ନୂଆଦିଲ୍ଲୀ: ନୂଆଦିଲ୍ଲୀରେ ଆଜି (ଶନିବାର) ନୀତି ଆୟୋଗର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଦେଶର ଅଧିକାଂଶ ରାଜ୍ୟର ମୁଖ୍ୟମନ୍ତ୍ରୀ ଏଥିରେ ଅଂଶଗ୍ରହଣ କରିଥିଲେ। ଏହି ସମୟରେ ପ୍ରଧାନମନ୍ତ୍ରୀ ମୋଦୀ ସଭାକୁ ସମ୍ବୋଧିତ କରିଥିଲେ। ସେ କହିଥିଲେ ଯେ, ଆମକୁ ବିକାଶର ଗତି ବୃଦ୍ଧି କରିବାକୁ ପଡିବ। ଯଦି କେନ୍ଦ୍ର ଏବଂ ସମସ୍ତ ରାଜ୍ୟ ଏକାଠି ହୋଇ ଟିମ୍ ଇଣ୍ଡିଆ ପରି କାମ କରନ୍ତି, ତେବେ କୌଣସି ଲକ୍ଷ୍ୟ ଅସମ୍ଭବ ନୁହେଁ ।
ନୀତି ଆୟୋଗର ଦଶମ ଗଭର୍ଣ୍ଣିଂ କାଉନସିଲ ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଥିଲେ ଯେ, ବିକଶିତ ଭାରତ ପ୍ରତ୍ୟେକ ଭାରତୀୟଙ୍କ ସ୍ୱପ୍ନ। ପ୍ରତ୍ୟେକ ରାଜ୍ୟ ବିକାଶ କଲେ ହିଁ ଭାରତ ବିକାଶ କରିବ। ଏହା ହେଉଛି ୧୪୦ କୋଟି ଦେଶବାସୀଙ୍କ ଆକାଂକ୍ଷା। ପ୍ରତ୍ୟେକ ରାଜ୍ୟ ବିଶ୍ୱ ମାନଦଣ୍ଡ ଅନୁଯାୟୀ ଅତି କମରେ ଗୋଟିଏ ପର୍ଯ୍ୟଟନ ସ୍ଥଳ ବିକଶିତ କରିବା ଉଚିତ । ଯେଉଁଠାରେ ସମସ୍ତ ସୁବିଧା ଏବଂ ଭିତ୍ତିଭୂମି ଉପଲବ୍ଧ ଥିବ। ଗୋଟିଏ ରାଜ୍ୟ, ଗୋଟିଏ ବିଶ୍ୱ ଗନ୍ତବ୍ୟସ୍ଥଳ ପଦ୍ଧତି କେବଳ ପର୍ଯ୍ୟଟନକୁ ବୃଦ୍ଧି କରିବ ତାହା ନୁହେଁ ବରଂ ନିକଟବର୍ତ୍ତୀ ସହରଗୁଡ଼ିକର ବିକାଶକୁ ମଧ୍ୟ ତ୍ୱରାନ୍ୱିତ କରିବ ।
ସେ ଆହୁରି ମଧ୍ୟ କହିଥିଲେ ଯେ, ଭାରତ ଦ୍ରୁତ ଗତିରେ ସହରୀକରଣ ଆଡକୁ ଅଗ୍ରସର ହେଉଛି। ଆମକୁ ଭବିଷ୍ୟତ ପାଇଁ ପ୍ରସ୍ତୁତ ସହରଗୁଡ଼ିକ ଦିଗରେ କାମ କରିବାକୁ ପଡିବ। ଅଭିବୃଦ୍ଧି, ନବସୃଜନ ଏବଂ ସ୍ଥିରତା ଆମ ସହରଗୁଡ଼ିକର ଇଞ୍ଜିନ ହେବା ଉଚିତ। ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ବୈଠକରେ (ନୀତି ଆୟୋଗ ବୈଠକ) ଜିଡିପି ଅଭିବୃଦ୍ଧି, ଜନସଂଖ୍ୟା ପରିଚାଳନା ଏବଂ ଏଆଇର ଲାଭ ପାଇଁ ୩ଟି ଉପ-ଗୋଷ୍ଠୀ ଗଠନ ପାଇଁ ପ୍ରସ୍ତାବ ଦେଇଥିଲେ। ବୈଠକରେ ପ୍ରଧାନମନ୍ତ୍ରୀ ମୋଦୀ ଆନ୍ଧ୍ରପ୍ରଦେଶର ବିକାଶର ବ୍ଲୁପ୍ରିଣ୍ଟକୁ ପ୍ରଶଂସା କରିଥିଲେ। କେବଳ ଏତିକି ନୁହେଁ, ସେ ସମସ୍ତ ରାଜ୍ୟକୁ ଆନ୍ଧ୍ରର ଏହି ସଂସ୍କାରଗୁଡ଼ିକୁ ଅଧ୍ୟୟନ କରିବାକୁ କହିଥିଲେ। ବୈଠକର ମୁଖ୍ୟ ପ୍ରସଙ୍ଗ ' ବିକଶିତ ଭାରତ ପାଇଁ ବିକଶିତ ରାଜ୍ୟ @୨୦୨୭' ଥିଲା।
