ନୂଆଦିଲ୍ଲୀ,୧୬।୮: ଭାରତରେ ପରମାଣୁ କାର୍ଯ୍ୟକ୍ରମକୁ ସୁଦୂରପ୍ରସାରୀ କରିବାକୁ ଚେଷ୍ଟା ଜାରି ରହିଛି। ୧୦ ଟି ନୂତନ ନ୍ୟୁକ୍ଲିୟର ରିଆକ୍ଟର ଉପରେ କାମ ଚାଲିଥିବା ବେଳେ ଘରୋଇ କ୍ଷେତ୍ରକୁ ମଧ୍ୟ ସୁଯୋଗ ଦିଆଯାଇଛି। ଭାରତ ପରମାଣୁ ଉତ୍ପାଦନ କ୍ଷମତାକୁ ୧୦ ଗୁଣା ଅଧିକ କରିବା ଦିଗରେ ଆଗକୁ ବଢୁଛି ବୋଲି ସ୍ବାଧିନତା ଦିବସ ଅବସରରେ ଲାଲକିଲ୍ଲାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କରିଛନ୍ତି ବଡ଼ ଘୋଷଣା।
ପରମାଣୁ କାର୍ଯ୍ୟକ୍ରମରେ ସଂସ୍କାର ଆଣିବାକୁ କେନ୍ଦ୍ର ସରକାରଙ୍କ ବଡ଼ ପଦେକ୍ଷପ। ଏବେ ଘରୋଇ କ୍ଷେତ୍ରକୁ ଦିଆଗଲା ସୁଯୋଗ। ଏନେଇ ସ୍ବାଧୀନତା ଦିବସ ଅବସରରେ ପିଏମ୍ ମୋଦି କରିଛନ୍ତି ଘୋଷଣା। ସେ କହିଛନ୍ତି, ପରମାଣୁ ସମେତ ଭାରତର ସ୍ୱଚ୍ଛ ଶକ୍ତି କାର୍ଯ୍ୟକ୍ରମ ଆରମ୍ଭ ହୋଇଛି। ୧୦ଟି ନୂତନ ପରମାଣୁ ରିଆକ୍ଟର ଉପରେ କାମ ଚାଲିଛି । ଭାରତ ୨୦୪୭ ସୁଦ୍ଧା ପରମାଣୁ ଶକ୍ତି ଉତ୍ପାଦନ କ୍ଷମତାକୁ ୧୦ ଗୁଣରୁ ଅଧିକ ବୃଦ୍ଧି କରିବା ଦିଗରେ ଅଗ୍ରସର ହେଉଛି।
ଭବିଷ୍ୟତର ଶକ୍ତି ଆବଶ୍ୟକତାକୁ ଦୃଷ୍ଟିରେ ରଖି ଏଭଳି ବଡ଼ ପଦକ୍ଷେପ ନିଆଯାଇଛି। ଏହି ଲକ୍ଷ୍ୟକୁ ପୂରଣ କରିବା ପାଇଁ ଘରୋଇ କ୍ଷେତ୍ର ସହ ସହଭାଗିତା କରାଯିବ। ଏଥିପାଇଁ ଚଳିତ ଆର୍ଥିକ ବର୍ଷ କେନ୍ଦ୍ର ବଜେଟ୍ରେ ପରମାଣୁ ଶକ୍ତି ଆଇନ ଓ ପରମାଣୁ କ୍ଷତି ପାଇଁ ନାଗରିକ ଦାୟିତ୍ବ ଆଇନରେ ସଂଶୋଧନ ଆଣିବାର ପ୍ରସ୍ତାବ ଆଗତ କରାଯାଇଥିଲା। ପୂର୍ବରୁ ଏହି ଦୁଇଟି ଆଇନ ସରକାରୀ ପରମାଣୁ ଶକ୍ତି କେନ୍ଦ୍ର ପ୍ରତିଷ୍ଠା ପାଇଁ ଅଣାଯାଇଥିଲା। କିନ୍ତୁ, ବିକଶିତ ଭାରତ ୨୦୪୭ ର ସ୍ୱପ୍ନ ହାସଲ କରିବା ପାଇଁ ଘରୋଇ କ୍ଷେତ୍ରକୁ ଉତ୍ସାହିତ କରିବାର ଆବଶ୍ୟକତାକୁ ବିଚାର କରି ବର୍ତ୍ତମାନ ନୂତନ ପଦକ୍ଷେପ ନିଆଯାଉଛି। ପ୍ରଧାନମନ୍ତ୍ରୀ ମୋଦୀ କହିଛନ୍ତି, 'ପେଟ୍ରୋଲ, ଡିଜେଲ ଏବଂ ଗ୍ୟାସର ଆବଶ୍ୟକତା ପାଇଁ ଆମେ ଅନେକ ଦେଶ ଉପରେ ନିର୍ଭରଶୀଳ। ହେଲେ ଏବେ ଦେଶକୁ ଶକ୍ତି କ୍ଷେତ୍ରରେ ଆତ୍ମନିର୍ଭରଶୀଳ କରିବା ଗୁରୁତ୍ୱପୂର୍ଣ୍ଣ।'
