କେନ୍ଦ୍ରାପଡ଼ା,୩୧/୧୦: ‘କେମିତି ଅଛ? ତୁମ ବିନା ଭଲ ଲାଗୁନି । ଆଇ ଲଭ୍ ୟୁ । ଆଇ ମିସ୍ ୟୁ.. । ମୋ ପାଖକୁ ପଳାଇ ଆସ । ତୁମର ବିରହ ଯନ୍ତ୍ରଣା ସହିହେବନି । ତମ ସ୍ୱାମୀଙ୍କଠାରୁ ମୁଁ ତମକୁ ବେଶି ଭଲ ପାଏ । କେତେବେଳେ ଫାଙ୍କା ଦେଖି ଟିକେ ଆସ...’ - ଏମିତି କେତେ କ’ଣ ମନ ମତାଣିଆ କଥା କହି ପ୍ରେମିକାଙ୍କ ସହ ପ୍ରେମାଳାପ କରୁଛନ୍ତି ପ୍ରେମିକ । ଏହି ରଙ୍ଗିନ ମିଜାଜ୍ର ପ୍ରେମିକ ଆଉ କେହି ନୁହନ୍ତି, ବରଂ କେନ୍ଦ୍ରାପଡ଼ା ଜିଲ୍ଲାର ଜଣେ ପୂର୍ବତନ ଥାନାଧିକାରୀ । ସଂପୃକ୍ତ ଥାନାଧିକାରୀ ଏବେ କଟକ ଜିଲ୍ଲାର ଏକ ଥାନାରେ ଆଇଆଇସି ଭାବେ କାର୍ଯ୍ୟରତ । ଥାନାଧିକାରୀ ମହିଳାଙ୍କ ସହ ପ୍ରେମାଳାପ କରୁଥିବାର ଏକାଧିକ ଅଡିଓ ଏବେ ସୋସିଆଲ ମିଡିଆରେ ଘୂରି ବୁଲୁଛି । ଯାହା ପୁଲିସ ପ୍ରଶାସନ ପାଇଁ ମୁଣ୍ଡବ୍ୟଥାର କାରଣ ସାଜିଛି ।
ଭାଇରାଲ୍ ଅଡିଓରୁ ଯାହା ସୂଚନା ମିଳିଛି, ସମ୍ପୃକ୍ତ ମହିଳା ପୂର୍ବରୁ ଥାନାକୁ କୌଣସି ଘଟଣା ବାବଦରେ ଅଭିଯୋଗ କରିବା ପାଇଁ ଆସିଥିଲେ । ଥାନାକୁ ଏକାଧିକ ବାର ଆସିବା ମଧ୍ୟରେ କେନ୍ଦ୍ରାପଡ଼ାର ଏହି ପୂର୍ବତନ ଥାନାଧିକାରୀଙ୍କ ସହ ତାଙ୍କର ସମ୍ପର୍କ ବଢ଼ିଥିଲା । ମହିଳାଙ୍କ ଘର ଥାନାଠାରୁ ମାତ୍ର ଅଧ କିଲୋମିଟର ଦୂର ହେବ । ସମ୍ପର୍କ ଅଧିକ ଘନିଷ୍ଠ ହେବା ସହ ଦୁହେଁ ପରକୀୟା ପ୍ରୀତିରେ ଲିପ୍ତ ରହିଥିଲେ । ଏପରିକି ମହିଳା ଥାନାକୁ ଆସିଲେ ତାଙ୍କର ବେଶ୍ ଭଲ ଚର୍ଚ୍ଚା ହେଉଥିଲା । ଥାନାର ଅନ୍ୟ କର୍ମଚାରୀଙ୍କ ଉପସ୍ଥିତିରେ ମହିଳାଙ୍କ ସହ ଘଣ୍ଟା ଘଣ୍ଟା ଧରି ଗପ ମାରିବା ସହ ତାଙ୍କୁ ସେଓ, ଅଙ୍ଗୁର ଓ କାଜୁ ବାଦାମ ଖୁଆଉଥିଲେ ଥାନାଧିକାରୀ । ଫୋନ୍ରେ କଲ୍ କରି କଥା ହେବା ସହ ଭିଡିଓ କଲ୍ ମଧ୍ୟ କରୁଥିଲେ । ଏପରିକି ଏକ ଅଡିଓରେ ମହିଳାଙ୍କୁ ଥାନାଧିକାରୀ ସମ୍ପର୍କ ରଖିବା ନାଁରେ ବାରିପଦା ବୁଲିବାକୁ ମଧ୍ୟ ଡାକୁଥିବା ଶୁଣାଯାଉଛି ।
ମହିଳାଙ୍କର ମଧ୍ୟ ଏଥିରେ ସମ୍ମତି ଥିବା ଜଣାପଡୁଛି । ତେବେ ମହିଳା ଜଣଙ୍କ ସ୍ମାର୍ଟଫୋନ୍ର ବ୍ୟବହାର ବାବଦରେ ସବିଶେଷ ଜାଣିନଥିବାରୁ ଏହାର ସୁଯୋଗ ନେଇଥିଲେ ତାଙ୍କ ଝିଅ । ତାଙ୍କ ଝିଅ ସ୍ଥାନୀୟ ଅଞ୍ଚଳର ଜଣେ ଯୁବକଙ୍କୁ ଭଲ ପାଉଥିଲେ । ନିଜର ପତିଆରା ଦେଖାଇବାକୁ ଥାନାଧିକାରୀଙ୍କ ସହ ତାଙ୍କ ପରିବାରର ଭଲ ସମ୍ପର୍କ ଥିବା କଥା କହିଥିଲେ । ଥନାଧିକାରୀଙ୍କ ସହ ତାଙ୍କ ମା’ଙ୍କ ନିବିଡ଼ତା ବିଷୟରେ ପ୍ରମାଣିତ କରିବାକୁ ଯାଇ ପ୍ରେମିକଙ୍କ ପାଖକୁ ତାଙ୍କ ମା’-ଆଇଆଇସିଙ୍କ ବାର୍ତ୍ତାଳାପର କେତେକ ଅଡିଓ ପଠାଇ ଦେଇଥିଲେ । ଯାହାକୁ ପରେ ସମ୍ପୃକ୍ତ ପ୍ରେମିକ ଭାଇରାଲ୍ କରିଦେଇଥିଲେ । ପରେ କଥା ଥାନାଧିକାରୀ ଓ ତାଙ୍କ ପତ୍ନୀଙ୍କ ପାଖରେ ମଧ୍ୟ ପହଞ୍ଚିଥିଲା । ଏ ବିଷୟରେ ଖବର ପାଇବା ପରେ ଥାନାଧିକାରୀଙ୍କ ଦାମ୍ପତ୍ୟ ଜୀବନରେ ମଧ୍ୟ କଳହ ସୃଷ୍ଟି ହୋଇଥିବା ଜଣାଯାଇଛି । ଥାନାଧିକାରୀଙ୍କ ଚୋରା ପୀରତି ବିଷୟରେ ଜଣାପଡ଼ିବା ପରେ ସେ ଏହାକୁ କୌଣସି ମତେ ରଫାଦଫା କରିବାକୁ ଉଦ୍ୟମ କରିଥିଲେ ।
ପ୍ରକାଶ ଥାଉକି, ସମ୍ପୃକ୍ତ ଥାନାଧିକାରୀ କେନ୍ଦ୍ରାପଡ଼ା ଜିଲ୍ଲାରେ କାର୍ଯ୍ୟରତ ଥିବା ବେଳେ ବିଭିନ୍ନ ମାମଲାରେ ବିବାଦୀୟ ହୋଇପଡ଼ିଥିଲେ । ସଂପୃକ୍ତ ଥାନାଧିକାରୀ କେନ୍ଦ୍ରାପଡ଼ା ଜିଲ୍ଲାର ଏକାଧିକ ଥାନାରେ କାମ କରିଛନ୍ତି।
