ସାପୋରୋ: ଜାପାନର ହୋକ୍କାଇଡୋ ଦ୍ୱୀପର ପୂର୍ବ ଉପକୂଳରେ ଶନିବାର ସନ୍ଧ୍ୟାରେ ୬.୧ ମାଗ୍ନିଟ୍ୟୁଡ୍ ର ଏକ ଭୂକମ୍ପ ଆଘାତ ହୋଇଛି। ଜାପାନ ଆବହାୱା ବିଜ୍ଞାନ ସଂସ୍ଥା (JMA) ଅନୁସାରେ, ଏହି ଭୂକମ୍ପ ସ୍ଥାନୀୟ ସମୟ ସନ୍ଧ୍ୟା ୫ଟା ୩୭ମିନିଟ ସମୟରେ ସମୁଦ୍ର ତଳେ ପ୍ରାୟ ୨୦ କିଲୋମିଟର ଗଭୀରତାରେ ଘଟିଛି। ଭୂକମ୍ପର କେନ୍ଦ୍ରସ୍ଥଳ କୁଶିରୋଠାରୁ ୮୩ କିଲୋମିଟର ଦୂରରେ ଥିଲା।

ଜାପାନ ଆବହାୱା ବିଜ୍ଞାନ ସଂସ୍ଥା କହିଛି ଯେ ଏହି ଭୂକମ୍ପ ହେତୁ ସୁନାମିର କୌଣସି ଆଶଙ୍କା ନାହିଁ। ତେବେ, ସମୁଦ୍ର ଜଳସ୍ତରରେ କିଛି ପରିବର୍ତ୍ତନ ହୋଇପାରେ ବୋଲି ସ୍ଥାନୀୟ ଲୋକଙ୍କୁ ସତର୍କ କରାଯାଇଛି।

ପ୍ରାରମ୍ଭିକ ରିପୋର୍ଟ ଅନୁସାରେ, ଏହି ଭୂକମ୍ପ ହେତୁ କୌଣସି ଜନଜୀବନ ହାନି ତଥା କ୍ଷୟକ୍ଷତିର ଖବର ମିଳିନାହିଁ। ଜରୁରୀ ସେବା ବିଭାଗ ପରିସ୍ଥିତି ଉପରେ ନଜର ରଖିଛି ଏବଂ ବାସିନ୍ଦାଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି।

ଆପଣଙ୍କ ଅବଗତି ନିମନ୍ତେ ଜଣାଇଦେଉ ଯେ ଜାପାନ ପ୍ରଶାନ୍ତ ମହାସାଗରର ସିସ୍ମିକ ରିଙ୍ଗ ଅଫ ଫାୟାରରେ ଅବସ୍ଥିତ। ଯେଉଁଠାରେ ପ୍ରାୟ ସମୟରେ ଭୂକମ୍ପର ଝଟକା ଅନୁଭୁତ ହୋଇଥାଏ। ଏହା ପୂର୍ବରୁ ଜାପାନ ଗତ ମାର୍ଚ୍ଚ ୨୦୧୧ରେ ୯.୧ ମାଗ୍ନିଟ୍ୟୁଡ୍ ର ଏକ ବିନାଶକାରୀ ଭୂକମ୍ପ ଓ ସୁନାମିର ସମ୍ମୁଖୀନ ହୋଇଥିଲା। ଯାହା ଫୁକୁଶିମା ପରମାଣୁ ବିଦ୍ୟୁତ କେନ୍ଦ୍ରରେ ଦୁର୍ଘଟଣା ଘଟାଇ ୧୮,୦୦୦ରୁ ଅଧିକ ଲୋକଙ୍କ ମୃତ୍ୟୁ ଘଟାଇଥିଲା।

ଜାପାନ ସରକାର ଲୋକଙ୍କୁ ଆତଙ୍କିତ ନହେବା ପାଇଁ ସାମାଜିକ ଗଣମାଧ୍ୟମ ଏକ୍ସ ପ୍ଲାଟଫର୍ମରେ ସୂଚନା ପ୍ରକାଶ କରି କହିଛନ୍ତି ଯେ ଆଧୁନିକ ପ୍ରଯୁକ୍ତି ସହାୟତାରେ ମଧ୍ୟ ଭୂକମ୍ପର ସଠିକ ଭବିଷ୍ୟବାଣୀ ସମ୍ଭବ ନୁହେଁ। ତେଣୁ ଆପଣମାନେ ଆତଙ୍କିତ ନ ହୋଇ ସତର୍କ ରୁହିବାକୁ ପରାମର୍ଶ ଦେଇଛନ୍ତି।