ନୂଆଦିଲ୍ଲୀ,୨୫/୦୭: ମଣିପୁରରେ ବଢିଲା ରାଷ୍ଟ୍ରପତି ଶାସନ । ଆହୁରି ୬ ମାସ ଉତ୍ତରପୂର୍ବ ରାଜ୍ୟ ମଣିପୁରରେ ରାଷ୍ଟ୍ରପତି ଶାସନକୁ ବଢାଇ ଦିଆଯାଇଛି । କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହ ଏ ନେଇ ରାଜ୍ୟସଭାରେ ଏକ ପ୍ରସ୍ତାବ ଆଣିଥିଲେ । ସଂସଦରେ ଏହି ପ୍ରସ୍ତାବକୁ ମଞ୍ଜୁରୀ ମିଳିଛି । ଅଗଷ୍ଟ ୧୩ରୁ ଏହା ଲାଗୁ ହେବ । ଚଳିତବର୍ଷ ପ୍ରଥମେ ଫେବୃଆରୀ ୧୩ରେ ମଣିପୁରରେ ରାଷ୍ଟ୍ରପତି ଶାସନ ଲାଗୁ ହୋଇଥିଲା । ଲୋସସଭାରେ ପ୍ରସ୍ତାବ ପାରିତ ହେବା ପରେ ପୁଣି ରାଷ୍ଟ୍ରପତି ଶାସନକୁ ବଢାଇବାକୁ ନିର୍ଣ୍ଣୟ ନିଆଯାଇଛି ।
President's rule in Manipur has been extended for a period of six months, effective from August 13, 2025. pic.twitter.com/KK2QKk4F6F
— ANI (@ANI) July 25, 2025
ସଂସଦ ପକ୍ଷରୁ ଜାରି କରାଯାଇଥିବା ନୋଟିସ୍ରେ କୁହାଯାଇଛି କି, ସମ୍ବିଧାନ ଅନୁଚ୍ଛେଦ ୩୫୬ ଅଧୀନରେ ରାଷ୍ଟ୍ରପତିଙ୍କ ପକ୍ଷରୁ ମଣିପୁରରେ ୧୩ ଫେବୃଆରୀ ୨୦୨୫ରେ ଜାରି ହୋଇଥିବା ରାଷ୍ଟ୍ରପତି ଶାସକୁ ଆହୁରି ୬ ମାସ ବଢାଯାଉଛି । ଅଗଷ୍ଟ ୧୩ ଯାଏ ଏହାକୁ ଜାରି ରଖିବାକୁ ସ୍ୱୀକୃତି ପ୍ରଦାନ କରାଯାଇଛି । କେନ୍ଦ୍ର ସରକାର ସମ୍ବିଧାନର ଧାରା ୩୫୬ ଅନୁଯାୟୀ ମଣିପୁରରେ ରାଷ୍ଟ୍ରପତି ଶାସନ ଲାଗୁ କରିଥିଲେ । ରାଷ୍ଟ୍ରପତି ଶାସନ ଅବଧିକୁ ଆହୁରି ୬ ମାସ ବଢାଯାଇଛି । ସଂସଦର ଅନୁମୋଦନ ପରେ ଏହାକୁ ପ୍ରତି ୬ ମାସରେ ବୃଦ୍ଧି ହୋଇଥାଏ, କିନ୍ତୁ ଏହାକୁ କେବଳ ୩ ବର୍ଷ ପାଇଁ ବୃଦ୍ଧି କରାଯାଇପାରିବ । ମଣିପୁରରେ ଅଗଷ୍ଟ ୧୩ରେ ରାଷ୍ଟ୍ରପତି ଶାସନକୁ ୬ ମାସ ପୂରଣ ହେବ । ଦେଶର ଗୋଟିଏ ରାଜ୍ୟରେ ରାଷ୍ଟ୍ରପତି ଶାସନ ପାଇଁ ସଂସଦର ଅନୁମତି ଜରୁରୀ । ପ୍ରତି ୬ ମାସରେ କେନ୍ଦ୍ର ସରକାର ସଂସଦର ଅନୁମତି ନେବା ନିହାତି ଦରକାର ।
୨୦୨୩ରୁ ଆରମ୍ଭ ହୋଇଥିଲା ହିଂସା- ୨୦୨୩ରୁ ମଣିପୁରରେ ହିଂସା ଆରମ୍ଭ ହୋଇଥିଲା । ହାଇକୋର୍ଟଙ୍କ ଆଦେଶ ବିରୋଧରେ ଏକ 'ଜନଜାତୀୟ ଏକଜୁଟତା ମାର୍ଚ୍ଚ' ଆୟୋଜିତ ହୋଇଥିଲା । ୨୦୨୫ ଫେବୃଆରୀ ୧୩ରେ ପ୍ରଥମ ଥର ରାଷ୍ଟ୍ରପତି ଶାସନ ଲାଗୁ ହୋଇଥିଲା । ରାଜ୍ୟରେ ଲମ୍ବା ସମୟରୁ ଜାରି ଜାତୀୟ ହିଂସା ଏବଂ ପ୍ରଶାସନିକ ବିଫଳତା ପାଇଁ ଏହି ନିଷ୍ପତ୍ତି ନିଆଯାଇଥିଲା । ରାଜ୍ୟରେ ଶାନ୍ତି ଓ ଆଇନ୍ କାନୁନ୍ ବ୍ୟବସ୍ଥାରେ ସ୍ଥିରତା ଆଣିବା ପ୍ରଚେଷ୍ଟାରେ ଲାଗିଛନ୍ତି ସରକାର ।
କାହିଁକି ଲାଗୁ ହୋଇଥିଲା ରାଷ୍ଟ୍ରପତି ଶାସନ ? ୨୦୨୩ ମସିହାରେ ମଣିପୁରରେ ହିଂସା ଦେଖାଯାଇଥିଲା। ୨୦୨୩ ମେ' ମାସରେ କୁକି ଏବଂ ମୈତେଇ ସମ୍ପ୍ରଦାୟ ମଧ୍ୟରେ ଜାତିଗତ ସଂଘର୍ଷ ଆରମ୍ଭ ହୋଇଥିଲା ଯାହା ଦିନକୁ ଦିନ ହିଂସାତ୍ମକ ରୂପ ନେଇଥିଲା । ଏହି ସଂଘର୍ଷରେ ୨୬୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା । ହଜାର ହଜାର ଲୋକ ବାସହରା ହୋଇଥିଲେ । ନିଜ ଭିଟାମାଟି ଛାଡି ଅନ୍ୟ ସ୍ଥାନକୁ ଯିବାକୁ ପଡିଥିଲା । ଏହି ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ନିରନ୍ତର ପ୍ରୟାସ ପରେ, ମଣିପୁର ମୁଖ୍ୟମନ୍ତ୍ରୀ ଏନ୍ ବୀରେନ ସିଂହ ୯ ଫେବୃଆରୀ ୨୦୨୫ରେ ଇସ୍ତଫା ଦେଇଥିଲେ । ଏହା ପରେ ୧୩ ଫେବୃଆରୀ ୨୦୨୫ରେ କେନ୍ଦ୍ର ସରକାର ରାଜ୍ୟ ବିଧାନସଭା ଭଙ୍ଗ କରିବାକୁ ନିଷ୍ପତ୍ତି ନେଇଥିଲେ । ଏହା ପରେ ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରାଯାଇଥିଲା ।
