କଟକ, ୦୧/୦୫ : ଫୁସ୍ଫୁସ୍ (ଲଙ୍ଗ୍ସ୍) ସମସ୍ୟା ଜନିତ ରୋଗୀଙ୍କ ସଂଖ୍ୟା ଦିନକୁ ଦିନ ବଢ଼ୁଛି । କୋଭିଡ୍ ପରଠାରୁ ଏଭଳି ରୋଗୀଙ୍କ ସଂଖ୍ୟା ବଢ଼ିବାରୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ଅନୁଦାନରେ ଏସ୍ସିବି ଛାତି ରୋଗ ତଥା ପଲ୍ମ୍ୟୁନାରୀ ମେଡିସିନ୍ ବିଭାଗରେ ସ୍ୱତନ୍ତ୍ର ଭିତ୍ତିଭୂମି ନିର୍ମାଣ ହୋଇଛି । ଫୁସ୍ଫୁସ୍ (ଲଙ୍ଗ୍ସ୍) ସର୍ଜରୀ ପାଇଁ ମଡ୍ୟୁଲାର୍ ଅପରେସନ ଥିଏଟର (ଓଟି) ନିର୍ମାଣ ହୋଇଛି । ୩ କୋଟିରୁ ଅଧିକ ଟଙ୍କା ବ୍ୟୟରେ ନିର୍ମିତ ଏହି ଓଟିରେ ଅତ୍ୟାଧୁନିକ ଚିକିତ୍ସା ସରଞ୍ଜାମ, ଅନ୍ୟାନ୍ୟ ଭିତ୍ତିଭୂମି ରହିଛି । ସେହିପରି ପଲ୍ମ୍ୟୁନାରୀ ରିହାବ ସେଣ୍ଟର୍ ବି ତିଆରି ହୋଇଛି । ଏପରି ୪ କୋଟିରୁ ଅଧିକ ବ୍ୟୟରେ ପ୍ରକଳ୍ପ ପ୍ରସ୍ତୁତ ହୋଇ ରହିଥିଲେ ହେଁ ତାହା ରୋଗୀ ସେବାରେ ବ୍ୟବହାର ହୋଇ ପାରୁନାହିଁ । ପ୍ରକଳ୍ପ ଉଦ୍ଘାଟନ ହୋଇନଥିବାରୁ ଏଠାରେ ଚିକିତ୍ସା ଆରମ୍ଭ ହୋଇପାରୁନଥିବା ଏସ୍ସିବି ସୂତ୍ରରୁ ସୂଚନା ମିଳିଛି । ଏମିତିକି ଉଦ୍ଘାଟନ ତାରିଖ ଧାର୍ଯ୍ୟ ହେବା ପାଇଁ ଦୁଇ ମାସରୁ ଅଧିକ ସମୟ ନିଆଯାଇଥିଲେ ସୁଦ୍ଧା ବାସ୍ତବରେ କେବେ ପ୍ରକଳ୍ପ ଉଦ୍ଘାଟନ ହେବ ତାହା ଚୂଡ଼ାନ୍ତ ହୋଇପାରୁ ନାହିଁ।
ଲଙ୍ଗ୍ସ୍ରେ ସଂକ୍ରମଣ ସମସ୍ୟା ବଢ଼ି ଜଟିଳ ହୋଇପଡ଼ିଲେ ଅନେକ ସମୟରେ ତାହା ମେଡିସିନ୍ ଦ୍ୱାରା ଚିକିତ୍ସା ସମ୍ଭବ ହୋଇନଥାଏ । ତେଣୁ ରୋଗୀଙ୍କର ସର୍ଜରୀର ଆବଶ୍ୟକତା ପଡ଼ିଥାଏ ବୋଲି ବିଭାଗୀୟ ଡାକ୍ତର କହିଛନ୍ତି । ନୂଆ ମଡ୍ୟୁଲାର ଓଟିରେ ଛାତି ରୋଗ ଜନିତ ରୋଗୀଙ୍କ ପାଇଁ ଅପରେସନ୍ ସୁବିଧା ରହିଛି । ରାଜ୍ୟରେ ଏସ୍ସିବି ଏକ ପ୍ରମୁଖ ଚିକିତ୍ସା ପ୍ରତିଷ୍ଠାନ ହୋଇଥିବାରୁ ରାଜ୍ୟର ବିଭିନ୍ନ ଆଡ଼ୁ ପଲମ୍ୟୁନାରୀ ବିଭାଗକୁ ରୋଗୀ ଆସୁଛନ୍ତି । ଅପରେସନ୍ ଦରକାର ପଡ଼ୁଥିଲେ ମଧ୍ୟ ଓଟି ଉଦ୍ଘାଟନ ହୋଇନଥିବାରୁ ଡାକ୍ତର ହାତ ଟେକି ଦେଉଛନ୍ତି।
ଶ୍ୱାସକ୍ରିୟାରେ ସମସ୍ୟା ଉପୁଜୁଥିଲେ କିମ୍ବା ଅଧିକ ଧଇଁସଇଁ ଅନୁଭୂତ ହେଉଥିଲେ ଲଙ୍ଗ୍ସ୍ରେ ବ୍ୟାୟାମ ଜରୁରି ବୋଲି ଛାତି ରୋଗ ବିଭାଗ ଡାକ୍ତର କହୁଛନ୍ତି । ତେଣୁ ଫୁସଫୁସ୍ ବ୍ୟାୟାମ (ଲଙ୍ଗ୍ସ୍ ଏକ୍ସସରସାଇଜ୍) ପାଇଁ ଏସ୍ସିବିରେ ପଲମ୍ୟୁନାରୀ ରିହାବ ସେଣ୍ଟର୍ ତିଆରି ହୋଇଛି । ଉତ୍କୃଷ୍ଟ ସ୍ୱାସ୍ଥ୍ୟ ସେବା ଲାଗି ଏହି ଅତ୍ୟାଧୁନିକ ରିହାବ ସେଣ୍ଟର୍ରେ ବହୁ ସରଞ୍ଜାମ ଓ ଉପକରଣ ରହିଛି । ମାତ୍ର ତାହା ରୋଗୀଙ୍କ ସେବାରେ ଲାଗୁନାହିଁ । କାରଣ ସେଣ୍ଟର୍ ଉଦ୍ଘାଟନ ହୋଇପାରୁନାହିଁ । ସରକାରୀ ସ୍ତରରେ ଉଦ୍ଘାଟନ ସମୟ ସ୍ଥିର ହେଉନଥିବାରୁ ରୋଗୀମାନେ ପ୍ରଭାବିତ ହେଉଛନ୍ତି । ଉଦ୍ଘାଟନ କେବେ ହେବ, କ’ଣ ସମସ୍ୟା ରହିଛି, ସେ ସଂପର୍କରେ ଏସ୍ସିବି କର୍ତ୍ତୃପକ୍ଷ କିନ୍ତୁ କୌଣସି ପ୍ରତିକ୍ରିୟା ଦେବାକୁ ମନା କରିଛନ୍ତି ।
ଏହି ଖବରଟକୁ ପଢନ୍ତୁ- ବିଏମ୍ସିରୁ ଏକାଥରକେ ଅବସର ନେଲେ ୧୬ କର୍ମଚାରୀ
