ନୂଆଦିଲ୍ଲୀ, ୧୭/୦୧ : ଜେଲ୍ରେ ଥିବା ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମରାନ ଖାନଙ୍କୁ ଝଟ୍କା। ଅଲକାଦିର ଟ୍ରଷ୍ଟ ଭ୍ରଷ୍ଟାଚାର ମାମଲାରେ ୧୪ ବର୍ଷ ସଜା ଶୁଣାଇଲେ ପାକିସ୍ତାନର ଏକ ଅଦାଲତ। ଏହି ମାମଲାରେ ଇମରାନଙ୍କ ପତ୍ନୀ ବୁଶରା ବିବିଙ୍କୁ ମଧ୍ୟ ୭ ବର୍ଷ ଜେଲ୍ ଦଣ୍ଡାଦେଶ ହୋଇଛି। ଏତଦ୍ ବ୍ୟତୀତ ଇମରାନଙ୍କୁ ୧୦ ଲକ୍ଷ ଏବଂ ତାଙ୍କ ପତ୍ନୀଙ୍କୁ ୫ ଲକ୍ଷ ଟଙ୍କାର ଜରିମାନା ନିର୍ଦ୍ଦେଶ ଦେଇଛନ୍ତି। ଏହି ଜରିମାନା ଦେୟ ନହେଲେ ତାହେଲେ ଇମରାନଙ୍କୁ ୬ ମାସ ଏବଂ ବୁଶରାଙ୍କୁ ୩ ମାସ ଅତିରିକ୍ତ ଜେଲଦଣ୍ଡ ଭୋଗିବାକୁ ପଡ଼ିବ।
ଏହି ଖବରଟିକୁ ପଢନ୍ତୁ-ବହୁ ପ୍ରତୀକ୍ଷିତ ଆର ଜି କର ମାମଲାରେ ଶନିବାର ଆସିବ ରାୟ, ଦୋଷୀ ପାଇଁ ମୃତ୍ୟୁଦଣ୍ଡ ମାଗିଲା ସିବିଆଇ
ସୂଚନାନୁଯାୟୀ, ୨୦୨୩ ଅଗଷ୍ଟ ମାସରୁ ଇମରାନ ଖାନ ରାୱଲପିଣ୍ଡି ଜେଲ୍ରେ ବନ୍ଦୀ ଅଛନ୍ତି। ସରକାରୀ ଉପହାର ବିକ୍ରି, ସରକାରୀ ଗୁପ୍ତ ତଥ୍ୟ ଲିକ୍, ଏବଂ ବେଆଇନ ବିବାହ ସହ ଜଡ଼ିତ ତିନୋଟି ମାମଲାରେ ସେ ଦୋଷୀ ସାବ୍ୟସ୍ତ ହୋଇଛନ୍ତି। ତେବେ ଅଲକାଦିର ଟ୍ରଷ୍ଟ ମାମଲାରେ ପାକିସ୍ତାନୀ ଅଦାଲତ ୨୦୨୪ ଡିସେମ୍ଵର ମାସରେ ରାୟ ସଂରକ୍ଷିତ ରଖିଥିଲେ। ତେବେ ଆଜି ରାୟ ଆସିବା ପରେ ଇମରାନଙ୍କୁ ପୁଣି ଝଟ୍କା ଲାଗିଛି। ତାଙ୍କ ପତ୍ନୀ ବୁଶରା ବିବିଙ୍କୁ ହେପାଜତରେ ନିଆଯାଇଛି। ଅଲକାଦିର ୟୁନିଭରସିଟି ସହ ଜଡ଼ିତ ଏହି ପ୍ରୋଜେକ୍ଟରେ ୧୯୦ ମିଲିୟନ ପାଉଣ୍ଡର ଭ୍ରଷ୍ଟାଚାର ଅଭିଯୋଗ ହୋଇଥିଲା।
ଇମରାନଙ୍କ ବିରୋଧରେ ଅଭିଯୋଗ ରହିଛି ଯେ, ସେ ପ୍ରଧାନମନ୍ତ୍ରୀ ଥିବା ସମୟରେ ତାଙ୍କ ପତ୍ନୀ ବୁଶରା ବିବି ଏବଂ ପିଟିଆଇର କିଛି ନେତାଙ୍କ ସହ ମିଶି ଅଲକାଦିର ୟୁନିଭରସିଟି ପ୍ରୋଜେକ୍ଟ ଟ୍ରଷ୍ଟ ଗଠନ କରିଥିଲେ। ଏହି ବିଶ୍ଵବିଦ୍ୟାଳୟ ପାଇଁ ଇମରାନ ଏବଂ ତାଙ୍କ ପତ୍ନୀ ରେସିଡେନସିଆଲ କମ୍ପ୍ଲେକ୍ସର ଏକ ଜାଗା ବେଆଇନ ଭାବେ ହଡ଼ପ କରି ନେଇଥିଲେ। ଏଥିପାଇଁ ଦୁହେଁ ପାକିସ୍ତାନର ଜଣେ ଧନୀ ବ୍ୟକ୍ତି ମଲିକ ରିୟାଜଙ୍କୁ ଧମକ ଦେଇଥିଲେ। ଏତଦ୍ ବ୍ୟତୀତ ଇମରାନ, ତାଙ୍କ ପତ୍ନୀ ଏବଂ ପିଟିଆଇର କିଛି ନେତାଙ୍କ ବିରୋଧରେ ରାଜକୋଷରୁ ୫୦ ଅରବ ଆତ୍ମସାତ୍ କରିଥିବା ଅଭିଯୋଗ ରହିଛି।
