ସମ୍ବଲପୁର,୧୦/୧୧: ମୁହଁରେ ଲାଗିଥିଲା ମଣିଷ ରକ୍ତ । ମାରିଥିଲା ମଣିଷ । ପାଲଟିଥିଲା ନରଖାଦକ । ମୁଣ୍ଡାଇଥିଲା ଦୁର୍ନାମ । ନୂଆପଡ଼ା ଜିଲ୍ଲାରେ ଆତଙ୍କ ସୃଷ୍ଟି କରିଥିବା ସେହି ମଣିଷମରା ବାଘ ଏବେ ଉବୁଟୁବୁ ହେଉଛି ପ୍ରେମରେ । ଘୂରିବୁଲୁଛି ବାଘୁଣୀ ଚାରିପଟେ । କେତେବେଳେ ଲାଙ୍ଗୁଡ଼ ପିଟୁଛି ତ କେତେବେଳେ ଜିଭରେ ଚାଟି ପକାଉଛି । ପୁଣି କେତେବେଳେ ଦେହରେ ଘଷି ହେଉଛି । କଲରାପତରିଆ ବାଘ ‘ରାଜା’ ଓ ବାଘୁଣୀ ‘ରାନୀ’ର ପ୍ରେମପ୍ରଣୟର ମୂକସାକ୍ଷୀ ପାଲଟିଛି ସମ୍ବଲପୁର ପ୍ରାଣୀ ଉଦ୍ୟାନ । ଏକାଠି ହେବାର ମାତ୍ର କେଇ ଘଣ୍ଟା ମଧ୍ୟରେ ଶନିବାର ଉଭୟଙ୍କ ମିଳନ ହୋଇଥିବାବେଳେ ପ୍ରାଣୀ ଉଦ୍ୟାନରେ ବାଘ ବଂଶ ବୃଦ୍ଧି ନେଇ ସୃଷ୍ଟି ହୋଇଛି ନୂଆ ସମ୍ଭାବନା ।
ସେ ବାଘ ହେଉ ଅବା ମଣିଷ । ପ୍ରେମରେ ପଡ଼ିଲେ ବଦଳିଯାଏ ପ୍ରବୃତ୍ତି ଓ ପ୍ରକୃତି । ଏହା ଦେଖିବାକୁ ମିଳିଛ ‘ରାଜା’ କ୍ଷେତ୍ରରେ । ଗତବର୍ଷ ନୂଆପଡ଼ା ଜିଲ୍ଲାରେ ୨ ଜଣଙ୍କ ଜୀବନ ନେଇଥିଲା ଏହି କଲରାପତରିଆ । ବାଘ ଆକ୍ରମଣରେ ଜଣେ କ୍ଷତାକ୍ତ ମଧ୍ୟ ହୋଇଥିଲେ । ଆତଙ୍କ ଖେଳାଇଥିବା ଏହି ନରହନ୍ତା ବାଘକୁ ଗତବର୍ଷ ନଭେମ୍ବର ୫ରେ କାବୁ କରିବାରେ ସଫଳ ହୋଇଥିଲା ବନ ବିଭାଗ । ୩ ଦିନ ଧରି ଚିକିତ୍ସା ପରେ ତାକୁ ସମ୍ବଲପୁର ପ୍ରାଣୀ ଉଦ୍ୟାନକୁ ନଭେମ୍ବର ୮ରେ ଅଣାଯାଇଥିଲା । ଏଠାରେ ଦୀର୍ଘ ୧୧ ମାସ ଧରି ଚିକିତ୍ସା କରାଯିବା ସହ କ୍ୱାରେଣ୍ଟାଇନ୍ରେ ରଖାଯାଇଥିଲା । ବାଘକୁ ଦେଖିବା ଲାଗି ପର୍ଯ୍ୟଟକଙ୍କୁ ବାରଣ ଥିବାବେଳେ ତା’ର ଆଚରଣ ଉପରେ ତୀକ୍ଷ୍ଣ ନଜର ରଖାଯାଇଥିଲା । ଆନୁମାନିକ ୮ବର୍ଷର ଏହି ବାଘର ଇତିମଧ୍ୟରେ ନାମକରଣ କରାଯାଇଛି । ପ୍ରାଣୀ ଉଦ୍ୟାନ କର୍ତ୍ତୃପକ୍ଷ ଏହାର ନାମ ରଖିଛନ୍ତି ‘ରାଜା’ ।
ଏଥିପୂର୍ବରୁ ସମ୍ବଲପୁର ପ୍ରାଣୀ ଉଦ୍ୟାନରେ ଦୀର୍ଘ ୬ବର୍ଷ ହେଲା ନିଃସଙ୍ଗ ଜୀବନ ବିତାଉଥିଲା ମାଈ କଲରାପତରିଆ ‘ରାନୀ’ । ଜନ୍ମର କିଛିଦିନ ପରେ ମା’ଠାରୁ ଅଲଗା ହୋଇଯାଇଥିବା ଏହି ବାଘୁଣୀକୁ ବୌଦ୍ଧ- ନୟାଗଡ଼ ସୀମାବର୍ତ୍ତୀ ଜଙ୍ଗଲରୁ ବନ ବିଭାଗ ଉଦ୍ଧାର କରି ଏଠାକୁ ଆଣିଥିଲା । ଏବେ ତା’କୁ ସାଥୀ ମିଳିଯାଇଛି । କ୍ୱାରାଣ୍ଟାଇନ୍ରେ ଥିବା ‘ରାଜା’କୁ ଗତ ମାସରେ ଏନ୍କ୍ଲୋଜରକୁ ଅଣାଯାଇଥିଲା । ‘ରାନୀ’ ରହୁଥିବା ଏନ୍କ୍ଲୋଜରକୁ ଲାଗି ଅନ୍ୟ ଏକ ଏନ୍କ୍ଲୋଜରରେ ରଖାଯାଇଥିଲା । ମଝିରେ କେବଳ ତାର ଜାଲି ଥିଲା । ଏହି ତାର ଜାଲି ଦେଇ ଉଭୟଙ୍କ ଭାବ ବିନିମୟ ହୋଇଥିଲା । ମିଶିବାକୁ ବ୍ୟାକୁଳ ହେଉଥିଲେ ମଧ୍ୟ ସୁରକ୍ଷା ଦୃଷ୍ଟିରୁ ସେମାନଙ୍କୁ ଏକାଠି କରାଯାଉ ନ ଥିଲା । ଉଭୟଙ୍କ ଗତିବିଧିକୁ ୨୪ ଘଣ୍ଟିଆ ସିସିଟିଭି କ୍ୟାମେରାରେ ଅନୁଧ୍ୟାନ କରାଯାଉଥିଲା । ପରସ୍ପର ପ୍ରତି ଆକର୍ଷିତ ହେଉଥିବା ଜଣାପଡ଼ିବା ପରେ ଶନିବାର ପ୍ରଥମ କରି ସେମାନଙ୍କୁ ଗୋଟିଏ ଏନ୍କ୍ଲୋଜରକୁ ଛଡ଼ାଯାଇଥିଲା । ଏକାଠି ହେବାର ମାତ୍ର କେଇ ଘଣ୍ଟା ଭିତରେ ବାଘ-ବାଘୁଣୀଙ୍କ ମିଳନ ହୋଇଛି । ଅନ୍ୟପଟେ ‘ରାନୀ’ ମଧ୍ୟ ନିଃସଙ୍ଗ ଜୀବନରୁ ମୁକ୍ତି ପାଇଛି । ଅଧିକାଂଶ ସମୟ ଏନ୍କ୍ଲୋଜର ଭିତରେ ଥିବା ଗଛ ଡାଳ ଉପରେ ବସି ରହୁଥିବା ବାଘୁଣୀ ଏବେ ଖୁସିରେ ଆତ୍ମହରା ହୋଇପଡ଼ିଛି । ବାଘ ‘ରାଜା’ ସହ ସମୟ ବିତାଉଛି । ସୂଚନାଯୋଗ୍ୟ, ଏହା ପୂର୍ବରୁ ୧୯୮୨ରେ ନନ୍ଦନକାନନରେ କଲରାପତରିଆ ଶାବକ ଜନ୍ମ ହୋଇଥିଲା । ଏବେ ସମ୍ବଲପୁର ପ୍ରାଣୀ ଉଦ୍ୟାନରେ ବାଘ-ବାଘୁଣୀଙ୍କ ମିଳନ କଲରାପତରିଆ ବଂଶ ବୃଦ୍ଧି ନେଇ ନୂଆ ଆଶା ସଞ୍ଚାର କରିଛି । ଏ ସମ୍ପର୍କରେ ସୂଚନା ଦେଇ ହୀରାକୁଦ ବନ୍ୟପ୍ରାଣୀ ଡିଏଫ୍ଓ ଅଂଶୁପ୍ରଜ୍ଞା ଦାସ କହିଛନ୍ତି, ସମ୍ବଲପୁରରେ ରାଜ୍ୟରେ ପ୍ରଥମ କରି କଲରାପତରିଆଙ୍କ ପାଇଁ ଗ୍ଲାସ୍ ଦ୍ୱାରା ଆଚ୍ଛାଦିତ ଏନ୍କ୍ଲୋଜର ନିର୍ମାଣ କରାଯାଇଛି । ପର୍ଯ୍ୟଟକଙ୍କ ଦେଖିବା ପାଇଁ ୨୦ ଫୁଟ୍ ଲମ୍ବ ଏବଂ ୭ ଫୁଟ୍ ଦୀର୍ଘ ଏକ ଗ୍ଲାସ୍ ଘେରା ଅଞ୍ଚଳ ନିର୍ମାଣ କରାଯାଇଛି । ପୂର୍ବ ଏନ୍କ୍ଲୋଜରର ପରିସୀମା ମାତ୍ର ୨୨୩ ବର୍ଗମିଟର ଥିବା ବେଳେ ଏହାକୁ ୫୫୦ ବର୍ଗ ମିଟରକୁ ବୃଦ୍ଧି କରାଯାଇଛି । ଏନ୍କ୍ଲୋଜର ଭିତରେ ଜଙ୍ଗଲ ଭଳି ପରିବେଶ ସୃଷ୍ଟି କରାଯାଇଛି
