ନୂଆଦିଲ୍ଲୀ,୦୯/୦୬: ଜାପାନକୁ ଟପି ଭାରତ ଖୁବ୍ଶୀଘ୍ର ବିଶ୍ୱର ଚତୁର୍ଥ ବୃହତ୍ ଅର୍ଥନୀତି ପାଲଟିବାକୁ ଯାଉଛି । ଏହି ଖବରକୁ ନେଇ ଦେଶବାସୀ ଖୁସି ହେଉଛନ୍ତି । କିନ୍ତୁ ବାସ୍ତବରେ କ’ଣ ଏହା ଖୁସିର ବିଷୟ । ବିଶେଷଜ୍ଞଙ୍କ ମତରେ, ଏହାକୁ ନେଇ ଅଧିକ ଖୁସି ହେବା ଉଚିତ ନୁହେଁ । ଯଦିଓ ଅର୍ଥନୀତିର ଆକାର କ୍ଷେତ୍ରରେ ଭାରତ ଜାପାନକୁ ପଛରେ ପକାଇବାକୁ ଯାଉଛି, ମୁଣ୍ଡ ପିଛା ଆୟ କ୍ଷେତ୍ରରେ ଦେଶ ଜାପାନଠୁ ବହୁ ତଳେ ।
ବିଶ୍ୱ ଅର୍ଥନୈତିକ ଫୋରମ୍ର ପୂର୍ବତନ ପରିଚାଳନା ନିର୍ଦ୍ଦେଶକ କ୍ଲାଉଡ୍ ସ୍ମାଦଜା କହିଛନ୍ତି ଯେ, ଭାରତୀୟ ଅର୍ଥବ୍ୟବସ୍ଥାର ଆକାର ବହୁତ ବଡ଼, ଏଥିରେ ଦୁଇ ମତ ନାହିଁ । କିନ୍ତୁ ମୁଣ୍ଡ ପିଛା ଜିଡିପି କ୍ଷେତ୍ରରେ ଏହା ଜାପାନଠାରୁ ବହୁ ପଛରେ ରହିଛି । ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) ଅନୁସାରେ, ୨୦୨୫ ଏପ୍ରିଲ ସୁଦ୍ଧା ଭାରତର ମୁଣ୍ଡ ପିଛା ଜିଡିପି ୨,୮୭୮.୪ ଡଲାର ବା ୨.୫ ଲକ୍ଷ ଟଙ୍କା ରହିଛି । ଏହା ଜାପାନର ମୁଣ୍ଡ ପିଛା ଜିଡିପିର ମାତ୍ର ୮.୫% ।
ପ୍ରକାଶଯୋଗ୍ୟ, ଜାପାନର ମୁଣ୍ଡ ପିଛା ଜିଡିପି ରହିଛି ୩୩,୯୫୫.୭ ଡଲାର ବା ୨୯ ଲକ୍ଷ ଟଙ୍କା । ଏହାର ଅର୍ଥ, ଜାପାନର ମୁଣ୍ଡ ପିଛା ଆୟ ଭାରତଠାରୁ ପ୍ରାୟ ୧୧.୮ ଗୁଣା ଅଧିକ । ସ୍ମାଦଜାଙ୍କ ଅନୁସାରେ, ଭାରତୀୟ ଅର୍ଥବ୍ୟବସ୍ଥାର ଆକାର ଏକ ଭଲ ସଂକେତ । ଏଥିରୁ ଜଣାପଡୁଛି ଯେ, ବିଶ୍ୱ ସ୍ତରରେ ଭାରତର ଆର୍ଥିକ ଓଜନ କେତେ । କିନ୍ତୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ, ଦେଶର ମୁଣ୍ଡ ପିଛା ଆୟ କେତେ । ସ୍ମାଦଜା କୁହନ୍ତି ଯେ, ଭାରତର ଆର୍ଥିକ ସୁଧାରକୁ ଆହୁରି ଦ୍ରୁତ କରାଯିବା ଉଚିତ । ସେ ଏହା ଜୋର ଦେଇଛନ୍ତି ଯେ, ଆର୍ଥିକ ବିକାଶର ଲାଭ ସମସ୍ତ ନାଗରିକଙ୍କୁ ମିଳିବା ଦରକାର । ଏହା କେବଳ ଅଭିବୃଦ୍ଧିଶୀଳ ମଧ୍ୟମ ବର୍ଗଙ୍କ ମଧ୍ୟରେ ସୀମିତ ରହିବା ଉଚିତ ନୁହେଁ ।
ସ୍ମାଦଜା କହିଛନ୍ତି ଯେ, ଭାରତ ବିଶ୍ୱ ପ୍ରଯୁକ୍ତି ଦୌଡ଼ରେ ଏକ ମହତ୍ୱପୂର୍ଣ୍ଣ ମୋଡ଼ରେ ଛିଡ଼ାହୋଇଛି । ଭାରତ ପାଖରେ ବିଗ୍ ଡାଟାର ଫାଇଦା ରହିଛି । ଦେଶରେ ଇଣ୍ଟର୍ନେଟ୍ ଏବଂ ମୋବାଇଲ ଫୋନ୍ର ବହୁଳ ବ୍ୟବହାର ହୋଇଥାଏ । ଏଥିପାଇଁ ଏଠାରେ ଡାଟା ଦ୍ରୁତ ବେଗରେ ବଢୁଛି । ଏହି ଡାଟା ଆମ ଜୀବନର ଅନେକ ଦିଗ ଉପରେ ପ୍ରଭାବ ପକାଇଥାଏ । ସେ ଚେତାବନୀ ଦେଇଛନ୍ତି ଯେ, ଭାରତକୁ ଡାଟା ସୁରକ୍ଷା ପ୍ରତି ଅଧିକ ଯତ୍ନବାନ ହେବାକୁ ପଡ଼ିବ । ଆମେରିକୀୟ ଟେକ୍ନୋଲୋଜି କମ୍ପାନିଗୁଡ଼ିକ ଭାରତର ଡାଟା ପର୍ଯ୍ୟନ୍ତ ପହଞ୍ଚିବାକୁ ଚାହାନ୍ତି । କାରଣ ଚୀନ୍ ଏହାର ଡାଟାର ବ୍ୟବହାର ଉପରେ ରୋକ୍ ଲଗାଇ ଦେଇଛି । ୟୁରୋପ ବି ନିୟମକୁ ଶକ୍ତ କରୁଛି । ସ୍ମାଦ୍ଜା କହିଛନ୍ତି ଯେ, ଭାରତରେ ଆମକୁ ସୁନିଶ୍ଚିତ କରିବାକୁ ହେବ ଯେ, ଆମେ ଏହି ବଡ଼ ରଣନୀତିକ ସମ୍ପତ୍ତିକୁ ଯେପରି ସୁରକ୍ଷା ଦେଇପାରିବୁ ।
ଏହି ଡାଟା ଆର୍ଟିଫିସିଆଲ ଇଣ୍ଟେଲିଜେନ୍ସ ଏବଂ ଡିପ୍ ଟେକ୍ ଭଳି ପ୍ରଯୁକ୍ତିଗତ ବିକାଶ ପାଇଁ ଅତ୍ୟନ୍ତ ଜରୁରୀ । ଏହାର ବ୍ୟବହାର ସମସ୍ତଙ୍କ ଫାଇଦା ପାଇଁ କରାଯିବା ଉଚିତ । ବିଶେଷକରି ଗ୍ରାମାଞ୍ଚଳରେ । ସ୍ମାଦଜା ଭାରତର ଷ୍ଟାର୍ଟଅପ୍ ଇକୋସିଷ୍ଟମ୍ର ପ୍ରଶଂସା କରିଛନ୍ତି । ସେ କହିଲେ ଯେ, ନବସୃଜନକୁ ପ୍ରୋତ୍ସାହନ ଦେବା ପାଇଁ ଆହୁରି ଉତ୍ତମ ନୀତି ପ୍ରସ୍ତୁତ କରାଯିବା ଉଚିତ । ସେ କହିଲେ ଯେ, ଭାରତୀୟ କମ୍ପାନିଗୁଡ଼ିକ ପ୍ରଯୁକ୍ତିକୁ କିଣିବା ପାଇଁ ଅଧିକ ଧ୍ୟାନ ଦେଉଛନ୍ତି, ଏହାକୁ ବିକଶିତ କରିବା ପାଇଁ ନୁହେଁ ।
ସ୍ମାଦଜାଙ୍କ ଅନୁସାରେ, ଭାରତୀୟ କମ୍ପାନିଗୁଡ଼ିକ ଗବେଷଣା ଏବଂ ବିକାଶ ଉପରେ ଅଧିକ ଧ୍ୟାନ ଦେବା ଉଚିତ । ଭାରତରେ ଯୁବ ଗୋଷ୍ଠୀଙ୍କ ସଂଖ୍ୟା ଅଧିକ । ଏହା ଏକ ବଡ଼ ଫାଇଦା । କିନ୍ତୁ ଲୋକଙ୍କୁ କୌଶଳ ଶିଖାଇବା ଏବଂ ସେମାନଙ୍କୁ ଅଧିକ ପ୍ରଶିକ୍ଷୀତ କରିବା ଉଚିତ । ଭାରତକୁ ୨୦୩୦ ସୁଦ୍ଧା ୭ ଟ୍ରିଲିୟନ ଡଲାର ଅର୍ଥବ୍ୟବସ୍ଥା ହେବାକୁ ପଡ଼ିବ । ଏଥିପାଇଁ ଏହାକୁ ନିଜର ଔଦ୍ୟୋଗିକ ଆଧାରକୁ ବଢ଼ାଇବାକୁ ପଡ଼ିବ । କାରଣ ଜିଡିପିରେ ବିନିର୍ମାଣର ଅଂଶ ଚୀନ୍ ତୁଳନାରେ ଖୁବ୍ କମ୍ ରହିଛି ।
ସ୍ମାଦଜା କହିଲେ ଯେ, ଗ୍ରାମାଞ୍ଚଳରେ ଉତ୍ପାଦକତା ବଢ଼ାଇବା ଅତି ଜରୁରୀ । ଏହାଦ୍ୱାରା କେବଳ ଦେଶର ଆର୍ଥିକ ସ୍ଥିତି ଉନ୍ନତ ହେବ ନାହିଁ, ବରଂ ଗ୍ରାମୀଣ ଲୋକଙ୍କ କ୍ରୟ କ୍ଷମତା ବଢ଼ିବ । ଲୋକ ଖର୍ଚ୍ଚ କଲେ ଅଭିବୃଦ୍ଧି ଦୌଡ଼ିବ
