ନୂଆଦିଲ୍ଲୀ,୨୬।୮: ଭାରତ ଉପରେ ଆମେରିକା ୫୦% ଟାରିଫ ଲଗାଇବାର ଘୋଷଣା କରିଛି। ଯାହାକି ବୁଧବାର ବିଳମ୍ବିତ ରାତିରୁ ଲାଗୁ ହେବ। ଟ୍ରମ୍ପ ଦାବି କରିଛନ୍ତି, ଯଦି କୌଣସି ଦେଶ ରୁଷରୁ ତେଲ କିଣେ, ତେବେ ତାକୁ କଡା ଟାରିଫ୍ର ସାମନା କରିବାକୁ ପଡିବ। ଆମେରିକା ରାଷ୍ଟ୍ରପତି ବର୍ତ୍ତମାନ ସାରା ବିଶ୍ବରେ ଟାରିଫ୍ ଯୁଦ୍ଧ ଆରମ୍ଭ କରିଦେଇଛନ୍ତି। ଲଗାତାର ଧମକ ମଧ୍ୟ ଦେଉଛନ୍ତି। ସୋମବାର ସେ ଚୀନ୍ ଉପରେ ୨୦୦ପ୍ରତିଶତ ଟାରିଫ୍ ଲଗାଇବାର ଧମକ ଦେଇଥିଲେ। ଏହା ଭିତରେ ଦୁନିଆର ୨୦ ଦେଶର ମୁଖ୍ୟ ଏବେ ଗୋଟିଏ ମଞ୍ଚରେ ଏକାଠି ହେବେ। ସମ୍ଭାବନା ରହିଛି ଯେ, ଚୀନ୍ ମାଟିରୁ ଆମେରିକାକୁ ଟାରିଫ୍ ମିସାଇଲର କଡା ଜବାବ୍ ଦିଆଯିବ। ଏହି ଶକ୍ତି ପ୍ରଦର୍ଶନରେ ପିଏମ୍ ମୋଦି ଓ ରୁଷ ରାଷ୍ଟ୍ରପତି ବ୍ଲାଡିମିର ପୁଟି୍ ମଧ୍ୟ ସାମିଲ ହେବେ। ଚୀନ୍ର ତିୟାନଜିନ୍ରେ ହେବାକୁ ଥିବା ସଙ୍ଘାଇ ସହଯୋଗ ସଂଗଠନ(ଏସ୍ସିଓ) ଶିଖର ସମ୍ମିଳନୀ ବେଳେ ଯେତେବେଳେ ୨୦ ଦେଶର ପ୍ରମୁଖ ନେତା ଏକାଠି ନଜର ଆସିବେ, ସେତେବେଳେ ଆମେରିକା ଚିନ୍ତାରେ ପଡିଯିବ। ରାଷ୍ଟ୍ରପତି ଡୋନାଲ୍ଡୋ ଟ୍ରମ୍ପଙ୍କ ନିଦ ଉଡିପାରେ।
ଚୀନ୍ ସହାୟକ ବୈଦେଶିକ ମନ୍ତ୍ରୀ ଲିୟୁ ବିନ୍ କହିଛନ୍ତି, ଏସ୍ସିଓ ବୈଠକରେ ରୁଷ ରାଷ୍ଟ୍ରପତି ଭ୍ଲାଡିମିର ପୁଟିନ୍, ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଅଦ୍ୟ ବହୁ ଦେଶର ନେତା ସାମିଲ ହେବେ। ଏହି ଆୟୋଜନ ଚୀନ୍ର ତିୟାନଜିନ୍ ସହରରେ ହେବ। ଏହି ଦୁଇ ଦିବସୀୟ ସମ୍ମିଳନୀରେ ଜାତିସଂଘର ମହାସଚିବ ଆଣ୍ଟୋନିଓ ଗୁଟରେସ୍ ଓ ଅନ୍ୟ ୯ ଅନ୍ତର୍ଜାତୀୟ ସଂଗଠନର ମୁଖ୍ୟ ସାମିଲ ହେବେ।
ଶିଖର ସମ୍ମିଳନୀରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୭ ବର୍ଷରୁ ଅଧିକ ସମୟ ପରେ ପ୍ରଥମ ଚୀନ୍ ଗସ୍ତ ହେବ। ମୋଦି ଶେଷ ଥର ଗତ ବର୍ଷ ରୁଷର କାଜାନରେ ହୋଉଥିବା ବ୍ରିକ୍ସ ସମ୍ମିଳନୀରେ ଜିନ୍ପିଙ୍ଗ ଓ ପୁଟିନ୍ଙ୍କ ସହ ମଞ୍ଚରେ ଏକାଠି ହୋଇଥିଲେ। ସେଭଳି ପାଶ୍ଚାତ୍ୟ ଦେଶମାନେ ୟୁକ୍ରେନ ଯୁଦ୍ଧ ଭିତରେ ରୁଷ ନେତାଙ୍କଠାରୁ ଦୂରତ୍ବ ବଜାୟ ରଖିଥିଲେ। ଗତ ସପ୍ତାହରେ ନୂଆଦିଲ୍ଲୀ ରୁଷ ଦୂତାବାସର ଅଧିକାରୀ କହିଥିଲେ, ମସ୍କୋକୁ ଆଶା ରହିଛି ଖୁବ୍ ଶୀଘ୍ର ଚୀନ୍ ଓ ଭାରତ ସହ ତ୍ରିପାକ୍ଷିୟ ବାର୍ତ୍ତା ହେବ।
