ୱାଶିଂଟନ: ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବୁଧବାର ଦିନ ଚୀନ ସହିତ ଏକ ଗୁରୁତ୍ୱପୂର୍ଣ୍ଣ ବାଣିଜ୍ୟ ଚୁକ୍ତି ସମ୍ପନ୍ନ ହୋଇଥିବା ଘୋଷଣା କରିଛନ୍ତି। ଏହି ଚୁକ୍ତି ଅନୁଯାୟୀ, ଚୀନ ଆମେରିକାକୁ ମ୍ୟାଗନେଟ୍ ଏବଂ ଦୁର୍ଲଭ ଖଣିଜ ଯୋଗାଇବ ଏବଂ ଏହାର ବଦଳରେ ଆମେରିକା ଚୀନ ଛାତ୍ରମାନଙ୍କୁ ତା’ର କଲେଜ ଓ ବିଶ୍ୱବିଦ୍ୟାଳୟରେ ପ୍ରବେଶ ଅନୁମତି ଦେବ। ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ ସୋସିଆଲରେ ଲେଖିଛନ୍ତି, “ଆମେ ୫୫% ଟାରିଫ ପାଉଛୁ, ଚୀନ ୧୦% ପାଉଛି। ସମ୍ପର୍କ ଅତ୍ୟନ୍ତ ଉତ୍ତମ!”
ଏହି ଚୁକ୍ତି ଲଣ୍ଡନରେ ଦୁଇ ଦିନର ତୀବ୍ର ଆଲୋଚନା ପରେ ସମ୍ପନ୍ନ ହୋଇଛି। ଯାହା ଗତ ମାସରେ ଜେନେଭାରେ ହୋଇଥିବା ଏକ ପୂର୍ବ ଚୁକ୍ତିକୁ ଆହୁରି ମଜବୁତ କରିଛି। ତେବେ, ଟ୍ରମ୍ପ କହିଛନ୍ତି ଯେ ଏହି ଚୁକ୍ତି ତାଙ୍କ ଏବଂ ଚୀନର ରାଷ୍ଟ୍ରପତି ଶି ଜିନପିଙ୍ଗଙ୍କ ଅନ୍ତିମ ଅନୁମୋଦନ ଉପରେ ନିର୍ଭର କରୁଛି।
ହ୍ୱାଇଟ ହାଉସର ଜଣେ ଅଧିକାରୀଙ୍କ ମୁତାବକ, ଏହି ଚୁକ୍ତି ଅନୁଯାୟୀ ଆମେରିକା ଚୀନରୁ ଆମଦାନୀ ହେଉଥିବା ସାମଗ୍ରୀ ଉପରେ ୫୫% ଟାରିଫ ଲଗାଇବ। ଯେଉଁଥିରେ ୧୦% ବେସଲାଇନ “ପାଲଟା ଶୁଳ୍କ”, ୨୦% ଫେଣ୍ଟାନିଲ ଚୋରାଚାଲାଣ ପାଇଁ ଏବଂ ୨୫% ପୂର୍ବ-ବିଦ୍ୟମାନ ଟାରିଫ ଅନ୍ତର୍ଭୁକ୍ତ। ଅନ୍ୟପକ୍ଷରେ, ଚୀନ ଆମେରିକାରୁ ଆମଦାନୀ ହେଉଥିବା ସାମଗ୍ରୀ ଉପରେ ୧୦% ଟାରିଫ ଲଗାଇବ।
ଏହି ଚୁକ୍ତି ଦୁଇ ଦେଶ ମଧ୍ୟରେ ବାଣିଜ୍ୟ ଉତ୍ତେଜନା ହ୍ରାସ କରିବାରେ ସହାୟକ ହେବ ବୋଲି ଆଶା କରାଯାଉଛି। ଦୁର୍ଲଭ ଖଣିଜ ଇଲେକ୍ଟ୍ରୋନିକ୍ସ, ପ୍ରତିରକ୍ଷା ଉପକରଣ ଏବଂ ଇଲେକ୍ଟ୍ରିକ ଗାଡ଼ି ତିଆରିରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ତେବେ, କିଛି ରିପୋର୍ଟରେ ଦାବି କରାଯାଇଛି ଯେ ଚୀନର ଜିନଜିଆଙ୍ଗ ଅଞ୍ଚଳରେ ଖଣିଜ ଉତ୍ପାଦନରେ ବାଧ୍ୟତାମୂଳକ ଶ୍ରମ ବ୍ୟବହାର ହେଉଛି। ତେବେ ଏହି ଦାବିକୁ ଚୀନ ସରକାର ଅସ୍ୱୀକାର କରିବା ସହ ଖଣ୍ଡନ କରିଛନ୍ତି।
ଏହି ଚୁକ୍ତି ବିଶ୍ୱ ବାଣିଜ୍ୟରେ ଏକ ନୂଆ ଅଧ୍ୟାୟର ସୂଚନା ଦେଉଛି। ଯାହା ଆମେରିକା ଓ ଚୀନ ମଧ୍ୟରେ ଅର୍ଥନୈତିକ ସମ୍ପର୍କକୁ ଆହୁରି ଗଭୀର କରିପାରେ ବୋଲି ବିଶେଷଜ୍ଞମାନେ ମତ୍ତପ୍ରକାଶ କରିଛନ୍ତି।
