ନୂଆଦିଲ୍ଲୀ : ୟୁକ୍ରେନ୍-ରୁଷ୍ ଯୁଦ୍ଧକୁ ଏବେ ପାଖାପାଖି ୩ ବର୍ଷ ପୂରିବ। ଉଭୟ ଦେଶ ପରସ୍ପର ଉପରେ ହମଲା ଜାରି ରଖିଛନ୍ତି। ଏହି ଯୁଦ୍ଧକୁ ଦୀର୍ଘ ଦିନ ଧରି ଜାରି ରଖିବାର ରୁଷ୍ ଉପରେ ହେଉଛି ଅଭିଯୋଗ। ଏହି ମଧ୍ୟରେ ରୁଷୀୟ ମିଡ଼ିଆର ରିପୋର୍ଟରେ କୁହାଯାଇଛି ଯେ, ରୁଷ୍ର ବିମାନ ଉଦ୍ୟୋଗ ସଦ୍ୟ ଏକ ବଡ଼ ସଙ୍କଟରେ ଫସିବାକୁ ଯାଉଛି। ରୁଷୀୟ ଦୈନିକ ଇଜଭେଷ୍ଟିଆର ଏକ ରିପୋର୍ଟରେ କୁହାଯାଇଛି ଯେ, ରୁଷ୍ର ୩୦ଟି ଏୟାରଲାଇନ୍ କମ୍ପାନୀ ଦେବାଳିଆ ହେବାର ସ୍ଥିତିରେ ପହଞ୍ଚି ଯାଇଛି। ଏହି ୩୦ଟି କମ୍ପାନୀ ସାମୂହିକ ଭାବେ ଘରୋଇ ଯାତ୍ରୀ ଯାତାୟାତର ୨୫ ପ୍ରତିଶତ ବହନ କରେ ,କିନ୍ତୁ ଆର୍ଥିକ ବୋଝର ବୃଦ୍ଧି କାରଣରୁ ଆସନ୍ତା ବର୍ଷ ୨୦୨୫ସୁଦ୍ଧା ଦେବାଳିଆ ହୋଇପାରେ।
ଦେବାଳିଆର ସମ୍ମୁଖୀନ ହେଉଥିବା ଏହି ବିମାନ କମ୍ପାନୀ ଗୁଡ଼ିକ କ୍ଷୁଦ୍ର ଓ ମଧ୍ୟମ ଆକାର, ଯେଉଁମାନେ ବିଦେଶୀ ବିମାନ ଗୁଡ଼ିକୁ ଲିଜ୍ରେ ନେଇଛନ୍ତି। ଏହି କାରଣରୁ ଏହା ଉପରେ ଖୁବ୍ କରଜର ବୋଝ ରହିଛି। ୟୁକ୍ରେନ୍ ସହ ଯୁଦ୍ଧ ଆରମ୍ଭ ହେବା ପରେ ପାଶ୍ଚାତ ଦେଶ ଗୁଡ଼ିକ ରୁଷିଆ ଉପରେ ଆର୍ଥିକ ପ୍ରତିବନ୍ଧକ ଲଗାଇଛନ୍ତି, ଯେଉଁଥି ପାଇଁ ସେମାନେ ଆର୍ଥିକ କ୍ଷତି ସହୁଛନ୍ତି। ୩୦ଟି କମ୍ପାନୀ ମଧ୍ୟରୁ ଅଧିକାଂଶ କମ୍ପାନୀମାନେ ବିମାନ ଲିଜ୍ର ଉପରେ କିସ୍ତି ଦେବା ବନ୍ଦ କରି ଦେଇଛନ୍ତି , ସେଥିପାଇଁ ସେମାନଙ୍କର ଋଣ ଭାର ଆହୁରି ବୃଦ୍ଧି ପାଇଛି। ଯଦିଓ ରାଷ୍ଟ୍ରପତି ପୁଟିନ ଏହି କମ୍ପାନୀଗୁଡ଼ିକୁ ରିଲିଫ ଯୋଗାଇବା ପାଇଁ କିଛି ଋଣ ଛାଡ଼ ଯୋଜନା କରିଛନ୍ତି। ତଥାପି ଏହି କମ୍ପାନୀ ଗୁଡ଼ିକ ଉପରେ ଟାକ୍ସର ବୋଝ ବଢି ଯାଇଛି।
ରିପୋର୍ଟରେ କୁହାଯାଇଛି କି, ଯଦି ସରକାର ଏହି ଏୟାରଲାଇନ କମ୍ପାନୀଗୁଡ଼ିକର ଋଣକୁ ଛାଡ଼ କରନ୍ତି, ତେବେ ସେହି ରାଶିରେ ସେମାନଙ୍କୁ ୨୫ ପ୍ରତିଶତ ପର୍ଯ୍ୟନ୍ତ ଟିକସ ଦେବାକୁ ପଡ଼ିବ। ଏଥିରେ ବିମାନ କମ୍ପାନୀ ଗୁଡ଼ିକ ଉପରେ ବୋଝ ଆହୁରି ବଢି ଯିବ। ଏଥିରୁ ଅଧିକାଂଶ କମ୍ପାନୀମାନେ ବରମୁଡା , ଆୟରଲାଣ୍ଡ ଓ ୟୁରୋପରେ ରେଜିଷ୍ଟର୍ଡ ହୋଇଛନ୍ତି।
