ନୂଆଦିଲ୍ଲୀ: ଉତ୍ତର ପ୍ରଦେଶର ମିରଟରେ ସ୍ବାମୀ ସୌରଭ ରାଜପୁତଙ୍କୁ ନିର୍ମମ ଭାବରେ ହତ୍ୟା କରିଥିବା ପତ୍ନୀ ମୁସ୍କାନ ଜେଲରେ ରାମାୟଣ ପଢ଼ୁଛି । ୧୪ ଦିନ ଧରି ଜେଲରେ ଥିବା ମୁସ୍କାନ ସବୁବେଳେ ଅସ୍ଥିର ରହୁଛି । ରାମାୟଣ ପଢି ସେ ନିଜ ଅସ୍ଥିରତାକୁ ଦୂର କରିବାକୁ ଚେଷ୍ଟା କରୁଥିବା ଜଣାପଡ଼ିଛି। ବୁଧବାର ତାକୁ ଭିଡିଓ କନଫରେନ୍ସିଂ ମାଧ୍ୟମରେ କୋର୍ଟରେ ହାଜର କରାଯାଇଥିଲା। ତା ସହିତ ପ୍ରେମିକ ସାହିଲ ମଧ୍ୟ କୋର୍ଟରେ ହାଜର ହୋଇଥିଲା। ଏହି ସମୟରେ, ଉଭୟ ପ୍ରାୟ ଅଢ଼େଇ ମିନିଟ୍ ପର୍ଯ୍ୟନ୍ତ ପରସ୍ପର ସାମ୍ନାରେ ରହିଥିଲେ। ଦୁହିଁଙ୍କ ମଧ୍ୟରେ କୌଣସି କଥାବାର୍ତ୍ତା ହୋଇନଥିଲା, କିନ୍ତୁ ଦୁହେଁ ଦୁହିଁଙ୍କୁ ଚାହିଁ ରହିଥିଲେ। ଶୁଣାଣି ସମୟରେ କୋର୍ଟ ଉଭୟଙ୍କୁ ୧୪ ଦିନ ପାଇଁ ନ୍ୟାୟିକ ହାଜତକୁ ପଠାଇ ଦେଇଛନ୍ତି।
ଏହା ପରେ ମୁସ୍କାନକୁ ମହିଳା ବାରାକକୁ ଏବଂ ସାହିଲକୁ ପୁରୁଷ ବାରାକକୁ ପଠାଯାଇଛି। ଏବେ ସେମାନଙ୍କୁ ୧୫ ଏପ୍ରିଲରେ ପୁଣି ଥରେ କୋର୍ଟରେ ହାଜର କରାଯିବ। ସୂଚନାଯୋଗ୍ୟ, ମିରଟର ସାଂସଦ ଏବଂ ରାମାୟଣ ଧାରାବାହିକରେ ରାମ ଭୂମିକାରେ ଅଭିନୟ କରିଥିବା ଅଭିନେତା ଅରୁଣ ଗୋଭିଲ ମିରଟ ଜେଲକୁ ଆସିଥିଲେ। ଏହି ସମୟରେ ସେ ସମସ୍ତ କଏଦୀଙ୍କୁ ଶ୍ରୀ ରାମ ଚରିତ ମାନସର ପ୍ରତିଲିପି ପ୍ରଦାନ କରିଥିଲେ। ଜେଲ୍ କର୍ତ୍ତୃପକ୍ଷଙ୍କ ଅନୁଯାୟୀ, ସେହି ଦିନଠାରୁ ମୁସ୍କାନ ବାରାକରେ ବସି ସବୁବେଳେ ରାମାୟଣ ପଢ଼ୁଛି।
ସେପଟେ ଗିରଫ ହେବା ପୂର୍ବରୁ ସାହିଲର ଦୁଇ ଫୁଟ ଲମ୍ବା କେଶ ଥିଲା। ସେ ଖୋସା କରିଥିଲା । କିନ୍ତୁ ବୁଧବାର ସେ କୋର୍ଟରେ ହାଜର ହେବା ସମୟରେ ତାର କେଶ ଛୋଟ ଦେଖାଯାଉଥିଲା। ମୁସ୍କାନ ତାର ନୂଆ ଲୁକ୍ ଦେଖି ଆଶ୍ଚର୍ଯ୍ୟ ହୋଇଯାଇଥିଲା। ଜେଲ୍ ଅଧିକାରୀଙ୍କ ଅନୁଯାୟୀ, ଦୁହେଁ ପରସ୍ପର ସହିତ କଥା ହୋଇନଥିଲେ କିନ୍ତୁ ଭିଡିଓ କନଫରେନ୍ସିଂ ସମୟରେ ବିଚାରପତିଙ୍କ ଦ୍ବାରା ପଚରାଯାଇଥିବା ପ୍ରଶ୍ନର ଉତ୍ତର ଦେଇଥିଲେ। ହାଜର ସମୟରେ ଜେଲ୍ ଅଧୀକ୍ଷକ ବୀରେଶ ରାଜ ଶର୍ମା ଏବଂ ସୁରକ୍ଷା ଅଧିକାରୀ କୋଠରୀରେ ଉପସ୍ଥିତ ଥିଲେ। ସେମାନଙ୍କ ବ୍ୟତୀତ, ମୁସ୍କାନଙ୍କ ପାଇଁ ନିଯୁକ୍ତ ସରକାରୀ ଓକିଲ ରେଖା ଜୈନଙ୍କ ସମେତ ଅନ୍ୟ ଓକିଲମାନେ ମଧ୍ୟ ଅନଲାଇନରେ ଉପସ୍ଥିତ ଥିଲେ।
ସୂଚନାଯୋଗ୍ୟ, ମାର୍ଚ୍ଚ ୩, ୨୦୨୫ ରାତିରେ ମୁସ୍କାନ ତା ପ୍ରେମିକ ସାହିଲ ସହିତ ମିଶି ନିଜ ସ୍ବାମୀ ସୌରଭ ରାଜପୁତଙ୍କୁ ହତ୍ୟା କରିଥିଲା । ମୁସ୍କାନ ପ୍ରଥମେ ତା ସ୍ବାମୀଙ୍କୁ ଔଷଧ ଖୁଆଇ ବେହୋସ କରି ଦେଇଥିଲା ଏବଂ ପରେ ସେ ନିଜେ ତାଙ୍କ ଛାତିରେ ଛୁରୀରେ ଆକ୍ରମଣ କରିଥିଲା । ଏହା ପରେ, ସାହିଲ ସହିତ ମିଶି ସୌରଭର ମୃତଦେହକୁ ୧୫ ଖଣ୍ଡ କରି କାଟି ଏକ ଡ୍ରମରେ ପୂରାଇ ସିମେଣ୍ଟରେ ପ୍ୟାକ୍ କରି ଦେଇଥିଲା । ପରଦିନ ସେ ସାହିଲ ସହ ହିମାଚଳ ପ୍ରଦେଶ ବୁଲିବାକୁ ଯାଇଥିଲା ଏବଂ ମାର୍ଚ୍ଚ ୧୭ରେ ମିରଟ ଫେରି ଆସିଥିଲା। ଘଟଣା ସଂପର୍କରେ ଜଣାପଡ଼ିବା ପରେ ମାର୍ଚ୍ଚ ୧୮ରେ ପୋଲିସ ଉଭୟଙ୍କୁ ଗିରଫ କରିଥିଲା।
