ମୋହନା,୨୫/୧୧: ଗଜପତି ଜିଲ୍ଲାରେ ଜାରି ରହିଛି ଅପରେସନ ଗ୍ରୀନ କ୍ଲିନ୍ । ବିପୁଳ ପରିମାଣର ଗଞ୍ଜେଇ ଚାଷ ନଷ୍ଟ କରିଛି ପୋଲିସ ଓ ଅବକାରୀ ବିଭାଗ । ରବିବାର ମୋହନା ଥାନା ଜିରାଙ୍ଗ ପଞ୍ଚାୟତ ଜୁରାପେଟା ଗାଁ ନିକଟରେ ଚଢାଉ କରି ୬ କୋଟିରୁ ଅଧିକ ଟଙ୍କାର ଗଞ୍ଜେଇ ଚାଷ ନଷ୍ଟ କରାଯାଇଛି । 

ଜୁରାପେଟା ଗାଁ ନିକଟସ୍ଥ ଜମିରେ ବିପୁଳ ପରିମାଣର ଗଞ୍ଜେଇ ଚାଷ ହୋଇଥିବା ପୋଲିସ ସୂଚନା ପାଇଥିଲା । ସୂଚନା ପାଇ ଗଜପତି ଏସପିଙ୍କ ନର୍ଦ୍ଦେଶ କ୍ରମେ ଉକ୍ତ ସ୍ଥାନରେ ଚଢାଉ କରାଯାଇଥିଲା । ଏହି ଚଢାଉରେ ପ୍ରାୟ ୨୮ ଏକର ଜମିରେ ହୋଇଥିବା ବେଆଇନ ଗଞ୍ଜେଇ ଗଛକୁ କାଟି ପୋଡ଼ି ନଷ୍ଟ କରାଯାଇଛି । ଏହି ଚଢାଉରେ ପୋଲିସ, ଅବକାରୀ, ବନ ବିଭାଗ କର୍ମଚାରୀ ଓ ରାଜସ୍ୱ କର୍ମଚାରୀ ସାମିଲ ଥିଲେ । ଗତ ତିନି ଦିନ ମଧ୍ୟରେ ୩ ଟି ସ୍ଥାନରେ ଚଢ଼ାଉ କରି ୧୧୩ ଏକର ଜମିରେ ପ୍ରାୟ ୧୯ କୋଟି ଟଙ୍କାର ଗଞ୍ଜେଇ ଚାଷ ନଷ୍ଟ କରାଯାଇଛି  ।

ଶୁକ୍ରବାର କୁଟିମେରା ଗାଁ ନିକଟରେ ଚଢ଼ାଉ କରି ୪୨ ଏକର ଜମିରେ ୫ କୋଟି ଟଙ୍କାର ଗଞ୍ଜେଇ ଚାଷ ନଷ୍ଟ କରାଯାଇଥିଲା । ସେହିପରି ଶନିବାର ନାରଙ୍ଗି ଗାଁ ନିକଟରେ ଚଢ଼ାଉ କରି ୪୩ ଏକର ଜମିରେ ୮ କୋଟି ଟଙ୍କାର ଗଞ୍ଜେଇ ଚାଷ ନଷ୍ଟ କରିଛି ପୋଲିସ ଓ ଅବକାରୀ ବିଭାଗ ।