ନୂଆଦିଲ୍ଲୀ,୧୦/୧୨:ସଂସଦର ଶୀତକାଳୀନ ଅଧିବେଶନରେ ଆଦାନୀ ପ୍ରସଙ୍ଗକୁ ନେଇ ଥମୁନି ବିରୋଧୀଙ୍କ ହଙ୍ଗାମା । ଏହାରି ମଧ୍ୟରେ ‘ମୋଦି-ଆଦାନି ଭାଇ-ଭାଇ’ ଲେଖାଥିବା ବ୍ୟାଗ ନେଇ ସଂସଦରେ ପହଞ୍ଚିଛନ୍ତି ପ୍ରିୟଙ୍କା ଗାନ୍ଧି। ଆଉ ତାଙ୍କର ଏହି ବ୍ୟାଗକୁ ପ୍ରଶଂସା କରି ବ୍ୟାଗଟି ବେଶ୍ ଭଲ ହୋଇଥିବା କହିଛନ୍ତି ରାହୁଲ ଗାନ୍ଧି ।
ତେବେ ବ୍ୟାଗର ଗୋଟିଏ ପଟେ ମୋଦିଙ୍କ ଫଟୋ ଥିବା ବେଳେ ଅନ୍ୟପଟେ ଆଦାନୀଙ୍କ ଫଟୋ ରହିଛି। ଆଉ ସେଥିରେ ଲେଖା ହୋଇଛି ମୋଦି- ଆଦାନୀ ଭାଇ ଭାଇ । ଏହାରି ମଧ୍ୟରେ ପ୍ରିୟଙ୍କା ଗାନ୍ଧି କହିଛନ୍ତି ଯେ ଆମେ ସଂସଦର ଆଦାନି ଗ୍ରୁପ୍ ଲାଞ୍ଚ ନେବା ପ୍ରସଙ୍ଗରେ ଭାଗ ନେବାକୁ ଚାହୁଛୁ ।ହେଲେ ସରକାର ଏହା ଚାହୁଁ ନାହାନ୍ତି । କୌଣସି ନା କୌଣସି ପ୍ରକାର ବାହାନା କରି ଗୃହକୁ ମୁଲବତୀ କରାଯାଉଛି । ସେପଟେ ସଂସଦରେ ଚର୍ଚ୍ଚା ବେଳେ ସମସ୍ତ ସାଂସଦଙ୍କୁ ଉପସ୍ଥିତ ରହିବାକୁ କହିଛନ୍ତି ବିରୋଧୀ ଦଳ ନେତା ରାହୁଲ ଗାନ୍ଧି । ଏହା ପୂର୍ବରୁ ସୋମବାର ରାହୁଲ ଗାନ୍ଧିଙ୍କୁ ରିପୋର୍ଟର ବେଶରେ ଦେଖିବାକୁ ମିଳିଥିଲା । ଏଥିସହିତ ସେ ମୋଦି-ଆଦାନୀଙ୍କ ସମ୍ପର୍କ ,ଅମିତ ଶାହଙ୍କ ଭୂମିକା ଓ ସଂସଦ ନ ଚାଲିବାକୁ ନେଇ ପ୍ରଶ୍ନ କରିଥିଲେ । ସେହିପରି ଅନ୍ୟପଟେ ବିଜେପି ସୋନିଆ ଗାନ୍ଧୀଙ୍କ ଉପରେ ଆମେରିକାର ବ୍ୟବସାୟୀ ଜର୍ଜ ସୋରେଶଙ୍କ ସହ ମିଶି ଭାରତ ବିରୋଧରେ ଏଜେଣ୍ଡା ଚଲାଉଥିବାର ଆରୋପ ଲଗାଇଛି ।
