ନୂଆଦିଲ୍ଲୀ ୧୭/୦୫: ଇସ୍ରୋ (ଭାରତୀୟ ମହାକାଶ ଅନୁସନ୍ଧାନ ସଂଗଠନ)ର ପିଏସ୍ଏଲ୍ଭି-ସି୬୧/ଇଓଏସ୍-୦୯ ମିଶନ ଉତ୍କ୍ଷେପଣ ତାରିଖ ଶେଷ ପର୍ଯ୍ୟାୟରେ ପହଞ୍ଚିଛି । ଆସନ୍ତା ୧୮ ତାରିଖ ସକାଳ ୫.୫୯ରେ ସତୀଶ ଧୱନ ମହାକାଶ କେନ୍ଦ୍ର ଶ୍ରୀହରିକୋଟାରୁ ଏହା ଲଞ୍ଚ୍ ହେବ । ଏହା ଇସ୍ରୋର ୧୦୧ତମ ଉତ୍କ୍ଷେପଣ । ନିକଟରେ ଜାରି ଏକ ଟାଇମ୍ଲାପ୍ସ ଭିଡିଓ ଏହି ମିଶନର ପ୍ରସ୍ତୁତିକୁ ଆହୁରି ରୋଚକ କରିଛି ।
ଭିଡିଓଟି ପିଏସ୍ଏଲ୍ଭି ରକେଟ୍କୁ ପେଲୋଡ୍ ଇଣ୍ଟିଗ୍ରେସନ୍ ଫାସିଲିଟି (ପିଆଇଏଫ୍)ରୁ ମୋବାଇଲ ସର୍ଭିସ ଟାୱାର (ଏମ୍ଏସ୍ଟି) ପର୍ଯ୍ୟନ୍ତ ନେବାର ପ୍ରକ୍ରିୟାକୁ ଦର୍ଶାଇଛି, ଯାହା ଉତ୍କ୍ଷେପଣ ପୂର୍ବରୁ ଏକ ଗୁରୁତ୍ୱପୂର୍ଣ୍ଣ ପ୍ରୟାସ । ମିଶନ୍ ପ୍ରସ୍ତୁତିର ସଠିକତା ଓ ଜଟିଳତାକୁ ମଧ୍ୟ ଏହା ଦର୍ଶାଇଛି । ପ୍ରତ୍ୟେକ ଦିଗରୁ ଏହା ଇସ୍ରୋର ଇଞ୍ଜିନିୟରିଂ କୌଶଳ, ଦଳବଦ୍ଧ କାମ ଓ ସମର୍ପଣକୁ ଦର୍ଶାଇଛି । ଏହି ପ୍ରକ୍ରିୟା ରକେଟ୍କୁ ଲଞ୍ଚ୍ ପ୍ୟାଡ୍ରେ ଅନ୍ତିମ ଏକୀକରଣ ପାଇଁ ପ୍ରସ୍ତୁତ କରିବାର ଏକ ଗୁରୁତ୍ୱପୂର୍ଣ୍ଣ ଅଂଶ । ପିଏସ୍ଏଲ୍ଭି ରକେଟ୍କୁ ସାବଧାନତାର ସହ ସ୍ଥାନାନ୍ତର କରାଯାଉଥିବା ଭିଡିଓରେ ପ୍ରଦର୍ଶିତ ହୋଇଛି ।
ପିଏସ୍ଏଲ୍ଭି-ସି୬୧ ମିଶନ ଇଓଏସ୍-୯ (ରିସାଟ୍-୧ବି) ଉପଗ୍ରହକୁ ନେଇ ଯିବ । ଏହା ଏକ ଉନ୍ନତ ରାଡାର ଇମେଜିଂ ଉପଗ୍ରହ । ଏହାର ଓଜନ ୧,୭୧୦ କିଲୋଗ୍ରାମ୍ । ସି-ବ୍ୟାଣ୍ଡ୍ ସିନ୍ଥେଟିକ୍ ଅପର୍ଚର ରାଡାର (ଏସ୍ଏଆର୍) ଏହାକୁ ଦିନ- ରାତି, ଯେକୌଣସି ପାଣିପାଗରେ ହାଇ-ରିଜୋଲ୍ୟୁସନ ଚିତ୍ର ନେବାରେ ସାହାଯ୍ୟ କରେ ।
Watch this timelapse of PSLV-C61 / EOS-09 — marking ISRO’s 101st launch — as PSLV is moved from the Payload Integration Facility (PIF) to the Mobile Service Tower (MST) at SDSC-SHAR, Sriharikota for further integration.
— ISRO (@isro) May 15, 2025
A step closer to launch on 18 May at 5:59 IST!#PSLVC61… pic.twitter.com/9uEI4oZzlo
ଇଓଏସ୍-୯ର ମୁଖ୍ୟ ଉଦ୍ଦେଶ୍ୟ କୃଷି, ଜଙ୍ଗଲ ଉପରେ ନଜର, ବିପର୍ଯ୍ୟୟ ପ୍ରବନ୍ଧନ, ସହରୀ ଯୋଜନା ଓ ରାଷ୍ଟ୍ରୀୟ ସୁରକ୍ଷା ଭଳି କ୍ଷେତ୍ରରେ ସାହାଯ୍ୟ କରିବା । ଖାସ୍କରି ପହଲଗାମ୍ ଭଳି ଘଟଣା, ଜମ୍ମୁକାଶ୍ମୀରରେ ଆତଙ୍କୀ ଆକ୍ରମଣ ଉପରେ ମଧ୍ୟ ଏହା ନଜର ରଖିପାରିବ । ସମ୍ବେଦନଶୀଳ ସୀମା ଓ ତଟୀୟ କ୍ଷେତ୍ରରେ ସୁରକ୍ଷାକୁ ଆହୁରି ବଢ଼ାଇବା ପାଇଁ ଏହି ଉପଗ୍ରହକୁ ତୁରନ୍ତ ଲଞ୍ଚ୍ କରିବାକୁ ଯୋଜନା ହୋଇଛି ।
ପିଏସ୍ଏଲ୍ଭି-ସି୬୧ ରକେଟ୍ ଇସ୍ରୋର ଏକ ବିଶ୍ୱସନୀୟ ଉତ୍କ୍ଷେପଣ ଯାନ । ଏହା ୧୦୦ରୁ ଅଧିକ ମିଶନକୁ ସଫଳତାପୂର୍ବକ ଲଞ୍ଚ୍ କରିଛି। ଏହି ରକେଟ୍ ବିଭିନ୍ନ ପ୍ରକାର ଉପଗ୍ରହକୁ କକ୍ଷକୁ ପଠାଇବା ପାଇଁ ପରିଚିତ । ଆଗାମୀ ଲଞ୍ଚ୍ ପୂର୍ବରୁ ରକେଟ୍କୁ ପିଆଇଏଫ୍ରେ ଏକୀକୃତ କରାଗଲା, ଏଥିରେ ଉପଗ୍ରହକୁ ଏହା ସହ ଯୋଡ଼ାଗଲା । ତା’ପରେ ଟାଇମ୍ଲାପ୍ସ ଭିଡିଓର ଦୃଶ୍ୟ ଅନୁସାରେ ଏହାକୁ ଏମ୍ଏସ୍ଟିକୁ ନିଆଗଲା । ସେଠାରେ ଅନ୍ତିମ ପ୍ରସ୍ତୁତି ଓ ପରୀକ୍ଷଣ କରାଗଲା ।
