ମୁମ୍ବାଇ: ପ୍ରସିଦ୍ଧ ଷ୍ଟାଣ୍ଡ-ଅପ୍ କମେଡିଆନ କୁନାଲ କାମରାଙ୍କ ବିବାଦୀୟ କମେଡି ଶୋ ସମ୍ପର୍କିତ ମାମଲାରେ ମୁମ୍ବାଇ ପୋଲିସ ଜଣେ ବ୍ୟାଙ୍କ କର୍ମଚାରୀଙ୍କୁ ସାକ୍ଷୀ ଭାବେ ସମନ କରିଛି। ଏହି ବ୍ୟାଙ୍କର ନଭି ମୁମ୍ବାଇର ଖାରଘରରେ ରହୁଥିବା ଜଣେ ୪୬ ବର୍ଷୀୟ ବ୍ୟକ୍ତି ବୋଲି ଜଣାପଡିଛି। ଯିଏ ତାମିଲନାଡୁ ଏବଂ କେରଳକୁ ୧୭ ଦିନିଆ ଛୁଟିରେ ଯାଇଥିଲେ। କିନ୍ତୁ ପୋଲିସର ସମନ ମିଳିବା ପରେ ତାଙ୍କୁ ନିଜ ଯାତ୍ରା ମଝିରେ ଛାଡି ମୁମ୍ବାଇ ଫେରିବାକୁ ପଡିଛି ବୋଲି ଜଣା ପଡିଛି।
କୁନାଲ କାମରାଙ୍କ ନୂଆ କମେଡି ସ୍ପେଶାଲ ଶୋ ‘ନୟା ଭାରତ’ ସହ ଏହି ଘଟଣା ଜଡିତ। ଏହି କମେଡି ଶୋ ରେ ସେ ମହାରାଷ୍ଟ୍ରର ଉପ-ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କୁ ‘ଗଦ୍ଦାର’ (ବିଶ୍ୱାସଘାତକ) ବୋଲି କହି ବ୍ୟଙ୍ଗ କରିଥିଲେ। ଏହା ପରେ ଶିବସେନା(ଶିନ୍ଦେ ଗୋଷ୍ଠୀ) କର୍ମୀମାନେ କାମରାଙ୍କ ଶୋ’ର ଭେନ୍ୟୁ ‘ହାବିଟାଟ ଷ୍ଟୁଡିଓ’ରେ ପଶି ଭଙ୍ଗାରୁଜା କରିଥିଲେ। ତେବେ ଏହି ଘଟଣା ସମ୍ପର୍କରେ ତଦନ୍ତ କରୁଥିବା ଖାର ପୋଲିସ ଉକ୍ତ ବ୍ୟାଙ୍କରଙ୍କୁ ସାକ୍ଷୀ ଭାବେ ଡାକିଥିଲା, ଯିଏ ଶୋ’ରେ ଉପସ୍ଥିତ ଥିଲେ।
ବ୍ୟାଙ୍କରଙ୍କ କହିବା ଅନୁଯାୟି, ସେ ଗତ ମାର୍ଚ୍ଚ ୨୧ରେ ଛୁଟିରେ ତାମିଲନାଡୁ ବୁଲିବାକୁ ଯାଇଥିଲେ। ଏବଂ ଏପ୍ରିଲ ୬ ତାରିଖରେ ଫେରିବାର ଯୋଜନା ରହିଥିଲା। କିନ୍ତୁ ମାର୍ଚ୍ଚ ୨୮ ତାରିଖରେ ପୋଲିସର ଫୋନ ଯୋଗେ ତାଙ୍କ ସହ ଯୋଗାଯୋଗ କରିଥିଲା। ଏହାପରେ ପୋଲିସ ତାଙ୍କୁ ମାର୍ଚ୍ଚ ୨୯ ତାରିଖରେ ହ୍ୱାଟ୍ସଆପ୍ ମାଧ୍ୟମରେ ଏକ ନୋଟିସ ପଠାଇବା ପରେ ସେ ତାମିଲନାଡୁରୁ ମୁମ୍ବାଇକୁ ଫେରିଥିଲେ। ନୋଟିସରେ ତାଙ୍କୁ ସିଆରପିସି ଧାରା ୧୭୯ ଅନୁସାରେ ମାର୍ଚ୍ଚ ୩୦ରେ ଖାର ଥାନାରେ ହାଜର ହେବାକୁ କୁହାଯାଇଥିଲା। ତେବେ ପରେ ପୋଲିସ ତାଙ୍କୁ ଜଣାଇଥିଲା ଯେ ତୁରନ୍ତ ଭିତ୍ତିରେ ତାଙ୍କ ଉପସ୍ଥିତି ଆବଶ୍ୟକ ନାହିଁ। କିନ୍ତୁ ଆବଶ୍ୟକ ହେଲେ ପୁନର୍ବାର ଡକାଯାଇପାରେ।
ଏହି ଅସୁବିଧା ପାଇଁ କୁନାଲ କାମରା ତାଙ୍କୁ ସାମାଜିକ ଗଣମାଧ୍ୟମ ଏକ୍ସ ପ୍ଲାଟଫର୍ମରେ ବ୍ୟାଙ୍କରଙ୍କୁ ଉଦ୍ଦେଶ୍ୟ କରି ଲେଖିଛନ୍ତି, “ମୋ ଶୋ’ରେ ଆସିଥିବା ଯୋଗୁଁ ଆପଣଙ୍କୁ ହୋଇଥିବା ଅସୁବିଧା ପାଇଁ ମୁଁ ଦୁଃଖିତ। ଦୟାକରି ମୋତେ ଇମେଲ କରନ୍ତୁ, ମୁଁ ଆପଣଙ୍କ ପରବର୍ତ୍ତୀ ଛୁଟି ଭାରତର ଯେକୌଣସି ସ୍ଥାନରେ ଆୟୋଜନ କରିବି।”
କାମରାଙ୍କ ବିରୋଧରେ ଏପର୍ଯ୍ୟନ୍ତ ତିନୋଟି ମାମଲା ରୁଜୁ ହୋଇଛି। ଖାର ପୋଲିସ ତାଙ୍କୁ ତିନି ଥର ସମନ ପଠାଇଥିଲେ ମଧ୍ୟ ସେ ଥାନାରେ ହାଜର ହୋଇନାହାନ୍ତି। ତେବେ ଗତ ମାର୍ଚ୍ଚ ୨୮ ତାରିଖରେ ମାଡ୍ରାସ ହାଇକୋର୍ଟ ତାଙ୍କୁ ଏପ୍ରିଲ ୭ ପର୍ଯ୍ୟନ୍ତ ଅନ୍ତରୀଣ ଗିରଫଦାରୀରୁ ବଞ୍ଚିବା ପାଇଁ ଜାମିନ ପ୍ରଦାନ କରିଛନ୍ତି।
