ନୂଆଦିଲ୍ଲୀ,୨୫/୧୧: ଧୋତି ପିନ୍ଧିଛନ୍ତି । ମୁଣ୍ଡରେ ଠେକା ଭିଡା ହୋଇଛି । ଆଉ ସାଇକେଲ ଚଲାଉଛନ୍ତି ସାଂସଦ । ହଳଦିଆ ରଙ୍ଗର ସାଇକେଲ ପଛରେ ବ୍ୟାଗଟିଏ ବି ରହିଛି । ଆଗରେ ଏକ ପ୍ଲାକାର୍ଡ ଲାଗିଛି । ସେଥିରେ ନାମ ଲେଖା ହୋଇଛି । ମୁହଁରେ ସ୍ମିତହାସ୍ୟ । ସଂସଦର ଶୀତ ଅଧିବେଶନ ପ୍ରଥମ ଦିନରେ ଆଜି କିଛି ଏମିତି ଦୃଶ୍ୟ ଦେଖିବାକୁ ମିଳିଥିଲା । ସଂସଦକୁ ସାଇକେଲ ଚଲାଇ ଆସିଛନ୍ତି ଜଣେ ସାଂସଦ ।
ଆଜିଠୁ ଆରମ୍ଭ ହୋଇଛି ସଂସଦର ଶୀତ ଅଧିବେଶନ । ଡିସେମ୍ବର ୨୦ ଯାଏ ଅଧିବେଶନ ଚାଲିବ । ଏହି ଅଧିବେଶନରେ ମୋଟ ୧୯ଟି କାର୍ଯ୍ୟଦିବସ ରହିଛି । ଅଧିବେଶନର ପ୍ରଥମ ଦିନରେ ଏକ ରୋଚକ ଘଟଣା ଦେଖିବାକୁ ମିଳିଛି । ସଂସଦକୁ ସାଇକେଲରେ ଆସିଛନ୍ତି ଟିଡିପି ସାଂସଦ ଅପ୍ପଲା ନାୟୁଡୁ । ଏହି ଦୃଶ୍ୟ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି ।
#WATCH | Delhi: Telugu Desam Party (TDP) MP Appala Naidu Kalisetti reached Parliament on a bicycle today.#Parliamentwintersession pic.twitter.com/9Cw9DVpCKl
— ANI (@ANI) November 25, 2024
ସଂସଦକୁ ସାଇକେଲରେ ଆସିବା ନେଇ ପ୍ରତିକ୍ରିୟା ରଖି ସାଂସଦ କହିଛନ୍ତି, ମୁଁ ସାଇକେଲର ଆସିବା ପଛରେ କାରଣ ହେଉଛି ଲୋକଙ୍କୁ ସଚେତନତା କରିବା । ଦିଲ୍ଲୀ ପ୍ରଦୂଷଣ ନେଇ ସଚେତନ କରାଇବାରୁ ମୁଁ ସାଇକେଲରେ ଆସିଛି । ପ୍ରଦୂଷଣ ବିପଦଜନକ ସ୍ଥିତିରେ ରହିଛି ଏହା ନିୟନ୍ତ୍ରଣକୁ ଆସିବା ଦରକାର ।
ଆଜି ପାଇଁ ଉଭୟ ରାଜ୍ୟସଭା ଲୋକସଭା ମୁଲତବୀ ରହିଛି । ବୁଧବାର ଅର୍ଥାତ ନଭେମ୍ବର ୨୭ ତାରିଖରେ ଗୃହକାର୍ଯ୍ୟ ହେବ । ଆଦାନୀ ଓ ମଣିପୁର ପ୍ରସଙ୍ଗରେ ବିରୋଧୀଙ୍କ ହୋହାଲ୍ଲା ପରେ ଗୃହକାର୍ଯ୍ୟ ମୁଲତବୀ ରହିଛି ।
