ପୁରୀ,୧୦/୦୬: ସୋମବାର ଜ୍ୟେଷ୍ଠ ଶୁକ୍ଳ ତ୍ରୟୋଦଶୀରେ ଦଇତାପତିମାନେ ଶ୍ରୀମନ୍ଦିରରେ ପ୍ରବେଶ କରିବା ପରେ ମହାପ୍ରଭୁଙ୍କ ରଥଯାତ୍ରା ନୀତିର ଶୁଭାରମ୍ଭ ହୋଇଛି । ମଙ୍ଗଳବାର ଚାରମାଳ ବନ୍ଧା ସହ ଠାକୁରଙ୍କ ସେନାପଟା ଲାଗି ନୀତି । ଏହି ସ୍ୱତନ୍ତ୍ର ନୀତି ପାଇଁ ଦର୍ଶନ କଟକଣା ରହିଛି । ଆଜି ଠାକୁରଙ୍କ ପହୁଡ଼ଠାରୁ ମଙ୍ଗଳବାର ଅପରାହ୍ନ ୨ଟା ପର୍ଯ୍ୟନ୍ତ ଠାକୁରଙ୍କ ଦର୍ଶନ ମିଳିବ ନାହିଁ । ସେହିଭଳି ସ୍ନାନ ଯାତ୍ରା ବୁଧବାର ସକାଳ ୭ଟା ସୁଦ୍ଧା ଠାକୁରଙ୍କ ପହଣ୍ଡି ଆରମ୍ଭ ହେବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ମିଳିଛି ।
ବୁଧବାର ଦେବସ୍ନାନ ପୂର୍ଣ୍ଣିମା । ସ୍ନାନବେଦିରେ ଉଭା ହେବେ ଶ୍ରୀଜିଉ । ଏଣୁ ସୋମବାର ବିଳମ୍ବିତ ରାତିରୁ ଆରମ୍ଭ ହେଉଛି ବିଶେଷ ନୀତି । ଠାକୁରଙ୍କଠାରେ ଠିଆ ପହୁଡ଼ ଖଣ୍ଡୁଆ ପଡ଼ିବା ପରେ ରାତିରେ ବାହୁଟ କଣ୍ଟ ନୀତି କରିଥିଲେ । ମହାପ୍ରଭୁଙ୍କ ଶ୍ରୀଅଙ୍ଗ ସୁରକ୍ଷା ପାଇଁ ବାହୁଟ କଣ୍ଟ କରାଯାଇଛି । ଦଇତାପତିମାନେ ସିଂହାସନରେ ଏହି କାର୍ଯ୍ୟ କରିଛନ୍ତି । ଏହି ଅବସରରେ କୋଠସୁଆଁସିଆ ସେବକମାନେ ମହାପ୍ରଭୁଙ୍କ କାର୍ଯ୍ୟରେ ନିୟୋଜିତ ହୋଇଛନ୍ତି । ସାମୂହିକ ଭାବେ ଏମାନେ ତଳୁ ରତ୍ନସିଂହାସନ ପର୍ଯ୍ୟନ୍ତ ଚାରମାଳ(ଶିଡ଼ି) ବାନ୍ଧିଛନ୍ତି ।
ଚତୁର୍ଦ୍ଦଶୀ ସକାଳେ କୋଠ ସୁଆଁସିଆ ସେବକ ବାହାରିବା ପରେ ଦଇତାପତିମାନେ ସେନାପଟା ଲାଗି କରିବେ । ଶ୍ରୀମନ୍ଦିର ନୀତି ନିର୍ଘଣ୍ଟ ଅନୁସାରେ ମଙ୍ଗଳବାର ସାଢେ ୬ଟାରୁ ଆରମ୍ଭ ହେବ ଏହି ସ୍ୱତନ୍ତ୍ର ନୀତି । ୧୧ଟାରେ ସରିବ ସେନାପଟା ଲାଗି । ଏହାପରେ ଶ୍ରୀବିଗ୍ରହଙ୍କ ମଙ୍ଗଳାଳତି ୧୨ଟାରେ,ମଇଲମ, ତଡ଼ପ ଲାଗି ଓ ଅବକାଶ ରୋଷହୋମ, ସୂର୍ଯ୍ୟପୂଜା ଓ ଦ୍ୱାରପାଳ ପୂଜା ହୋଇ ଅପରାହ୍ନ ୨ଟାରେ ଠାକୁରଙ୍କ ବେଶ ଶେଷ ହେବ । ଏହାପରେ ଅନ୍ୟାନ୍ୟ ନୀତି ସହ ଚଉଠି କର୍ମ ରହିଛି । ଦେବସ୍ନାନ ପୂର୍ଣ୍ଣିମା ଦିନ ଭୋର ସାଢ଼େ ୪ଟାରେ ଠାକୁରଙ୍କ ମଙ୍ଗଳାର୍ପଣ ବଢ଼ି ଡୋରଲାଗି ଓ ପୁଷ୍ପାଞ୍ଜଳି ହୋଇ ୭ଟା ସୁଦ୍ଧା ପହଣ୍ଡି ଆରମ୍ଭ ହୋଇଯିବ ।
