ନୂଆଦିଲ୍ଲୀ: ଦିଲ୍ଲୀରେ ଏବେ ନିଃଶ୍ୱାସ ନେବା କଷ୍ଟ ହୋଇପଡ଼ିଛି । ସହର ଓ ଆଖପାଖ ଅଞ୍ଚଳକୁ ଘେରି ରହିଛି ପ୍ରଦୂଷଣର ଚାଦର । ପ୍ରଦୂଷଣର ମୋଟା ଆସ୍ତରଣ ଓ ଧୂଆଁଳିଆ ପରିବେଶରେ ଲୋକମାନେ ଅଣନିଃଶ୍ୱାସୀ ଅନୁଭବ କରୁଛନ୍ତି । ବୁଧବାର ସକାଳ ପାଖରୁ ଏପରି ସ୍ଥିତି ଲାଗି ରହିଥିବା ବେଳେ ଦିଲ୍ଲୀରେ ବାୟୁର ଗୁଣବତ୍ତା ସାଂଘାତିକ ସ୍ତରକୁ ଖସି ଯାଇଛି। ଏବେ ଦିଲ୍ଲୀର ଏକାଧିକ ଅଞ୍ଚଳରେ ବାୟୁର ଗୁଣବତ୍ତା ସୂଚକାଙ୍କ (ଏକ୍ୟୁଆଇ) ୪୦୦ ଉପରେ ରହିଛି । ବାୟୁ ଗୁଣବତ୍ତା ପରିଚାଳନା କମିଶନ ଏହାକୁ ନେଇ ଚିନ୍ତା ପ୍ରକଟ କରିବା ସହ ଆସନ୍ତାକାଲି ସୁଦ୍ଧା ସ୍ଥିତିରେ ସୁଧାର ଆସିବ ବୋଲି ଆଶା କରିଛନ୍ତି । କିନ୍ତୁ ବାୟୁର ଗୁଣବତ୍ତା ସୂଚକାଙ୍କ ଦୃଷ୍ଟିରେ ରଖି କମିଶନ କିଛି କଠୋର ନିଷ୍ପତ୍ତି ନେଇଛନ୍ତି । ଆସନ୍ତାକାଲି ସକାଳ ୮ଟାରୁ ନିୟମକୁ କଡ଼ାକଡ଼ି ପାଳନ କରିବାକୁ କହିଛନ୍ତି।
ଦେଶର ରାଜଧାନୀରେ ଭୟଙ୍କର ପ୍ରଦୂଷଣକୁ ନଜରରେ ରଖି ଗୁରୁବାର ପାଖରୁ ପ୍ରଥମରୁ ପଞ୍ଚମ ଶ୍ରେଣୀର ପାଠପଢ଼ା ଅନଲାଇନ୍ରେ ହେବ । ଅନଲାଇନ୍ରେ ପଢ଼ିବେ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀ । ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଦିଲ୍ଲୀର ସବୁ ପ୍ରାଥମିକ ସ୍କୁଲର ପିଲାମାନେ ଅନଲାଇନ୍ କ୍ଲାସ ମାଧ୍ୟମରେ ପଢ଼ିବେ ବୋଲି ମୁଖ୍ୟମନ୍ତ୍ରୀ ଆତିଶୀ ଏକ୍ସରେ ସୂଚନା ଦେଇଛନ୍ତି । ଏହା ସହ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ପ୍ରାଥମିକ ବିଦ୍ୟାଳୟ ବନ୍ଦ ନେଇ ଗୁରୁବାର ବିଜ୍ଞପ୍ତି ପ୍ରକାଶ ପାଇଛି । ଦିଲ୍ଲୀରେ ଗ୍ରାପ୍-୩ କଟକଣା ଜାରି ହେବା ପରେ ସ୍କୁଲ ବନ୍ଦ ନିଷ୍ପତ୍ତି ନେଇଛନ୍ତି ସରକାର ।
ଦିଲ୍ଲୀରେ ବାୟୁ ପ୍ରଦୂଷଣ ଅତି ସଙ୍ଗୀନ ସ୍ଥିତିରେ ପହଞ୍ଚିଛି । ଦିଲ୍ଲୀର ଏକ୍ୟୁଆଇ ସ୍ତର ଗୁରୁବାର ୪୦୦ ପାର୍ କରିଛି । ପ୍ରଦୂଷଣର ଏହି ସ୍ତରକୁ ଦେଖି ବାୟୁ ଗୁଣବତ୍ତା ପ୍ରବନ୍ଧନ ଆୟୋଗ ନଭେମ୍ୱର ୧୫ରୁ ଗ୍ରାପ୍-୩ ଲାଗୁ କରିବା ପାଇଁ ନିଷ୍ପତ୍ତି ନେଇଛନ୍ତି । ଫଳରେ ଦିଲ୍ଲୀରେ ସମସ୍ତ ପ୍ରକାର ନିର୍ମାଣ କାର୍ଯ୍ୟ ବନ୍ଦ ରହିବ । ବିଲ୍ଡିଂ ଏବଂ ଘର ଭଙ୍ଗାରୁଜା, ଖନନ ସହ ସମସ୍ତ ପ୍ରକାର ଗତିବିଧି ବନ୍ଦ ରହିବ । ନଭେମ୍ୱର ୧୪ରେ ଦିଲ୍ଲୀର ଏକ୍ୟୁଆଇ ସକାଳ ୪୨୮ ଥିଲା । ଏହା ସହ,ଚଳିତ ବର୍ଷରେ ପ୍ରଥମ ଥର ଦିଲ୍ଲୀର ବାୟୁ ପ୍ରଦୂଷଣ ଭୟଙ୍କର ଶ୍ରେଣୀରେ ସାମିଲ ହୋଇଛି ।
