ଭୁବନେଶ୍ୱର,୦୩/୦୪: ଓଡ଼ିଶା ବିଧାନସଭା ଇତିହାସରେ ଯୋଡି ହେଲା ଏକ ନୂଆ ଫର୍ଦ୍ଦ। ରାତି ସାରା ଚାଲିଲା ଗୃହ। ସାଢ଼େ ୧୨ ଘଣ୍ଟା ଆଲୋଚନା ପରେ ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ବିଲ୍ ୨୦୨୪ ବିଲ୍ ଗୃହୀତ ହୋଇଛି। ମୂଳ ବିଲ୍ରେ ମୋଟ ୧୮ଟି କ୍ଲଜ ଏବଂ ଗୋଟିଏ ଅନୁସୂଚୀ ରହିଥିବା ବେଳେ, ସଂଶୋଧନ ବିଲ୍ରେ ୧୨ଟି କ୍ଲଜରେ ସଂଶୋଧନ ପ୍ରସ୍ତାବ ରଖା ଯାଇଥିଲା । ପ୍ରତ୍ୟେକ ସଂଶୋଧନ ପ୍ରସ୍ତାବ ଉପରେ ବିରୋଧୀ ଦଳ ପକ୍ଷରୁ ଶଙ୍କା ଆଶଙ୍କା ପ୍ରକାଶ କରି ସରକାରଙ୍କୁ ସ୍ପଷ୍ଟୀକରଣ ମଗାଯାଇଥିଲା ଏବଂ ସରକାରଙ୍କ ପକ୍ଷରୁ ଉତ୍ତର ଦିଆଯାଇଥିଲା। ପରିଶେଷରେ ବିରୋଧୀ ସଦସ୍ୟଙ୍କ ସମସ୍ତ ସଂଶୋଧନ ପ୍ରସ୍ତାବ କାଟ ଖାଇଥିଲା । ବିରୋଧୀ ଯୁକ୍ତି ରଖିଥିଲେ ଯେ, କୁଳାଧିପତିଙ୍କ କ୍ଷମତା ସଙ୍କୁଚିତ ହେବ। ସିନେଟ୍ ବ୍ୟବସ୍ଥା ଅର୍ଥହୀନ । ତେବେ ଶାସକ ସଭ୍ୟ ଯୁକ୍ତି ରଖିଥିଲେ ଯେ, ରାଜନୈତିକ ଉଦ୍ଦେଶ୍ୟରେ ପୂର୍ବ ସରକାର ଆଇନରେ ସଂଶୋଧନ ଆଣିଥିଲେ। ଉଚ୍ଚ ଶିକ୍ଷା ହେବ ସର୍ବବ୍ୟାପୀ ଏବଂ ସର୍ବସ୍ପର୍ଶୀ
ଓଡ଼ିଶା ବିଶ୍ଵବିଦ୍ୟାଳୟ ସଂଶୋଧନ ବିଲ ୨୦୨୪ ଅନୁଯାୟୀ - ସିନେଟ ବ୍ୟବସ୍ଥା ପୁନଃ ସ୍ଥାପନ ହେବ। ସିନେଟରେ ଛାତ୍ର ପ୍ରତିନିଧି,୪ ଜଣ ବିଧାୟକ, ସ୍ଥାନୀୟ ସାଂସଦଙ୍କ ସହ, ଶିକ୍ଷାବିତ ଓ ବିଭିନ୍ନ କ୍ଷେତ୍ରର ବ୍ୟକ୍ତି ବିଶେଷ ବି ରହିବେ। ସେହିପରି କୁଳପତି ନିଯୁକ୍ତି କମିଟିରେ ରହିବେ ୩ ସଦସ୍ୟ । ଉଚ୍ଚଶିକ୍ଷା କ୍ଷେତ୍ରରେ ସରକାରଙ୍କ ଦ୍ଵାରା ସୁପାରିଶ କରାଯାଇଥିବା ଜଣେ ସଦସ୍ୟଙ୍କୁ ଅଧ୍ୟକ୍ଷ ମନୋନୀତ କରିବେ କୁଳାଧିପତି। ବିଶ୍ଵବିଦ୍ୟାଳୟ ସିଣ୍ଡିକେଟ ଗଠନ କରାଯିବ। ଜଣେ ଯୁଗ୍ମ ସଚିବ ପାହ୍ୟାର ଅଧିକାରୀ, ଉଚ୍ଚଶିକ୍ଷା ବିଭାଗ ନିର୍ଦ୍ଦେଶକ କିମ୍ବା ତାଙ୍କ ପ୍ରତିନିଧିଙ୍କ ସହ ବି ୧୭ ଜଣ ଶିକ୍ଷାବିତ୍ ସଦସ୍ୟ ରହିବେ। କୁଳପତିଙ୍କ ବୟସ ସୀମା ୬୭ ବର୍ଷରୁ ୭୦ ବର୍ଷକୁ ବୃଦ୍ଧି। ପୁନଃ ନିଯୁକ୍ତି ପ୍ରକ୍ରିୟା ବ୍ୟବସ୍ଥା ବି ରହିବ। କୁଳପତିଙ୍କ ଦାୟିତ୍ଵ ସରିବାର ୬ ମାସ ପୂର୍ବରୁ ନୂଆ ନିଯୁକ୍ତି ପ୍ରକ୍ରିୟା ଆରମ୍ଭ ହେବ। ରେଜିଷ୍ଟର ଓ କଣ୍ଟ୍ରୋଲର ଅଫ ଫାଇନାନ୍ସଙ୍କ କାର୍ଯ୍ୟକାଳ ୩ ବର୍ଷ ରହିବ। ପୁର୍ବରୁ କୌଣସି ସମୟ ସୀମା ନଥିଲା। ବିଶ୍ଵବିଦ୍ୟାଳୟର ପ୍ରଫେସର, ସହକାରୀ ପ୍ରଫେସର ନିଯୁକ୍ତ କରିବେ କୁଳପତି। ପୁର୍ବରୁ OPSC ଚୟନ ନେଇ ବ୍ୟବସ୍ଥା ଥିଲା। ନନ ଟିଚିଂ ଷ୍ଟାଫ ଚୟନ କରୁଥିଲା ଓଡ଼ିଶା ଷ୍ଟାଫ ସିଲେକ୍ସନ୍।
ବୁଧବାର ଅପରାହ୍ନରେ ଓଡ଼ିଶା ବିଶ୍ୱବିଦ୍ୟାଳୟ (ସଂଶୋଧନ) ବିଲ୍ ୨୦୨୪କୁ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୁରଜ୍ ଉପସ୍ଥାପନ କରି କହିଥିଲେ, ଚାଲୁ ରହିଥିବା ଆଇନ ଯୋଗୁଁ ଦୀର୍ଘଦିନ ଧରି ବିଭିନ୍ନ ବିଶ୍ୱବିଦ୍ୟାଳୟରେ କୁଳପତି ପଦବି ଖାଲି ପଡ଼ିଥିଲା । ଆଇନର ଯେଉଁ କଥାକୁ ୟୁଜିସି ବିରୋଧ କରିଥିଲା, ଆମେ ସେଥିରେ ସଂଶୋଧନ ଆଣିଛୁ । ଏବେ ସିଣ୍ଡିକେଟ ବୈଠକ ପାଇଁ କୁଳପତିଙ୍କୁ ଅଫିସରଙ୍କ ଅନୁମତି ଆଣିବାକୁ ପଡୁଛି । ଅଫିସରଙ୍କୁ କୁଳପତି ନିଯୁକ୍ତି ଦେଉଥିବାରୁ ବିଶ୍ୱବିଦ୍ୟାଳୟର ସ୍ୱାୟତ୍ତତା ରହୁନାହିଁ । ଏବେ ଅଧ୍ୟାପକ ନିଯୁକ୍ତି ୟୁଜିସିର ନିୟମ ଅନୁଯାୟୀ ହେବ । ୨୦୨୦ ବିଶ୍ୱବିଦ୍ୟାଳୟ ଆଇନକୁ ସମ୍ପୂର୍ଣ୍ଣ ବଦଳାଉନୁ । ଅଣ ଶିକ୍ଷକ ପଦବି ପାଇଁ ନିଯୁକ୍ତି ପୁରୁଣା ବ୍ୟବସ୍ଥାରେ ହେବ ।
ବିଲ୍ ଆଲୋଚନା ଆରମ୍ଭ କରି ବିଜେଡି ସଭ୍ୟ ରଣେନ୍ଦ୍ର ପ୍ରତାପ ସ୍ୱାଇଁ କହିଲେ, କେନ୍ଦ୍ର ସରକାର ୨୯ ଜୁଲାଇ ୨୦୨୦ରେ ଜାତୀୟ ଶିକ୍ଷାନୀତି ଆଣିଥିଲେ । ଜାତୀୟ ଶିକ୍ଷାନୀତି ଉପରୁ ଆକର୍ଷଣୀୟ ଦେଖାଯାଉଥିଲେ ମଧ୍ୟ ଶିକ୍ଷାର ଘରୋଇକରଣ ପାଇଁ ଆସିଛି । ବିଭିନ୍ନ ବିଶ୍ୱବିଦ୍ୟାଳୟରେ ଅଧ୍ୟାପକ, ପ୍ରଫେସର ପଦବି କୋର୍ଟ ମାମଲାରୁ ଦୀର୍ଘ ବର୍ଷ ଧରି ପୂରଣ ହୋଇପାରିଲାନି । ତତ୍କାଳୀନ କୁଳାଧିପତି ପ୍ରଫେସର ଗଣେଶୀଲାଲ ତାଙ୍କ ସଚିବଙ୍କ ଦ୍ୱାରା ମୁଖ୍ୟ ସଚିବଙ୍କୁ ଚିଠି ଲେଖିଥିଲେ ଯେ, କୌଣସି ସରକାରୀ ଏଜେନ୍ସି ଦ୍ୱାରା ବିଶ୍ୱବିଦ୍ୟାଳୟରେ ନିଯୁକ୍ତି ପ୍ରକ୍ରିୟା କରାଯାଉ । ଏହାପରେ ୨୦୨୦ ନଭେମ୍ବର ମାସରେ ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ଆଇନ ୨୦୨୦ ଆସିଥିଲ । ଓପିଏସସି ମାଧ୍ୟମରେ ନିଯୁକ୍ତି ପ୍ରକ୍ରିୟା ଆରମ୍ଭ ହେଲା । ଏହାକୁ ବିରୋଧ କରି ମାମଲା ସୁପ୍ରିମକୋର୍ଟରେ ଗଡ଼ୁଛି । ରାଜ୍ୟ ସରକାର କିପରି ଏହି ସଂଶୋଧନ ଆଣୁଛନ୍ତି? କେନ୍ଦ୍ର ସରକାର ବି ୟୁଜିସି ନିୟମରେ ସଂଶୋଧନ କରିବାକୁ କୋର୍ଟରୁ ସମୟ ନେଇଛନ୍ତି । ତେଣୁ ଏହି ବିଲ୍ ପାଇଁ ଅଧିକ ସମୟ ନିଆଯାଉ । ସିଲେକ୍ଟ କମିଟିକୁ ପଠାଯାଉ ।
ଡ. ଅରୁଣ ସାହୁ କହିଲେ, ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ଆଇନ ୨୦୨୦ରେ ବିଶ୍ୱବିଦ୍ୟାଳୟର ସ୍ୱାୟତ୍ତତା ନଷ୍ଟ ହେଉଛି ବୋଲି ସରକାର କହୁଛନ୍ତି । ଏନେଇ ସରକାର ପ୍ରମାଣ ଦେଇପାରିବେ କି? ଓଡ଼ିଶା ବିଶ୍ୱବିଦ୍ୟାଳୟ (ସଂଶୋଧନ) ବିଲ୍ ୨୦୨୪କୁ ତରବରିଆ ଭାବେ ଗୃହୀତ କରାନଯାଉ । ଜାତୀୟ ଶିକ୍ଷା ନୀତିରେ ଯାହା ଅଛି, ଏହି ବିଲ୍ ତାହା ବିରୋଧରେ ଯାଉଛି । ଯଦି ଓପିଏସସି ଦ୍ୱାରା ନିଯୁକ୍ତି ପ୍ରକ୍ରିୟା ଭୁଲ, ତେବେ ସରକାର ଏହି ବିଲରେ ସଂଶୋଧନ ଆଣିବା ପରେ, ବିଭିନ୍ନ ବିଶ୍ୱବିଦ୍ୟାଳୟରେ ନିଯୁକ୍ତି ପାଇଥିବା ୨୧୫ ଜଣଙ୍କୁ ଚାକିରିରୁ କଣ ବିଦା କରିଦେବେ? ଏମିତି କଣ ଦରକାର ପଡ଼ିଲା ଯେ ଏବେ ୪ ବର୍ଷରେ ସଂଶୋଧନର ଆବଶ୍ୟକତା ପଡୁଛି? ବିଲ ନେଇ ଅଧିକ ତର୍ଜମା କରିବାକୁ ସେ ଦାବି କରିଥିଲେ । ବିରୋଧୀ ଦଳ ପକ୍ଷରୁ ଗଣେଶ୍ୱର ବେହେରା, ଧ୍ରୁବ ଚରଣ ସାହୁ, ଦେବୀ ରଞ୍ଜନ ତ୍ରିପାଠୀ, ରମେଶ ଚନ୍ଦ୍ର ବେହେରା, ଗୌତମବୁଦ୍ଧ ଦାସ, ବ୍ୟୋମକେଶ ରାୟ ଆଲୋଚନାରେ ଭାଗ ନେଇଥିଲେ ।
ଶାସକ ଦଳ ପକ୍ଷରୁ ଟଙ୍କଧର ତ୍ରିପାଠୀ ଆଲୋଚନା ଆରମ୍ଭ କରି କହିଲେ, ଏହି ବିଲ୍ ଶିକ୍ଷାନୁଷ୍ଠାନର ସ୍ୱାୟତ୍ତତା ବଜାୟ ରଖିବ । ଉଚ୍ଚଶିକ୍ଷାକୁ ସର୍ବସ୍ପର୍ଶୀ ଓ ସର୍ବବ୍ୟାପୀ କରିବ । ପୂର୍ବରୁ ରାଜନୈତିକ ଉଦ୍ଦେଶ୍ୟ ରଖି ଆଇନରେ ସଂଶୋଧନ ଅଣାଯାଇଥିଲା । କୁଳପତି ନିଯୁକ୍ତି କମିଟିରେ ଜଣେ ଶିକ୍ଷାବିତ୍ଙ୍କୁ ନରଖି ଜଣେ ଅବସରପ୍ରାପ୍ତ ମୁଖ୍ୟ ଶାସନସଚିବ ପାହ୍ୟାର ଅଫିସରଙ୍କୁ ରଖିବା ବ୍ୟବସ୍ଥା ଅଛି । ସଂଶୋଧନ କରି ଆମେ ଶିକ୍ଷାବିତ୍ଙ୍କୁ ରଖିବା ବ୍ୟବସ୍ଥା କରିଛୁ । କୁଳପତିଙ୍କର ଅବସର ବୟସ ୬୫ ରୁ ୭୦ ବର୍ଷ ପର୍ଯ୍ୟନ୍ତ ବୃଦ୍ଧି କରାଯାଇଛି । କୁଳପତିଙ୍କ ପୁନଃ ନିଯୁକ୍ତି ବ୍ୟବସ୍ଥା, କୁଳସଚିବ ଏବଂ ପରୀକ୍ଷା ନିୟନ୍ତ୍ରକଙ୍କ କାର୍ଯ୍ୟକାଳ ୩ ବର୍ଷ ଧାର୍ଯ୍ୟ କରାଯାଇଛି ।
ଇରାଶିଷ ଆଚାର୍ଯ୍ୟ କହିଥିଲେ, ରାଜ୍ୟ ସରକାରଙ୍କ ଅଧିକାର ଅଛି, କୋର୍ଟରେ କେସ ଚାଲିଥିଲେ ବି ବିଧେୟକ ଆଣିପାରିବେ । କୋର୍ଟଙ୍କ ବିନା ଅନୁମତିରେ ନୂଆ ଆଇନ ତିଆରି କରିପାରିବେ । ଶାସକ ଦଳ ପକ୍ଷରୁ ଅମର ନାୟକ, ସନ୍ତୋଷ ଖଟୁଆ, ସିଦ୍ଧାନ୍ତ ମହାପାତ୍ର, ବାବୁ ସିଂ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ ।
