ଭୁବନେଶ୍ୱର ୨୩/୦୭: ଓଡ଼ିଶାର ବିଧାନସଭା ଅଧିବେଶନର ଦ୍ବିତୀୟ ଦିନ । ଆରମ୍ଭରୁ ଗୃହରେ ବିରୋଧୀ ଦଳର ଆକ୍ରମଣ। ପ୍ରଶ୍ନକାଳରେ ଗୃହ ଅଚଳ କଲେ ବିରୋଧୀ। ଗୃହ ମଧ୍ୟଭାଗରେ ବିଜେଡି ସଦସ୍ୟଙ୍କ ପ୍ରତିବାଦ ସହ ସରକାରଙ୍କୁ ଘେରି ଗଲେ । ରାଜ୍ୟପାଳଙ୍କ ପୁଅ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ପ୍ରତିବାଦ କରିଛନ୍ତି। ଫଳରେ ଦିନ ୧୧ଟା ୩୦ ଯାଏ ଗୃହ ମୁଲତବୀ ଘୋଷଣା କରିଛନ୍ତି ବାଚସ୍ପତି ସୁରମା ପାଢ଼ୀ। ସେହିପରି ବିଧାନସଭା ଅଧିବେଶନର ପ୍ରଥମ ଦିନରେ ରାଜ୍ୟପାଳ ରଘୁବର ଦାସଙ୍କ ଅଭିଭାଷଣ ବର୍ଜନ କରିଥିଲେ ବିରୋଧୀ । 

ତେବେ ଆଜି ଅଧିବେଶନର ଦ୍ବିତୀୟ ଦିନରେ ଗୃହ ସ୍ବଭାବିକ ଚାଲିବା ନେଇ ଆଶା କରାଯାଉଥିବା ବେଳେ ଆରମ୍ଭରୁ ଗୃହରେ ବିରୋଧୀ ଦଳର ଆକ୍ରମଣ ହୋଇଛି। ସୋମବାର ଏଏସଓଙ୍କୁ ମାଡ ମରା ଘଟଣା ଓ ଓଡିଆ ଅସ୍ମିତା ପ୍ରସଙ୍ଗ ଉଠାଇ ସରକାରଙ୍କୁ ଘେରିଥିଲା ଉଭୟ ବିଜେଡି ଓ କଂଗ୍ରେସ। ଏହାରି ମଧ୍ୟରେ ଦୃଷ୍ଟି ଆକର୍ଷଣ କରିଥଲେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଜ୍ୟପାଳଙ୍କ ଭାଷଣ ବେଳେ ହଠାତ୍ ନିଜର ଆସନରେ ଛିଡା ହୋଇଯାଇଥିଲେ ସେ । ରାଜ୍ୟପାଳଙ୍କ ପୁଅଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ। ଆଉ ତାଙ୍କୁ ସମର୍ଥ ଜଣାଇଥିଲା ବିଜେଡି ଓ କଂଗ୍ରେସ ।