ଭୁବନେଶ୍ବର,୯।୧୨ : ରେଳ ମନ୍ତ୍ରଣାଳୟ ପକ୍ଷରୁ କଟକ ଏବଂ ରାୟଗଡା ଜିଲ୍ଲାରେ ଦୁଇଟି ପ୍ରମୁଖ ରେଳ ଫ୍ଲାଏଓଭର ନିର୍ମାଣ ପାଇଁ ୫୦୯ କୋଟି ଟଙ୍କା ମଞ୍ଜୁର କରାଯାଇଛି । ରେଳ, ସୂଚନା ଓ ପ୍ରସାରଣ ଏବଂ ଇଲେକ୍ଟ୍ରୋନିକ୍ସ ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ଓଡିଶାରେ ଏହି ରେଳ ଭିତ୍ତିଭୂମି ପ୍ରକଳ୍ପର ମଞ୍ଜୁରୀ ବିଷୟରେ ସୂଚନା ଦେଇଛନ୍ତି। ଏହା ଦ୍ବାରା ରେଳ ଲାଇନଗୁଡିକରେ ଯାତାୟାତ ସମସ୍ୟା ଦୂର ହୋଇପାରିବ।
କଟକ ଜିଲ୍ଲାରେ ୧୦.୮୯ କିମି ଦୈର୍ଘ୍ୟ ରେଳ ଫ୍ଲାଏଓଭର ନିର୍ମାଣ ହେବ। ଏହି ପ୍ରକଳ୍ପରେ କଟକ ଜିଲ୍ଲାର ରାଜଆଠଗଡ଼, ରାଧାକିଶୋରପୁର ଏବଂ ମାଛପୁର ରେଳ ଷ୍ଟେସନକୁ ସଂଯୋଗ କରୁଥିବା ୧୦.୮୯ କିଲୋମିଟର ରେଳ ଫ୍ଲାଏ ଓଭର ନିର୍ମାଣ ଅନ୍ତର୍ଭୁକ୍ତ | ଏହି ଭିତ୍ତିଭୂମି କ୍ରସ୍ ଟ୍ରାଫିକ୍ ଜନିତ ସମସ୍ୟାକୁ ଦୂର କରିବା ସହ ଏକକାଳୀନ ଟ୍ରେନ୍ ଚଳାଚଳକୁ ସୁଗମ କରିବ । ଏହି ପ୍ରକଳ୍ପ ପାଇଁ ୨୬୮.୯୨ କୋଟି ଟଙ୍କା ମଂଜୁର କରାଯାଇଅଛି |
ସେହିପରି ରାୟାଗଡା ଜିଲ୍ଲାର ୫.୫୦ କିଲୋମିଟର ଦୈର୍ଘ୍ୟ ରେଳ ଫ୍ଲାଏଓଭର ନିର୍ମାଣ ହେବ। ଏହି ପ୍ରକଳ୍ପ ପାଇଁ ୨୩୯.୮୩ କୋଟି ଟଙ୍କା ଅନୁମୋଦନ କରାଯାଇଛି। ରାୟଗଡା ଜିଲ୍ଲାର ସିଙ୍ଗାପୁର ରୋଡ ଷ୍ଟେସନରେ ୫.୫୦ କିଲୋମିଟର ଦୈର୍ଘ୍ୟ ରେଳ ଫ୍ଲାଏ ଓଭର ନିର୍ମାଣ ହେବ। ଯାହା ରାୟପୁର-ବିଜୟନଗରମ ରେଳ ଲାଇନରେ ଟ୍ରାଫିକ ସମସ୍ୟାକୁ ଦୂର କରିବ। ସିଙ୍ଗାପୁର ରୋଡ଼ ଷ୍ଟେସନ ସହ ପାର୍ଶ୍ଵବର୍ତ୍ତୀ ଷ୍ଟେସନରେ ନିରବଚ୍ଛିନ୍ନ ଟ୍ରେନ୍ ଚଳାଚଳ ହୋଇପାରିବ। କ୍ରସ୍ ଟ୍ରାଫିକ୍ କାରଣରୁ ସୃଷ୍ଟି ହେଉଥିବା ବିଳମ୍ବକୁ ମଧ୍ୟ ଏଡାଇ ଦିଆଯିବ।
ନୂତନ ଫ୍ଲାଏଓଭର ଦ୍ବାରା ଏକାଧିକ ଦିଗରୁ ଟ୍ରେନର ଏକକାଳୀନ ଚଳାଚଳ ପାଇଁ ଅନୁମତି ମିଳିପାରିବ । ଏଥିସହ କ୍ରସ୍-ଟ୍ରାଫିକ୍ ଜନିତ ସମସ୍ୟାକୁ ଦୂର କରି ଏହି ରେଳ ଫ୍ଲାଏ ଓଭରଗୁଡିକ କାର୍ଯ୍ୟକ୍ଷମ ଚ୍ୟାଲେଞ୍ଜଗୁଡିକୁ ସମାଧାନ କରିବ। ବର୍ତ୍ତମାନ ସିଙ୍ଗାପୁର ରୋଡ୍ ଷ୍ଟେସନ୍ ସହିତ ରାଜଆଠଗଡ଼, ରାଧାକିଶୋରପୁର, ଏବଂ ମାଛପୁର ଭଳି ପ୍ରମୁଖ ମିଳନ ସ୍ଥଳରେ ବିଳମ୍ବ ଏବଂ ଚଳାଚଳ ସମସ୍ୟା ଗୁଡିକୁ ଏଡାଇ ଦିଆଯାଇ ପାରିବ ।
