ବର୍ତ୍ତମାନର ଆଧୁନିକ ଜୀବନଶୈଳୀ ଓ ଖାଦ୍ୟ ପାନୀୟ ଗ୍ରହଣ କରିବାର ସଠିକ ସମୟ ନ ରହିବାରୁ ବହୁ ଲୋକ ମେଦ ବହୁଳତାର ଶିକାର ହେଉଛନ୍ତି । ପରେ ଓଜନ ହ୍ରାସ କରିବା ପାଇଁ କଡ଼ା ବ୍ୟାୟାମ ସହିତ ଖାଦ୍ୟପେୟ ଉପରେ ଧ୍ୟାନ ଦେଇଥାନ୍ତି । ଏପରିକି କିଛି ବ୍ୟକ୍ତି ଖାଇବା ଛାଡି ଦେଇଥାନ୍ତି ।ହେଲେ ଓଜନ ହ୍ରାସ କରିବା ପାଇଁ ଅସ୍ବାସ୍ଥ୍ୟକର ଅଭ୍ୟାସ ପରିବର୍ତ୍ତେ କିଛି ଖାଦ୍ୟକୁ ଆମର ଦୈନିକ ଖାଦ୍ୟ ପ୍ରଣାଳୀରେ ସାମିଲ କରିବା ଦ୍ବାରା ସୁଫଳ ମିଳିଥାଏ । ଯେପରିକି ମାଣ୍ଡିଆ । ମାଣ୍ଡିଆକୁ ଦୈନିକ ଖାଦ୍ୟରେ ସାମିଲ କରିବା ଦ୍ବାରା ଏହା ଆପଣଙ୍କ ଓଜନକୁ ନିୟନ୍ତ୍ରଣ କରିଥାଏ । ଏହା ସହିତ ମାଣ୍ଡିଆର ସ୍ବାସ୍ଥ୍ୟ ଉପରେ ଅନେକ ସୁପ୍ରଭାବ ପକାଇଥାଏ ।
ଓଜନ ହ୍ରାସ କରିବାକୁ ଚାହୁଁଥିବା ବ୍ୟକ୍ତି ନିଜ ଖାଦ୍ୟ ଶୈଳୀରେ ମାଣ୍ଡିଆକୁ ସାମିଲ କରି ଓଜନ ନିୟନ୍ତ୍ରଣ କରିପାରିବେ । ୨୦୧୧ ମସିହାର ଏନସିବିଆଇ ଜର୍ଣ୍ଣାଲରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ମାଣ୍ଡିଆରେ ଫାଇବର ଓ ପ୍ରୋଟିନ ପ୍ରଚୁର ମାତ୍ରାରେ ରହିଥାଏ । ପ୍ରତ୍ୟେକ ଦିନ କିଛି ମାତ୍ରାରେ ସେବନ କରିବା ଫଳରେ ବହୁ ସମୟ ପର୍ଯ୍ୟନ୍ତ ଭୋକ ଲାଗିନଥାଏ । ଏହା ସହିତ ପ୍ରତ୍ୟେକ ଦିନ ମାଣ୍ଡିଆ ଖାଇବା ଦ୍ବାରା ଶରୀରକୁ ଆବଶ୍ୟକ ପରିମାଣର ପୋଷକ ତତ୍ତ୍ୱ ମିଳିଥାଏ । ସେହିପରି ମାଣ୍ଡିଆରେ ଚାଉଳ ଓ ଗହମ ତୁଳନାରେ ଅପେକ୍ଷାକୃତ କମ୍ ଗ୍ଲାଇସେମିକ ଇଣ୍ଡେକ୍ସ ରହିଥାଏ । ଏହାର ନିୟମିତ ସେବନ ଦ୍ବାରା ରକ୍ତ ଶର୍କରାର ସ୍ତରକୁ ନିୟନ୍ତ୍ରଣ କରାଯାଇଥାଏ ।
ମାଣ୍ଡିଆରେ ପ୍ରଚୁର ପରିମାଣରେ କ୍ୟାଲସିଅମ ରହିଥାଏ । ମାଣ୍ଡିଆରେ ଥିବା ପୋଷକ ତତ୍ତ୍ୱ ଶରୀରରେ ହାଡ଼ ଓ ଦାନ୍ତକୁ ମଜବୁତ କରିବାରେ ସାହାଯ୍ୟ କରିଥାଏ । ଏଥିପାଇଁ ଏହା ଶିଶୁଙ୍କ ପାଇଁ ଏକ ଆବଶ୍ୟକ ଖାଦ୍ୟ ଅଟେ । ମାଣ୍ଡିଆକୁ ବୟସ୍କ ବ୍ୟକ୍ତିମାନେ ମଧ୍ୟ ନିଜର ଖାଦ୍ୟରେ ସାମିଲ କରି ଅଷ୍ଟିଓପୋରୋସିସ୍ ଭଳି ରୋଗରୁ ମୁକ୍ତି ପାଇପାରିବେ । ସେହିପରି ମାଣ୍ଡିଆରେ କ୍ୟାଲସିୟମ ଓ ଫଲିକ୍ ଏସିଡ ଭରପୁର ମାତ୍ରାରେ ଭର୍ତ୍ତି ହୋଇ ରହିଥାଏ । ମାଣ୍ଡିଆ ଗର୍ଭବତୀ ମହିଳାଙ୍କ ପାଇଁ ବହୁତ ଉପକାରୀ ହୋଇଥାଏ ।
