ନୂଆଦିଲ୍ଲୀ,୧୬/୦୬: ଜଳୁଛି ମଧ୍ୟପ୍ରାଚ୍ୟ । ଆକାଶକୁ ଖସୁଛି ନିଆଁ ପିଣ୍ଡୁଳା । ଭୟଙ୍କର ହେଉଛି ଇରାନ୍-ଇସ୍ରାଏଲ ଯୁଦ୍ଧ । ଇସ୍ରାଏଲର ଚେତାବନୀ ସତ୍ତ୍ବେ ଇରାନ୍ ଜବାବୀ ଆକ୍ରମଣ ଜୋରଦାର କରିଛି । ଇସ୍ରାଏଲ ସେନା ଇରାନ୍ର ରାଜଧାନୀ ତେହରାନ୍ ଉପରେ ଭୟଙ୍କର ଆକ୍ରମଣ କରିଛି । ୮୦ଟି ସ୍ଥାନ ଉପରେ ଘନଘନ ମିସାଇଲ ଓ ଡ୍ରୋନ୍ ବର୍ଷା କରିଛି । ଜବାବ୍ ଦେଇ ପୁଣି ଇସ୍ରାଏଲ ରାଜଧାନୀକୁ ମିସାଇଲ ମାଡ କରିଛି ଇରାନ୍ । ଏଥିରେ ୩ ଜଣଙ୍କର ମୃତ୍ୟୁ ହୋଇଛି । ଏହାପରେ ଇରାନ୍କୁ ବହୁ ମୂଲ୍ୟ ଦେବାକୁ ପଡିବ ବୋଲି କହିଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ । ଦୁଇ ଦେଶ ଉତ୍ତେଜନା ମଧ୍ୟରେ ଇରାନ୍ ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି କି ଗତ ୩ ଦିନରେ ଇସ୍ରାଏଲ ହମାଲରେ ଇରାନ୍ର ୨୪୪ ଜଣଙ୍କର ମୃତ୍ୟୁ ହୋଇଛି । ୧୨୦୦ରୁ ଅଧିକ ଆହତ ହୋଇଛନ୍ତି ।
ମନ୍ତ୍ରଣାଳୟ ପ୍ରବକ୍ତା ହୁସେନ୍ କେରମାନପୋର କହିଛନ୍ତି, ''୬୫ ଘଣ୍ଟାର ଇସ୍ରାଏଲର ଆଟାକ୍ ପରେ ମୋଟ ୧୨୭୭ ଜଣ ଆହତ ହୋଇଛନ୍ତି । ୨୪୪ଜଣଙ୍କର ମୃତ୍ୟୁ ହୋଇଛି । ସେମାନଙ୍କ ମଧ୍ୟରେ ମହିଳା, ପୁରୁଷ ଓ ଶିଶୁ ଅଛନ୍ତି । ମୃତକଙ୍କ ମଧ୍ୟରେ ୯୦ ପ୍ରତିଶତ ସାଧାରଣ ନାଗରିକ । ଇସ୍ରାଏଲ ଆକ୍ରମଣରେ ଗୁଇନ୍ଦା ପ୍ରମୁଖ ମହମ୍ମଦ କାଜିମ ଓ ଦୁଇ ଅନ୍ୟ ଜେନେରାଲଙ୍କ ମୃତ୍ୟୁ ହୋଇଛି । ଏହାଛଡ଼ା ଉଚ୍ଚସ୍ତରୀୟ ସେନା ଅଧିକାରୀ ଏବଂ ପରମାଣୁ ବୈଜ୍ଞାନିକଙ୍କର ଜୀବନ ଯାଇଛି ।''
କଣ କହିଲା ଇସ୍ରାଏଲ ? ଇରାନ୍ ସହ ଉତ୍ତେଜନାକୁ ନେଇ ଇସ୍ରାଏଲ କହିଛି, ଶୁକ୍ରବାରଠୁ ଏବେ ଯାଏଁ ଦେଶରେ ୧୪ ଜଣଙ୍କର ମୃତ୍ୟୁ ହୋଇଛି । ୩୯୦ ଜଣ ଆହତ ହୋଇଛନ୍ତି । ଏଏଫପି ଅନୁସାରେ, ଜଣେ ବରିଷ୍ଠ ଇରାନୀ ସୈନ୍ୟ ଅଧିକାରୀ ରବିବାର ଚେତାବନୀ ଦେଇଥିଲେ କି ଇସ୍ରାଏଲ ହମଲାର ପ୍ରତିଶୋଧ ନିଆଯିବ ।
ଇରାନ୍ ଉପରେ ସୈନ୍ୟ କାର୍ଯ୍ୟାନୁଷ୍ଠାନ ଜାରି ରହିବ- ରବିବାର ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟୁାହ ଏକ ସାକ୍ଷତକାରରେ କହିଛନ୍ତି, ''ଇରାନ୍ ଉପରେ ସୈନ୍ୟ କାର୍ଯ୍ୟାନୁଷ୍ଠାନ ଜାରି ରହିବ । ଇରାନ୍ର ପରମାଣୁ ଠିକଣା ଇସ୍ରାଏଲ ପାଇଁ ବିପଦ । ତେଣୁ ତାଙ୍କୁ ଶେଷ କରିବା ଦରକାର । ଆମର ଦୁଇ ମୁଖ୍ୟ ଉଦ୍ଦେଶ୍ୟ ପୂରଣ କରିବାକୁ ଯାହା ଦରକାର ଆମେ କରିବୁ । ପ୍ରଥମ ପରମାଣୁ ଅସ୍ତ୍ରଶସ୍ତ୍ର ଶେଷ କରିବା ଓ ଦ୍ବିତୀୟ ମିସାଇଲ ଆକ୍ରମଣର ବିପଦ । ଏହି ପଦକ୍ଷେପ ଆମେ ସୁରକ୍ଷା ପାଇଁ ଉଠାଇଛୁ । କେବଳ ଆମକୁ ନୁହେଁ ଦୁନିଆକୁ ଏହି ବିପଦରୁ ବଞ୍ଚେଇବାକୁ ଚାହୁଁ । ବିଶ୍ୱର ସବୁଛୁ ବିପଦପୂର୍ଣ୍ଣ ସରକାର ପାଖରେ ସବୁଠୁ ଖତରନାକ ଅସ୍ତ୍ର ରହିବା କଥା ନୁହେଁ ।''
