ନୂଆପଡ଼ା, ୨୭।୫ : ନୂଆପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ସର୍ଟ ସର୍କିଟ୍ରୁ ଜଳିଗଲା ପେନାଲ ବକ୍ସ। ୨ ଘଣ୍ଟା ହେଲା ଅନ୍ଧାରରେ ମାତୃ ଏବଂ ଶିଶୁ ବିଭାଗ। ମଙ୍ଗଳବାର ଦିନ ୧୧ଟାରେ ଜିଲ୍ଲା ମୁଖ୍ୟ ଚିକିତ୍ସାଳୟ ପେନାଲ ବକ୍ସରେ ହଠାତ୍ ନିଆଁ ଲାଗି ଯାଇଥିଲା। ଖବର ପାଇ ହସ୍ପିଟାଲ କର୍ତ୍ତୃପକ୍ଷ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି।
ପେନାଲ ବକ୍ସ ଜଳିଯିବାରୁ ମାତୃ ଏବଂ ଶିଶୁ ବିଭାଗରେ ଦୁଇ ଘଣ୍ଟା ହେଲା ବିଦ୍ୟୁତ୍ ସରବରାହ ବିଚ୍ଛିନ୍ନ ରହିଛି। ଫଳରେ ୱାର୍ଡରେ ଥିବା ଗର୍ଭବତୀ, ପ୍ରସୂତୀ ଏବଂ ନବଜାତ ଶିଶୁ ହନ୍ତସନ୍ତ ହେଉଛନ୍ତି। ସେପଟେ ହସ୍ପିଟାଲ କର୍ତ୍ତୃପକ୍ଷ ପେନାଲ ବକ୍ସକୁ ମରାମତି କରୁଛନ୍ତି। ଆହୁରି ଘଣ୍ଟାଏ ପରେ ବିଦ୍ୟୁତ୍ ସଂଯୋଗ ସ୍ଵାଭାବିକ ହେବ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି।
