କାଳିପଦା ୦୮/୦୮: ରାଜ୍ୟରେ ଏବେ ନାରୀ ସୁରକ୍ଷାକୁ ନେଇ ଆଲୋଚନା ହେଉଛି । ବିରୋଧୀ ଦଳ ନାରୀ ସୁରକ୍ଷା ପାଇଁ ଆନ୍ଦୋଳନକୁ ଓହ୍ଲାଇଛନ୍ତି । ସାରା ରାଜ୍ୟରେ ନାରୀ ଅସୁରକ୍ଷିତ ବୋଲି ଚର୍ଚ୍ଚା ହେଉଛି। ଏଭଳି ସମୟରେ ପୁଣି ନାରୀ ଦୁଷ୍କର୍ମର ଏକ ଘଟଣା ସାମ୍ନାକୁ ଆସିଛି । ଜଣେ ୧୩ ବର୍ଷର ନାବାଳିକାକୁ ଦୁଷ୍କର୍ମ କରି ଗର୍ଭବତୀ କରିଛି ସମ୍ପର୍କୀୟ ପିଉସା । ପିଉସା ଝିଆରୀ ସମ୍ପର୍କରେ ଲାଗିଛି କଳଙ୍କର ଛିଟା । ଏପରି ଏକ ଲଜ୍ଜାଜନକ ଘଟଣା ଘଟିଛି ବାଲେଶ୍ବର ଜିଲ୍ଲା ସିଂଲା ଥାନା ଅନ୍ତର୍ଗତ ଭାନୁପୁର ଗ୍ରାମରେ । ଗୁରୁବାର ଅଭିଯୁକ୍ତ ପିଉସାକୁ କାବୁ କରି ରାତି ସାରା ବାନ୍ଧି ରଖିଥିଲେ ପୀଡିତାଙ୍କ ପରିବାର ଲୋକେ। ଏହି ଘଟଣା ବିଜୁଳି ବେଗରେ ବ୍ୟାପିବା ପରେ ଖବର ପାଇ ବହୁ ଲୋକ ସେଠାରେ ପହଞ୍ଚିଥିଲେ । ଖବର ପାଇ ଘଟଣାସ୍ଥଳରେ ସିଂଲା ଥାନା ପୋଲିସ ପହଞ୍ଚି ଅଭିଯୁକ୍ତକୁ ଗିରଫ କରି ଥାନାକୁ ନେଇଛି ।
ସୂଚନା ଅନୁଯାୟୀ ଭାନୁପୁର ଗ୍ରାମର ଅନ୍ତର୍ଯ୍ଯାମୀ ହଟାଇଙ୍କ ନାବାଳିକା ଝିଅ ମାଙ୍କଡ଼ ଘଉଡ଼ାଇବା ପାଇଁ ପରିବା ବାଡ଼ିକୁ ଯାଉଥିବା ସମୟରେ ସମ୍ପର୍କୀୟ ପିଉସା ଅଦୈତ ମଣ୍ତଳ(୬୦) ବାରମ୍ବାର ବାଧ୍ୟ କରି ଶାରିରୀକ ସମ୍ପର୍କ ରଖିଥିଲା। ଏକଥା କାହା ଆଗରେ କହିଲେ ତୋର ବାପା, ମା କୁ ଜୀବନରୁ ମାରି ଦେବାର ଧମକ ଦେଇଥିଲା । ତେବେ ଝିଅ ଠାରେ ଗର୍ଭଧାରଣ ଲକ୍ଷଣ ଗୁଡ଼ିକ ଦେଖାଦେବାରୁ ପରିବାର ଲୋକେ ନାବାଳିକାର ଡାକ୍ତରୀ ପରୀକ୍ଷା କରିବା ପରେ ଝିଅ ଗର୍ଭବତୀ ଥିବା ଜଣା ପଡିଥିଲା। ଅଭିଯୁକ୍ତକୁ କୋଠର ଦଣ୍ଡ ଦିଆଯାଉ ବୋଲି ଗ୍ରାମବାସୀ କହିଛନ୍ତି । ଶୁକ୍ରବାର ନାବାଳିକା ଝିଅର ଡ଼ାକ୍ତରୀ ମାଇନା କରାଯାଇ ଅଭିଯୁକ୍ତ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସିଂଲା ପୋଲିସ କହିଛି ।
