ନୂଆଦିଲ୍ଲୀ,୦୮/୧୨: ୧୯ ବର୍ଷରୁ କମ୍ ପୁରୁଷ ଏସିଆ କପର ଆଜି ଫାଇନାଲ ମ୍ୟାଚ ଖେଳାଯାଉଛି । ଭାରତ ଓ ବାଂଲାଦେଶ ମଧ୍ୟରେ ହୋଇଛି ଫାଇନାଲ ଫାଇଟ । ପ୍ରଥମେ ବ୍ୟାଟିଂ କରି ବାଂଲାଦେଶ ୧୯୮ରନ କରିଛି । ଭାରତ ଆଗରେ ୧୯୯ ବିଜୟ ଲକ୍ଷ୍ୟ ରହିଛି । ନବମ ଟାଇଟଲ ହାତେଇବାକୁ ହେଲେ ଭାରତକୁ ୧୯୯ ରନର ଟାର୍ଗେଟ ହାସଲ କରିବାକୁ ହେବ । ବାଂଲାଦେଶ ପକ୍ଷରୁ ମହମ୍ମଦ ରିଜାନ ସର୍ବାଧିକ ୪୭ରନ କରିଛନ୍ତି ।
ଟସ୍ ଜିତି ଭାରତ ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା । ବାଂଲାଦେଶକୁ ବ୍ୟାଟିଂ ଆମନ୍ତ୍ରଣ ଦେଇଥିଲା ଭାରତ । ଜବାବ ଅବରାର ଓ କଲାନ ସିଦ୍ଦିକି ଅଲିମ ଓପନିଂ କରିଥିଲେ । ୟୁଧାଜିତ ଗୁହା ଭାରତକୁ ପ୍ରଥମ ସଫଳତା ଦେଇଥିଲେ । କଲାନ ସିଦ୍ଦିକି ଅଲିମ ୧୬ ବଲରେ ୧ ରନ କରି ଗୁହାଙ୍କ ଶିକାର ହୋଇଥିଲେ । ୧୧ତମ ଓଭରରେ ହରବଂଶ ସିହଙ୍କ ବଲରେ ଜବାବ ଅବରାର ୨୦ରନ କରି ଆଉଟ ହୋଇଥିଲେ । ୧୩ ଓଭରରେ ବାଂଲାଦେଶ ୫୦ ରନ କରିଥିଲା । ୧୯ତମ ଓଭରରେ ବାଂଲାଦେଶର ତୃତୀୟ ୱିକେଟ ପତନ ହୋଇଥିଲା । ତମିମ ୧୬ରନ କରି ପାଭିଲିୟନ ଫେରିଥିଲେ । ଦଳୀୟ ସ୍କୋର ୧୦୦ରେ ୩ଟି ୱିକେଟ ହରାଇସାରିଥିଲା । ଚତୁର୍ଥ ୱିକେଟରେ ଶିବାବଙ୍କୁ ଆୟୁଷ ମୋତ୍ରା ଆଉଟ କରିଥିଲେ । ସେ ୪୦ରନ କରିଥିଲେ ।
ବାଂଲାଦେଶ ସଙ୍କଟରେ ପଡିଯାଇଥିଲା । ଦଳର ରନ ଗାଡି ଧିମା ପଡିଯାଇଥିଲା । ୪୨ ଓଭରରେ ବାଂଲାଦେଶର ୧୬୭ରେ ୮ଟି ୱିକେଟ ହରାଇ ସାରିଥିଲା । ୧୯୮ ରନ କରି ଅଲଆଉଟ ହୋଇଥିଲା ବାଂଲାଦେଶ । ଦଳ ପକ୍ଷରୁ ମହମ୍ମଦ ରିଜାନ ସର୍ବାଧିକ ୪୭ରନ କରିଥିଲେ । ଶିବାବ ୪୦ ଓ ମହମ୍ମଦ ଫରିଦ ୩୯ରନ କରିଛନ୍ତି । ଭାରତକୁ ଫାଇନାଲ ଜିତିବାକୁ ହେଲେ ୧୯୯ରନ ବିଜୟ ଲକ୍ଷ୍ୟ ହାସଲ କରିବାକୁ ହେବ ।
