ତୁରୁମୁଙ୍ଗା,୧୫/୦୬: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ କଣ୍ଟିଆପଡା ଗ୍ରାମରେ ଅଭାବନୀୟ ଘଟଣା । ଗ୍ରାମର ମିତ୍ରଭାନୁ ବେହେରାଙ୍କ ୪୫ ବର୍ଷର ପୁଅ ରୟା ବେହେରାଙ୍କ ମୃତଦେହ ଆଜି ସକାଳେ ନିକଟରେ ଥିବା ପୋଖରୀରେ ଭାସୁଥିବାର ଦେଖିବାକୁ ମିଳିଛି । ତାଙ୍କୁ ହତ୍ୟା କରି ପୋଖରୀରେ ଫିଙ୍ଗି ଦେଇଥିବା ସନ୍ଦେହ କରାଯାଉଛି । ଖବର ପାଇ ତୁରୁମୁଙ୍ଗା ପୁଲିସ ଗାଁର କିଛି ବ୍ୟକ୍ତିଙ୍କୁ ଅଟକ ରଖିଥିବା ଜଣାପଡିଛି ।
ସୂଚନା ମୁତାବକ, ରବିବାର ସକାଳେ ରୟା ବେହେରାଙ୍କ ମୃତଦେହ ଗାଁ ନିକଟରେ ଥିବା ପୋଖରୀରେ ଭାସୁଥିବାର ଦେଖିବାକୁ ମିଳିଥିଲା । ଏ ସମ୍ପର୍କରେ ଜାଣିବା ପରେ ତୁରୁମୁଙ୍ଗା ପୁଲିସ ଘଟଣାସ୍ଥଳରେ ପହଞ୍ଚିଥିଲା । ପୁଲିସ ସହିତ ପାଟଣା ଅଗ୍ନିଶମ ବାହିନୀ, କେନ୍ଦୁଝର ସାଇଣ୍ଟିଫିକ ଟିମ୍ ଏବଂ ସନ୍ଧାନୀ କୁକୁର ଆସି ଘଟଣାର ତଦନ୍ତ ଚଳାଇଛନ୍ତି । ପୋଖରୀରେ ଭାସୁଥିବା ମୃତ ରୟା ବେହେରାଙ୍କୁ ହତ୍ୟା କରି ପୋଖରୀରେ ଫିଙ୍ଗି ଦେଇଥିବା ସନ୍ଦେହ କରାଯାଉଛି । ଏହାର ସତ୍ୟତା ଜାଣିବା ପାଇଁ ତୁରୁମୁଙ୍ଗା ପୁଲିସ କଣ୍ଟିଆପଡା ଗାଁର କିଛି ବ୍ୟକ୍ତିଙ୍କୁ ଅଟକ ରଖିଥିବା ଜଣାପଡିଛି । ତଦନ୍ତ ପରେ ଖୁବ ଶୀଘ୍ର ରୟା ବେହେରାଙ୍କ ମୃତ୍ୟୁର କାରଣ ଜଣାପଡିବ ବୋଲି ତୁରୁମୁଙ୍ଗା ପୁଲିସ ପ୍ରକାଶ କରିଛି ।
