ଭୁବନେଶ୍ବର, ୨।୪: ଖାରବେଳ ଥାନା ଅଞ୍ଚଳରେ ହୋଇଥିବା ଅପହରଣ ଘଟଣାର ପର୍ଦ୍ଦାଫାଶ ହୋଇଛି । ଅପହୃତ ଯୁବକକୁ ଭରତପୁର ଅଞ୍ଚଳର ଏକ ହୋଟେଲରୁ ଉଦ୍ଧାର କଲା ଖାରବେଳନଗର ଥାନା ପୋଲିସ । ଅପହୃତ ଯୁବକ ହେଲେ ଜଗତସିଂହପୁର ଅଞ୍ଚଳର ସୋମନାଥ ସ୍ବାଇଁ ବୋଲି ଜଣାପଡ଼ିଛି । ପ୍ରେମିକକୁ ଅପହରଣ ଅଭିଯୋଗରେ ପ୍ରେମିକା ସମେତ ୫ ଗିରଫ ହୋଇଛନ୍ତି ।
ଘଟଣା ଏପରିକି, ସୋମନାଥ ଭୁବନେଶ୍ବର ଝାରପଡ଼ା ଅଞ୍ଚଳରେ ନିଜ ପ୍ରେମିକା ସହ ଲିଭ ଇନରେ ରହୁଥିଲେ । ଅନ୍ୟ ଯୁବକଙ୍କ ସହ ତାଙ୍କ ପ୍ରେମିକା ସମ୍ପର୍କରେ ଥିବା ସୋମନାଥ ଜାଣିବାକୁ ପାଇଥିଲେ । ପ୍ରେମିକାର ଚରିତ୍ରକୁ ସନ୍ଦେହ କରି ବାରମ୍ବାର ମାରପିଟ୍ କରି ତାଙ୍କୁ ଲହୁଲୁହାଣ କରୁଥିଲେ । ପ୍ରତିଶୋଧ ନେବା ଉଦ୍ଦେଶ୍ୟରେ ପ୍ରେମିକା ଜଣକ ନିଜ ଭଉଣୀର ପ୍ରେମିକକୁ କହି ସୋମନାଥକୁ ଅପହରଣ କରିଥିଲେ । ଭଉଣୀର ପ୍ରେମିକ ଆକାଶ ପରିଡ଼ା ସୋମନାଥଙ୍କୁ ଅପହରଣ କରି ଭରତପୁର ଥାନା ଅଞ୍ଚଳରେ ଏକ ହୋଟେଲରେ ରଖିଥିଲେ । ଖେବଳ ଏତିକି ନୁହେଁ, ସୋମନାଥଙ୍କୁ ଅପହରଣ କରି ତାଙ୍କ ଘର ଲୋକଙ୍କଠାରୁ ୫ ଲକ୍ଷ ଟଙ୍କା ଦେବାକୁ ଦାବି କରିଥିଲେ । ଏନେଇ ସୋମନାଥଙ୍କ ପରିବାର ପକ୍ଷରୁ ଖାରବେଳନଗର ଥାନାରେ ଅଭିଯୋଗ କରିଥିଲେ । ପରେ ତଦନ୍ତ କରି ଆକାଶ ପରିଡ଼ାଙ୍କ ସହ ୪ ଜଣଙ୍କୁ ଗିରଫ କରିଛି ସ୍ପେଶାଲ ସ୍ବାର୍ଡ । ପ୍ରେମିକାଙ୍କ ଘର ଝାଡ଼ଖଣ୍ଡରେ ବୋଲି ଜଣାପଡ଼ିଛି ।
