ନୂଆଦିଲ୍ଲୀ,୫।୫: ଜମ୍ମୁ-କଶ୍ମୀରର ପହଲଗାମ୍ରେ ୨୨ ଏପ୍ରିଲରେ ହୋଇଥିବା ଭୀଷଣ ଆତଙ୍କୀ ହମଲା ପରେ ଆକ୍ସନରେ କେନ୍ଦ୍ରର ମୋଦି ସରକାର। ନିକଟରେ ପ୍ରଧାନମନ୍ତ୍ରୀଙ୍କୁ ଭେଟିଥିଲେ ବାୟୁସେନା ମୁଖ୍ୟ। ଏବେ ପୁଣିଥରେ ପିଏମ୍ଙ୍କୁ ଭେଟିଛନ୍ତି ପ୍ରତିରକ୍ଷା ସଚିବ ରାଜେଶ କୁମାର ସିଂହ। ଏକ ଉଚ୍ଚସ୍ତରୀୟ ବୈଠକରେ ସ୍ଥିତି ସମୀକ୍ଷା କରିଛନ୍ତି। ପ୍ରଧାନମନ୍ତ୍ରୀ ମୋଦିଙ୍କ ଏହି ବୈଠକକୁ ନେଇ ସଙ୍କେତ ମିଳୁଛି ଯେ, ଭାରତ କଡା କାର୍ଯ୍ୟାନୁଷ୍ଠାନ ନେବା ଦିଗରେ ବଢୁଛି।
ଜମ୍ମୁ-କଶ୍ମୀରର ପହଲଗାମ୍ରେ ୨୨ ଏପ୍ରିଲରେ ହୋଇଥିବା ଭୀଷଣ ଆତଙ୍କୀ ହମଲାରେ ୨୬ ନିର୍ଦୋଷୀ ନାଗରିକଙ୍କ ଜୀବନ ଯାଇଥିଲା। ଏହି ଆକ୍ରମଣ ସାରାଦେଶକୁ ଶୋକରେ ବୁଡାଇ ଦେଇଥିଲା। ଆକ୍ରମଣ ପରେ ପୁରା ବିଶ୍ବରେ ଆତଙ୍କବାଦକୁ ବିରୋଧ କରି ଭାରତକୁ ସମର୍ଥନ କରାଯାଇଥିଲା। ଏଥିରେ ଇସ୍ରାଏଲ, ଆମେରିକା ଓ ଋଷ ମଧ୍ୟ ଥିଲେ। ପହଲଗାମ୍ ଆତଙ୍କୀ ଆକ୍ରମଣରେ ପାକିସ୍ତାନ ସମର୍ଥିତ ଆତଙ୍କବାଦୀଙ୍କ କାର୍ଯ୍ୟକଳାପ ଏବେ ସାମନାକୁ ଆସିଛି।
ଏହାପରେ ପିଏମ୍ ମୋଦି ନିକଟରେ ପହଲଗାମ୍ ଆତଙ୍କୀ ହମଲା ପରେ ଭାରତୀୟ ବାୟୁସେନା ମୁଖ୍ୟଙ୍କ ସହିତ ତିନି ସେନା ମୁଖ୍ୟଙ୍କ ସହ ଉଚ୍ଚସ୍ତରୀୟ ବୈଠକ କରିଛନ୍ତି। ଏହି ବୈଠକ ୨୯ ଏପ୍ରିଲ ୨୦୨୫ ରେ ହୋଇଥିଲା। ଏଥିରେ ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ, ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଓ ଚିଫ୍ ଅଫ୍ ଡିଫେନ୍ସ ଷ୍ଟାଫ୍ ଜେନେରାଲ ଅନିଲ ଚୌହାନ ମଧ୍ୟ ଉପସ୍ଥିତ ଥିଲେ। ବୈଠକରେ ପିଏମ୍ ମୋଦି ସେନାକୁ ସମ୍ପୂର୍ଣ୍ଣ କ୍ଷମତା ପ୍ରଦାନ କରିଥିଲେ।
