଲହରୀ ଦେଖିବାକୁ ମିଳେ ।
