ଇସଲାମାବାଦ, ୧୭।୧: ସାଧାରଣତଃ ବିଲେଇ, କୁକୁର, ମାଙ୍କଡ଼ ଆଦି ପୋଷା ଜୀବଜନ୍ତୁ ଭାବେ ଘରେ ପାଳୁଥିବାର ଆମେ ଦେଖିଛେ । କିନ୍ତୁ, ଏକ ଏଭଳି ଦେଶ ରହିଛି, ଯେଉଁଠାରେ ବନ୍ୟପ୍ରାଣୀଙ୍କୁ ଘରେ ପୋଷା ଭାବେ ପାଳିବାକୁ ଅନୁମତି ଦେଇଛି । ଏଭଳି ଅଜବ ନିୟମ ଜାରି କରିଛି ପଡ଼ୋଶୀ ଦେଶ ପାକିସ୍ତାନ । ଏବେ ସିଂହ, ଚିତାବାଘ, ବାଘ ସମେତ ୫ଟି ବନ୍ୟଜନ୍ତୁଙ୍କୁ ଘରେ ରଖିବାକୁ ମିଳିଲା ଆଇନଗତ ସ୍ୱୀକୃତି । ନୂଆ ଆଇନ ଅନୁଯାୟୀ, ଘରେ ବନ୍ୟପ୍ରାଣୀ ରଖିବାକୁ ହେଲେ ପ୍ରଥମେ ଲାଇସେନ୍ସ ତିଆରି କରିବାକୁ ହେବ । ଏଥିପାଇଁ ଦେବାକୁ ପଡ଼ିବ ୫୦ ହଜାର ଟଙ୍କା । କେଉଁ ଦେଶରେ ଏହି ନିୟମ ଲାଗୁ ହୋଇଛି ଆସନ୍ତୁ ଜାଣିବା ।
ନୂଆ ନିୟମ ଅନୁଯାୟୀ, ପାକିସ୍ତାନ ଲୋକ ଏବେ ଘରେ ବାଘ, ଚିତାବାଘ ଓ ସିଂହ ଆଦି ବନ୍ୟ ଜୀବଜନ୍ତୁକୁ ପୋଷା ଭାବେ ରଖିପାରିବେ । ଏହି ନିୟମ ପାକିସ୍ତାନର ପଞ୍ଜାବରେ ଲାଗୁ ହୋଇଛି । କ୍ୟାବିନେଟ୍ରେ ବନ୍ୟଜୀବ ଅଧିନିୟମ ୧୯୭୪ରେ ସଂଶୋଧନ ପରେ ଏହି ନିୟମ ଜାରି ହୋଇଛି । ଏହି ୫ଟି ବନ୍ୟଜନ୍ତୁଙ୍କ ମଧ୍ୟରେ ବାଘ, ଚିତାବାଘ, ସିଂହ, ପ୍ୟୁମା, ଜାଗୁଆର ଆଦି ପଶୁଙ୍କୁ ଘରେ ପୋଷା ଭାବେ ରଖିପାରିବେ । ପଞ୍ଜାବ ପ୍ରାନ୍ତର ବରିଷ୍ଠ ମନ୍ତ୍ରୀ ମରିୟମ୍ ଔରଙ୍ଗଜେବଙ୍କ କହିବାନୁସାରେ, ଗତ ୭୦ ବର୍ଷରେ ଏହି ବନ୍ୟଜନ୍ତୁଙ୍କୁ ପୋଷା ଭାବେ ରଖିବାକୁ କୌଣସି ଆଇନ ନଥିଲା । ଲୋକେ ବେଆଇନ ଭାବେ ରଖୁଥିଲେ । ସରକାର ଟିକଟକ୍ ଓ ଅନ୍ୟ ସୋସିଆଲ ମିଡିଆରେ ପ୍ଲାର୍ଟଫର୍ମ ଏହି ବନ୍ୟଜନ୍ତୁଙ୍କର ଫଟୋ ଓ ଭିଡିଓ ଦେଖାଇବା ଉପରେ ମଧ୍ୟ ପ୍ରତିବନ୍ଧକ ଲାଗୁ ହୋଇଥିଲା । ନିୟମ ଉଲଙ୍ଘନ କଲେ କଡ଼ା କାର୍ଯ୍ୟାନୁଷ୍ଠାନ ମଧ୍ୟ ନିଆଯାଉଥିଲା ।
ବର୍ତ୍ତମାନ ପାକିସ୍ତାନ ବନ୍ୟପ୍ରାଣୀ ବିଭାଗ ଏହି ପ୍ରାଣୀମାନଙ୍କୁ ଘରେ ରଖିବା ପାଇଁ ଲାଇସେନ୍ସ ଦେବ । ତେବେ ପ୍ରତି ବନ୍ୟଜନ୍ତୁଙ୍କ ପାଇଁ ୫୦ ହଜାର ଟଙ୍କା ଦେବାକୁ ପଡ଼ିବ । ଏପରି ପ୍ରାଣୀମାନଙ୍କୁ ଘରେ ରଖିବା ପାଇଁ କିଛି ନିୟମ ମଧ୍ୟ ସ୍ଥିର କରାଯାଇଛି । ନୂତନ ଆଇନ ଅନୁଯାୟୀ, ଗୁରୁତ୍ୱପୂର୍ଣ୍ଣ ସ୍ଥାନରେ ଚେକ୍ପୋଷ୍ଟ ସ୍ଥାପନ କରାଯିବ ଏବଂ ରାତିରେ ଏହି ପ୍ରାଣୀମାନଙ୍କୁ ବୁଲାଇବା ସମ୍ପୂର୍ଣ୍ଣ ନିଷେଧ କରାଯିବ । ସିଂହ ପାଳନ କ୍ଷେତ୍ରରେ ପାକିସ୍ତାନକୁ ସର୍ବୋତ୍ତମ ବୋଲି ବିବେଚନା କରାଯାଏ । ରାଜନେତାଙ୍କଠାରୁ ଆରମ୍ଭ କରି ବଡ଼ ବଡ଼ ବ୍ୟକ୍ତିବିଶେଷ ସିଂହ ସହ ସେମାନଙ୍କ ଫଟୋ ପୋଷ୍ଟ କରୁଛନ୍ତି । ତେବେ ବର୍ତ୍ତମାନ ଏମାନଙ୍କୁ ପୋଷା ଭାବେ ରଖିବାକୁ ହେଲେ ଟଙ୍କା ଦେବାକୁ ପଡ଼ିବ ।
