ନୂଆଦିଲ୍ଲୀ ,୧୭/୦୧:ମରକ୍କୋରେ ଅଘଟଣ। ସ୍ପେନ ଯାଉଥିବା ବେଳେ ଓଲଟିଲା ଡ଼ଙ୍ଗା । ଫଳରେ ୪୦ରୁ ଅଧିକ ପାକିସ୍ତାନୀଙ୍କ ମୃତ୍ୟୁ ହୋଇଥିବା ଜଣାପଡିଛି । ସେହିପରି ୫୦ ରୁ ଅଧିକ ପ୍ରବାସୀ ବୁଡ଼ିଥିବା ଆଶଙ୍କା କରାଯାଉଛି। ଏନେଇ ଅଧିକାରୀମାନେ ଗତକାଲି ଅର୍ଥାତ ଗୁରୁବାର ଦିନ ସୂଚନା ଦେଇଛନ୍ତି ।
ସୂଚନା ଅନୁଯାୟୀ, ଏକ ଡ଼ଙ୍ଗାରେ ୮୦ ଜଣ ପ୍ରବାସୀ ସ୍ପେନ୍ ଯିବାକୁ ଚେଷ୍ଟା କରୁଥିଲେ । ହେଲେ ଡ଼ଙ୍ଗାଟି ଭାରସାମ୍ୟ ହରାଇ ମରକ୍କୋରେ ଓଲଟି ପଡିଥିଲା । ଫଳରେ ୪୦ରୁ ଅଧିକ ପାକିସ୍ତାନୀ ନାଗରିକଙ୍କ ମୃତ୍ୟୁ ହୋଇଥିବା ଆଶା କରାଯାଉଛି। ସେହି ଏହି ଡଙ୍ଗା ବୁଡ଼ିବାର ଗୋଟିଏ ଦିନ ପୂର୍ବରୁ ମରକ୍କୋ କର୍ତ୍ତୃପକ୍ଷ ଏକ ଡଙ୍ଗାରୁ ୩୬ ଜଣଙ୍କୁ ଉଦ୍ଧାର କରିଥିଲେ । ଯାହା ଜାନୁଆରୀ ୨ ତାରିଖରେ ୮୬ ଜଣ ପ୍ରବାସୀଙ୍କୁ ନେଇ ଡଙ୍ଗାଟି ମୌରିଟାନିଆରୁ ବାହାରିଥିଲା । ଏହି ପ୍ରବାସୀମାନଙ୍କ ମଧ୍ୟରେ ୬୬ ଜଣ ପାକିସ୍ତାନୀ ମଧ୍ୟ ଥିଲେ । ୱାକିଂ ବର୍ଡରର ସିଇଓ ସୋସିଆଲ ମିଡିଆରେ ସୂଚନା ଦେଇଛନ୍ତି ଯେ ବୁଡ଼ି ଯାଇଥିବା ଲୋକଙ୍କ ମଧ୍ୟରୁ ୪୪ ଜଣ ପାକିସ୍ତାନର ଥିଲେ ।
ଏହି ଘଟଣା ଉପରେ ପାକିସ୍ତାନ ବୈଦେଶିକ କାର୍ଯ୍ୟାଳୟ ଏକ ବିବୃତ୍ତି ଜାରି କରି କହିଛି ଯେ, ମରକ୍କୋରେ ଥିବା ଏହାର ଦୂତାବାସ ଉଦ୍ଧାର କାର୍ଯ୍ୟରେ ସହାୟତା କରିବା ପାଇଁ ସ୍ଥାନୀୟ କର୍ତ୍ତୃପକ୍ଷଙ୍କ ସହ ନିରନ୍ତର ଯୋଗାଯୋଗରେ ଅଛି। ଏହା ସହିତ, ମରକ୍କୋରେ ଥିବା ପାକିସ୍ତାନୀ ଦୂତାବାସର ଏକ ଦଳକୁ ପାକିସ୍ତାନୀ ନାଗରିକମାନଙ୍କୁ ସାହାଯ୍ୟ କରିବା ଏବଂ ଆବଶ୍ୟକୀୟ ସହାୟତା ଯୋଗାଇବା ପାଇଁ ପଠାଯାଇଛି।
