ନୂଆଦିଲ୍ଲୀ: ଆନ୍ତର୍ଜାତୀୟ ଆତଙ୍କବାଦ ଅର୍ଥ ଯୋଗାଣ ନିୟନ୍ତ୍ରଣ ସଂସ୍ଥା ଫାଇନାନସିଆଲ ଆକ୍ସନ ଟାସ୍କ ଫୋର୍ସ (FATF) ଜମ୍ମୁ ଓ କାଶ୍ମୀରର ପହଲଗାମରେ ଏପ୍ରିଲ ୨୨ ତାରିଖରେ ହୋଇଥିବା ଆତଙ୍କବାଦୀ ଆକ୍ରମଣକୁ ଦୃଢ଼ ଭାବେ ନିନ୍ଦା କରିଛି। ଏହି ଆକ୍ରମଣରେ ୨୬ ଜଣ ପର୍ଯ୍ୟଟକ ନିହତ ହୋଇଛନ୍ତି। FATF କହିଛି ଯେ ଏହି ଆତଙ୍କୀ ଆକ୍ରମଣ ଆର୍ଥିକ ସହାୟତା ଓ ଅର୍ଥ ପରିଚାଳନା ବିନା ସମ୍ଭବ ହୋଇପାରି ନଥାନ୍ତା।

ଏକ ବିବୃତିରେ FATF କହିଛି, "ଆତଙ୍କବାଦୀ ଆକ୍ରମଣ ଦୁନିଆରେ ମୃତ୍ୟୁ, ଆହତ ଓ ଭୟର ବାତାବରଣ ସୃଷ୍ଟି କରେ। ପହଲଗାମରେ ହୋଇଥିବା ଏହି ନିର୍ମମ ଆକ୍ରମଣକୁ ଆମେ କଡା ନିନ୍ଦା କରୁଛୁ। ଏହା ସହ ଅନ୍ୟାନ୍ୟ ଆକ୍ରମଣ ଆର୍ଥିକ ସହାୟତା ଓ ଅର୍ଥ ପରିଚାଳନା ବିନା ହୋଇପାରେ ନାହିଁ।"

ଏହି ଆକ୍ରମଣରେ ପାକିସ୍ତାନର ସମ୍ପୃକ୍ତି ଥିବା ନେଇ ଭାରତ ଅଭିଯୋଗ କରିଛି। ଭାରତ ଦାବି କରିଛି ଯେ ପାକିସ୍ତାନ ଆତଙ୍କବାଦୀମାନଙ୍କୁ ଆଶ୍ରୟ ଦେଉଛି ଏବଂ ଆନ୍ତର୍ଜାତୀୟ ଆର୍ଥିକ ସହାୟତାକୁ ଅସ୍ତ୍ର କ୍ରୟ ପାଇଁ ବ୍ୟବହାର କରୁଛି। FATF ର ଏହି ବିବୃତି ପରେ ଭାରତ ପାକିସ୍ତାନକୁ ପୁନର୍ବାର FATF ର 'ଗ୍ରେ ଲିଷ୍ଟ' ରେ ସାମିଲ କରିବା ପାଇଁ ଏକ ବିସ୍ତୃତ ରିପୋର୍ଟ ପ୍ରସ୍ତୁତ କରୁଛି। ଯାହା ଆଗାମୀ ଏସିଆ ପେସିଫିକ ଗ୍ରୁପ (APG) ବୈଠକ ଓ FATF ପ୍ଲେନାରୀ ବୈଠକରେ ଉପସ୍ଥାପନ କରାଯିବ।

ଏହା ପୂର୍ବରୁ ପାକିସ୍ତାନକୁ ୨୦୧୮ ରୁ ୨୦୨୨ ପର୍ଯ୍ୟନ୍ତ 'ଗ୍ରେ ଲିଷ୍ଟ' ରେ ଲାମିଲ କରାଯାଇ ଥିଲା । ତେବେ FATFର ଏହି ନିଶ୍ପତ୍ତି ପାକିସ୍ତାନର ଆର୍ଥିକ ନିୟନ୍ତ୍ରଣ ଓ ବିଦେଶୀ ନିବେଶ ଉପରେ ଗଭୀର ପ୍ରଭାବ ପକାଇଥିଲା।

ଏହି ଆକ୍ରମଣ ପରେ ଭାରତ ପାକିସ୍ତାନ ବିରୋଧରେ ଅନେକ କୂଟନୈତିକ ପଦକ୍ଷେପ ଗ୍ରହଣ କରିଛି। ଯେପରି ସିନ୍ଧୁ ଜଳ ଚୁକ୍ତି ସ୍ଥଗିତ, ଅଟାରୀ-ବାଘା ସୀମା ବନ୍ଦ ଓ ପାକିସ୍ତାନୀ ନାଗରିକଙ୍କ ପାଇଁ ଭିସା ସେବା ବାତିଲ କରାଯାଇଛି।