ପାଟନା: ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବଙ୍କ ବଡ଼ ପୁଅ ତଥା ପୂର୍ବତନ ମନ୍ତ୍ରୀ ତେଜ ପ୍ରତାପ ଯାଦବ ଅନୁଷ୍କା ଯାଦବ ନାମ୍ନୀ ଜଣେ ଯୁବତୀଙ୍କ ସହ ତାଙ୍କର ପ୍ରେମ ସମ୍ପର୍କ ଥିବା ଘୋଷଣା କରିଛନ୍ତି । ସେ ସୋସିଆଲ ମିଡିଆରେ ଅନୁଷ୍କାଙ୍କ ବିଷୟରେ ପୋଷ୍ଟ କରିଥିଲେ । ତାଙ୍କର ଏହି ପୋଷ୍ଟ ଭାଇରାଲ ହେବା ପରେ ଏହାକୁ ସେ ଡିଲିଟ୍ କରି ଦେଇଛନ୍ତି । ଯଦିଓ ତେଜ ପ୍ରତାପ ପୋଷ୍ଟ ଡିଲିଟ୍ କରି ଦେଇଛନ୍ତି, କିନ୍ତୁ ୟୁଜର୍ସ ସ୍କ୍ରିନ୍ସଟ୍ ନେଇ ପୋଷ୍ଟକୁ ଭାଇରାଲ କରୁଛନ୍ତି ।
ତେଜ ପ୍ରତାପ ଫେସବୁକ୍ ପୋଷ୍ଟରେ ଲେଖିଥିଲେ, ‘ମୁଁ ତେଜ ପ୍ରତାପ ଯାଦବ ଏବଂ ଏହି ଫଟୋରେ ମୋ ସହିତ ଦେଖାଯାଉଥିବା ଝିଅଜଣଙ୍କ ହେଉଛନ୍ତି ଅନୁଷ୍କା ଯାଦବ । ଆମେ ଦୁହେଁ ଦୀର୍ଘ ୧୨ ବର୍ଷ ଧରି ପରସ୍ପରକୁ ଜାଣିଛୁ ଏବଂ ଉଭୟ ଉଭୟଙ୍କୁ ଭଲ ପାଉ । ଆମେ ୧୨ ବର୍ଷ ଧରି ଏକ ସମ୍ପର୍କରେ ଅଛୁ । ମୁଁ ବହୁତ ଦିନ ଧରି ଆପଣମାନଙ୍କୁ ଏହା କହିବାକୁ ଚାହୁଁଥିଲି, କିନ୍ତୁ ମୁଁ ଏହାକୁ କିପରି କହିବି ବୁଝିପାରୁ ନଥିଲି। ତେଣୁ ଆଜି, ଏହି ପୋଷ୍ଟ ମାଧ୍ୟମରେ ମୁଁ ଆପଣଙ୍କ ସମସ୍ତଙ୍କ ସହିତ ମୋ ହୃଦୟର ଭାବନା ବାଣ୍ଟିଛି । ମୁଁ ଆଶା କରୁଛି ଆପଣମାନେ ସମସ୍ତେ ମୁଁ କ'ଣ କହୁଛି ତାହା ବୁଝିପାରିବେ।’
ସୂଚନାଯୋଗ୍ୟ ଯେ, ଏହା ପୂର୍ବରୁ ତେଜ ପ୍ରତାପ ଯାଦବ ୨୦୧୮ରେ ବିବାହ କରିଥିଲେ । କିନ୍ତୁ କିଛି ମାସ ପରେ ତାଙ୍କ ପତ୍ନୀ ଐଶ୍ୱର୍ଯ୍ୟା ଏବଂ ତେଜ ପ୍ରତାପଙ୍କ ମଧ୍ୟରେ ମତଭେଦ ଏବଂ ବିବାଦ ଯୋଗୁଁ ଦୁହେଁ ଅଲଗା ହୋଇ ଯାଇଥିଲେ । ସେମାନଙ୍କ ମଧ୍ୟରେ ଛାଡପତ୍ର ମାମଲା କୋର୍ଟରେ ଚାଲିଛି । ହେଲେ ଏବେ ନିଜର ପୁରୁଣା ପ୍ରେମ ସଂପର୍କରେ ସୋସିଆଲ ମିଡିଆରେ ଘୋଷଣା କରିବା ପରେ ଉଭୟ ତେଜ ପ୍ରତାପ ଏବଂ ତାଙ୍କର କଥିତ ପ୍ରେମିକା ଅନୁଷ୍କା ଯାଦବ ଚର୍ଚ୍ଚାକୁ ଆସିଛନ୍ତି ।
ସେପଟେ ଯଦିଓ ଆରଜେଡି ନେତା ତେଜ ପ୍ରତାପ ଯାଦବ ତାଙ୍କ ଫେସବୁକ୍ ପୋଷ୍ଟ ଡିଲିଟ୍ କରିଦେଇଥିଲେ, ତାଙ୍କ ପୋଷ୍ଟର ସ୍କ୍ରିନସଟ୍ ସୋସିଆଲ ମିଡିଆରେ ଭାଇରାଲ ହୋଇଛି । ସୋସିଆଲ ମିଡିଆ ବ୍ୟବହାରକାରୀମାନେ ସେମାନଙ୍କ ସମ୍ପର୍କ ଉପରେ ବିଭିନ୍ନ ମନ୍ତବ୍ୟ ଦେଉଥିବାର ଦେଖିବାକୁ ମିଳିଛି । ଅନୁଷ୍କା ଯାଦବ ଭବିଷ୍ୟତରେ ତେଜ ପ୍ରତାପ ଯାଦବଙ୍କୁ ବିବାହ କରିପାରନ୍ତି ବୋଲି ଅନୁମାନ କରାଯାଉଛି। କିନ୍ତୁ ଏନେଇ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ ।
