ମୁମ୍ଵାଇ, ୨୯/୧୧ : ପର୍ଣ୍ଣୋଗ୍ରାଫି ମାମଲାରେ ବଢିଲା ଶିଳ୍ପା ସେଟ୍ଟୀଙ୍କ ସ୍ଵାମୀ ରାଜ କୁନ୍ଦ୍ରାଙ୍କ ଅଡ଼ୁଆ। ମୁମ୍ଵାଇ ଜୁହୁସ୍ଥିତ ଘର, ଅଫିସ ସମେତ ଅନ୍ୟ ଠିକଣାରେ ରେଡ୍ କଲା ଇଡି। ରାଜ କୁନ୍ଦ୍ରାଙ୍କ ବ୍ୟତୀତ ଏହି ମାମଲାରେ ସଂମ୍ପୃକ୍ତ ଥିବା ଅନ୍ୟ କିଛି ଲୋକଙ୍କ ଘରେ ରେଡ୍ ଚାଲିଛି। ମୋଟ ୧୫ଟି ସ୍ଥାନରେ ଇଡି ରେଡ୍ କରୁଛି। ମୋବାଇଲ୍ ଆପ୍ ଜରିଆରେ ପର୍ଣ୍ଣ ଭିଡିଓ ତିଆରି କରିବା ଏବଂ ଏହାକୁ ବିକ୍ରି କରିବା ସହ ଜଡ଼ିତ ମନି ଲଣ୍ଡରିଂ ମାମଲାରେ ଇଡି ତନାଘନା କରୁଛି। 

ସୂଚନାନୁଯାୟୀ, ୨୦୨୧ ଜୁଲାଇରେ ପର୍ଣ୍ଣୋଗ୍ରାଫି ମାମଲାରେ ମୁଖ୍ୟ ଅଭିଯୁକ୍ତ ରାଜ କୁନ୍ଦ୍ରାଙ୍କୁ କ୍ରାଇମବ୍ରାଞ୍ଚ ଗିରଫ କରିଥିଲା। ୨ ମାସ ଧରି ସେ ଜେଲ୍‌ରେ ଥିଲେ। ୨୦୨୧ ସେପ୍ଟେମ୍ଵରରେ ସିଟି କୋର୍ଟରୁ ତାଙ୍କୁ ଜାମିନ ମିଳିଥିଲା। ଜେଲ୍‌ରୁ ମୁକୁଳିବା ପରେ ରାଜ କୁନ୍ଦ୍ରା ତାଙ୍କ ଉପରେ ଲାଗିଥିବା ସମସ୍ତ ଅଭିଯୋଗକୁ ଖଣ୍ଡନ କରିଥିଲେ। ହେଲେ ଚଳିତ ବର୍ଷ ଆରମ୍ଭରୁ ପୁଣି ଥରେ ରାଜ କୁନ୍ଦ୍ରା ଇଡି ଜାଲରେ ଫସିଥିଲେ। ମନି ଲଣ୍ଡରିଂ ମାମଲାରେ ଜୁହୁରେ ଥିବା କୁନ୍ଦ୍ରାଙ୍କର ଫ୍ଲାଟ୍, ପୁଣେସ୍ଥିତ ଏକ ବଙ୍ଗଳା, ଏବଂ ୯୮ କୋଟି ଟଙ୍କାର ସେୟାର ଇକ୍ଵିଟି ସହିତ ଅନ୍ୟ ସମ୍ପତ୍ତି ଇଡି ଜବତ କରିଥିଲା।