ସମ୍ବଲପୁର ୪।୬: ବରେଇପାଲି ଥାନା ଅଞ୍ଚଳର ଜଣେ ନାବାଳିକାକୁ ଦୁଷ୍କର୍ମ ଉଦ୍ୟମ ଅଭିଯୋଗରେ ପୁଲିସ କନେଷ୍ଟବଳ ବିରଞ୍ଚି ମୁଣ୍ଡା (୩୫) ଚାକିରିରୁ ବହିଷ୍କୃତ ହୋଇଛନ୍ତି। ସମ୍ବଲପୁର ଏସପି ମୁକେଶ ଭାମୁ ଏପରି ପଦକ୍ଷେପ ନେଇଛନ୍ତି । ବିରଞ୍ଚି ଓଏସଏଫର କନେଷ୍ଟବଳ ଭାବରେ ବରେଇପାଲି ଥାନାରେ ନିୟୋଜିତ ଥିଲେ। ଆଦିବାସୀପଡ଼ାର ଜଣେ ୧୪ ବର୍ଷିୟ ନାବାଳିକାଙ୍କ ସହିତ ଦୁଷ୍କର୍ମ ଉଦ୍ୟମ କରିଥିଲେ। ଏନେଇ ବରେଇପାଲି ଥାନାରେ ଲିଖିତ ଅଭିଯୋଗ ହୋଇଥିଲା। ଏହାର ତଦନ୍ତ ହେବା ପରେ କେସ ନଂ ୯୬/୨୫ରେ ମାମଲା ରୁଜୁ ହୋଇ ଅଭିଯୁକ୍ତକୁ ଗିରଫ କରାଯାଇଥିଲା। ଆଜି ତାଙ୍କୁ ଏସପିଙ୍କ ନିର୍ଦେଶ କ୍ରମେ ତାଙ୍କୁ ବହିଷ୍କାର କରାଯାଇଛି।
ମିଳିଥିବା ସୂଚନା ଅନୁଯାୟୀ, ବିରଞ୍ଚି ନାବାଳିକାକୁ ରବିବାର ଶୀତଳଷଷ୍ଠୀ ଯାତ୍ରା ଦେଖାଇ ନେବା ବାହାନାରେ ନିଛାଟିଆ ସ୍ଥାନକୁ ନେଇ ଯାଇଥିଲା। ପୀଡ଼ିତା ନାବାଳିକା ଜଣକ ଉପସ୍ଥିତ ବୁଦ୍ଧି ଲଗାଇ ଘଟଣାସ୍ଥଳରୁ ଖସି ଚାଲି ଆସିଥିଲେ। ଅଭିଯୁକ୍ତ ଜଣକ ପୀଡ଼ିତାଙ୍କ ସମ୍ପର୍କୀୟ ହେବେ। ସେଠାରେ ଅଭିଯୁକ୍ତ ପୁଲିସ କନେଷ୍ଟବଳ ଜଣକ ଝିଅ ସହିତ ଦୁଷ୍କର୍ମ ଉଦ୍ୟମ କରିଥିଲା। ଏହି ସମ୍ପର୍କରେ ଜଣାପଡ଼ିବା ପରେ ଆଦିବାସୀପଡ଼ାରେ ଉତ୍ତେଜନା ଦେଖା ଦେଇଥିଲା । ପରିବାର ସହିତ ସ୍ଥାନୀୟ ପଡ଼ାବାସୀ ଥାନାକୁ ଯାଇ ଏତଲା ଦେଇଥିଲେ। କିନ୍ତୁ ପ୍ରଥମେ ସମ୍ବଲପୁର ପୁଲିସ ଘଟଣାକୁ ଚାପି ଦେବାକୁ ଉଦ୍ୟମ କରୁଥିବା ଅଭିଯୋଗ ହୋଇଥିଲା । ବାରମ୍ବାର ଚାପ ପଡିବା ପରେ ପୁଲିସ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ।
