ଭୁବନେଶ୍ୱର,୦୪/୦୬: ରାଜ୍ୟରେ ୨ ଦିନରେ ୧୦ ଜଣଙ୍କର ମୃତ୍ୟୁ ହୋଇଛି । କୋରାପୁଟ ଲକ୍ଷ୍ମଣ ନାୟକ ମେଡିକାଲ କଲେଜରେ ଭୁଲ ଇଞ୍ଜେକ୍ସନ ଯୋଗୁଁ ୬ ଜଣଙ୍କର ମୃତ୍ୟୁ, ନବରଙ୍ଗପୁର ସେପ୍ଟିଟ୍ୟାଙ୍କରେ ୪ ଶ୍ରମିକଙ୍କ ମୃତ୍ୟୁ ଘଟଣାକୁ ନେଇ ରାଜ୍ୟ ସରକାରଙ୍କୁ ଟାର୍ଗେଟ କରିଛି । ସେମାନଙ୍କୁ କ୍ଷତିପୂରଣ ଦେବାକୁ କହିଛି । ଏହା ସହିତ ରାଇରଙ୍ଗପୁର ଏୟାରଷ୍ଟ୍ରିପ ପାଇଁ ଉଚ୍ଛେଦଙ୍କୁ ଥଇଥାନ କରିବା ସହ ୪୦ ଲକ୍ଷ ଓ ଦୁଇ ଗୁଣା ଜମି ଦେବାକୁ କହିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚଦ୍ର କାଡାମ ।
କଂଗ୍ରେସ ବିଧାୟକ ଦଳ ନେତା ରାମଚଦ୍ର କାଡାମ କହିଛନ୍ତି, ''ପେସା ନିୟମ କହୁଛି, ବିନା ପଲ୍ଲୀସଭାରେ କୌଣସି ଆଦିବାସୀ ବସ୍ତି ଉଚ୍ଛେଦ ହେବା କଥା ନୁହେଁ । ହେଲେ ରାଇରଙ୍ଗପୁର ରାଷ୍ଟ୍ରପତିଙ୍କ ଘର। ମୁଖ୍ୟମନ୍ତ୍ରୀଙ୍କ ଶ୍ୱଶୁର ଘର ହୋଇ ବି ରାଇରଙ୍ଗପୁର ଅଞ୍ଚଳରେ ଏକ ଏୟାରଷ୍ଟ୍ରିପ ନିର୍ମାଣ ପାଇଁ ବସ୍ତି ଉଚ୍ଛେଦ କରାଯାଇଛି। ୪୩ ପରିବାରକୁ ଉଚ୍ଛେଦ ହୋଇଛନ୍ତି । ସେଠାରେ ପଲ୍ଲିସଭା କରାଯାଇନି। ପେସା ଆଇନ ଲାଗୁ ହେଉନି। ଆନ୍ଦୋଳନ ହେଲା, କିଛି ଲାଭ ହେଲାନି। ଆଦିବାସୀ ବାସହରା ହେଲେ। ତେଣୁ ରାଜ୍ୟ ସରକାରଙ୍କ ପାଖରେ ଦାବି କରୁଛୁ, ଯେଉଁମାନଙ୍କ ଘର ଭାଙ୍ଗିଛି ସେମାନଙ୍କୁ ୪୦ ଲକ୍ଷ ଦିଅ । ଯେତିକି ଜାଗା ଯାଇଛି, ତାର ଦୁଇ ଗୁଣା ଜାଗା ଅନ୍ୟ ସ୍ଥାନରେ ଦିଆଯାଉ । ତାଙ୍କୁ ଥଇଥାନ କରାଯାଉ। ମାମଲା ପ୍ରତ୍ୟାହାର ହେଉ। ନଚେତ କଂଗ୍ରେସ ଆନ୍ଦୋଳନ କରିବ । ''
ସାମ୍ବାଦିକ ସମ୍ମିଳନୀରେ କାଡ଼ାମ ଆହୁରି କହିଛନ୍ତି, ''କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜରେ ଭୁଲ ଇଞ୍ଜେକ୍ସନ ଯୋଗୁଁ ୬ ଜଣଙ୍କ ଜୀବନ ଚାଲିଗଲା। ସେଠି ଆବଶ୍ୟକ ସଂଖ୍ୟାରେ ଡାକ୍ତର ନାହାନ୍ତି। ତେଣୁ ସରକାରଙ୍କ ଭୁଲ ପାଇଁ ନିରୀହ ଲୋକଙ୍କ ଜୀବନ ଗଲା । ପ୍ରତ୍ୟେକ କ୍ଷତିଗସ୍ତ ପରିବାରକୁ ୨୫ ଲକ୍ଷ ଟଙ୍କା ଦିଆଯାଉ। ଭୁଲ ଇଞ୍ଜେକ୍ସନ ଦେଇଥିବା ଅପରାଧୀଙ୍କୁ କଠୋର ଦଣ୍ଡ ଦିଆଯାଉ। ସେହିପରି ନବରଙ୍ଗପୁରରେ ପାଇଖାନାରେ ଟାଙ୍କି ସଫା କରିବାବେଳେ ୪ ଜଣ ଶ୍ରମିକଙ୍କର ମୃତ୍ୟୁ ହୋଇଥିଲା । ତାଙ୍କୁ ୨୫ ଲକ୍ଷ ଲେଖାଏଁ ସହାୟତା ପ୍ରଦାନ କରାଯାଉ ।'' ଏହି ସମ୍ମିଳନୀରେ ପିସିସି ସମ୍ପାଦକ ମୋହନ ହେମ୍ବ୍ରମ, ଅନିମା ମିଞ୍ଜ ଉପସ୍ଥିତ ଥିଲେ ।
