ଭୁବନେଶ୍ୱର,୨୫/୧୧: ସହିଦନଗର ଭବାନୀ ମଲ୍ ସାମ୍ନା । ସମୟ ରାତି ସାଢ଼େ ୮ଟା । ରାସ୍ତାକଡ଼ରେ ଏକ କଳାରଙ୍ଗର କାର ଛିଡ଼ା ହୋଇଥିଲା । କାରଟି ଦୀର୍ଘ ସମୟ ଧରି ଷ୍ଟାର୍ଟ ଅବସ୍ଥାରେ ଥିଲା । ଏସି ବି ଚାଲୁଥିଲା । ଅନ୍ୟ ଏକ ଦାମୀ କାର ପଛରେ ଲାଗିଲା । କାରରୁ ୨ଜଣ ଯୁବକ ଓହ୍ଲାଇଲେ । ବେଶଭୂଷାରୁ ସମ୍ଭ୍ରାନ୍ତ ଶ୍ରେଣୀୟ ଲାଗୁଥିଲେ । ଉଭୟେ କାର ଆଡ଼କୁ ମାଡି ଚାଲିଲେ ।
କଳା କାର ଭିତରୁ ଜଣେ ଯୁବକ ବାହାରି କିଛି ପାଦ ଆଗକୁ ଚାଲିଗଲା । ୨ ଯୁବକ କାର ଭିତରେ ପଶିଲେ । ୫ରୁ ୧୦ ମିନିଟ୍ ବିତିଛି କି ନାହିଁ । ୨ ଯୁବକଙ୍କ ସହ ଅନ୍ୟ ଜଣେ ସୁନ୍ଦରୀ ଯୁବତୀ କାରରୁ ବାହାରିଲେ । ଯୁବତୀଜଣକ ମିନି ସ୍କଟ୍ ସାଙ୍ଗକୁ ଟପ୍ ପିନ୍ଧିଥିଲେ । ସେ ଚୁପ୍ଚାପ୍ ଚାଲିକି ଯାଇ ପଛ କାରରେ ବସିଲେ । ୨ ଯୁବକ ଆଖି ପିଛୁଳାକେ ଯୁବତୀଙ୍କୁ ସାଙ୍ଗରେ ଧରି ଘଟଣାସ୍ଥଳରୁ ଅର୍ନ୍ତଧ୍ୟାନ ହୋଇଗଲେ । ବାହାରେ ଅପେକ୍ଷା କରିଥିବା ଯୁବକ ପୁଣି କଳା କାରରେ ବସି ରହିଲା । ସମାନ ଜାଗାରେ ଅଧ ଘଣ୍ଟା ପରେ ପୁଣି ଏକ କାର ଲାଗିଲା । ତା’ର ଘଣ୍ଟାଏ ପରେ ଆଉ ଏକ କାର । ସମାନ ଢ଼ଙ୍ଗରେ କଳା କାରରୁ ଅନ୍ୟ ୨ ଯୁବତୀ ବାହାରିଲେ । ୨ଟି କାରରେ ବସି ଅନ୍ୟତ୍ର ଚାଲିଗଲେ ।
ରାଜଧାନୀରେ ଏଭଳି କିଛି ଢ଼ଙ୍ଗରେ ଚାଲିଛି ଏସ୍କର୍ଟ ସର୍ଭିସ୍ରେ ଦେହ ବେପାର । ଖାଲି ଭବାନୀ ମଲ୍ ନୁହେଁ, ମାକେର୍ଟ ବିଲ୍ଡିଂର ବିଏମ୍ସିର କେଶରୀ ମଲ୍, ମାଷ୍ଟରକ୍ୟାଣ୍ଟିନ ଛକ, ରାମମନ୍ଦିର ସାମ୍ନା ନ୍ୟୁ ମାରିଅନ୍ ହୋଟେଲ, ଫୋରମ ମାର୍ଟ ଭଳି ଜନଗହଳି ପୂର୍ଣ୍ଣ ଜାଗା ପାଲଟିଛି ଦେହ ଦଲାଲଙ୍କ ଡେଲିଭରି ପଏଣ୍ଟ । ସେମାନେ ଗୋଟିଏ କାର୍ରେ ୩ଜଣ ଦେହଜୀବୀଙ୍କୁ ଧରି ଡେଲିଭରି ପଏଣ୍ଟରେ ସନ୍ଧ୍ୟାରୁ ଡେରା ପକାଉଛନ୍ତି । କେହି ଗ୍ରାହକ ଫୋନ୍ କଲେ, ତାଙ୍କୁ ଉକ୍ତ ଜାଗାରେ ପହଞ୍ଚିବାକୁ କୁହାଯାଉଛି । କାର ଭିତରେ ହିଁ ଦେହଜୀବୀ ପସନ୍ଦ କରିବା ସହ ମୂଲଚାଲ ସରିଯାଉଛି । ଗ୍ରାହକମାନେ ପସନ୍ଦ ଅନୁସାରେ ଦେହଜୀବୀଙ୍କୁ ନେଇ ଯାଉଛନ୍ତି ।
ଜଣେ ଦେହ ଦଲାଲ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ହୋଟେଲକୁ ଲିଜ୍ରେ ନେଇ ଦେହ ବେପାର କରୁଥିବା ବେଳେ ପୁଲିସ ଚଢ଼ଉ ଭୟ ରହୁଥିଲା । କିନ୍ତୁ ଏବେ ଏସକର୍ଟ ସର୍ଭିସରେ ବିନା ଟେନସନରେ ବେପାର ଚାଲୁଛି । କୌଣସି ନିଛାଟିଆ ଜାଗାରେ କାର ପାର୍କିଂ କଲେ, ପାଟ୍ରୋଲିଂ ଭ୍ୟାନ୍ ଅଟକାଇ ଜେରା କରିବା ଭୟ ରହୁଛି । ତେଣୁ ପୁଲିସର ସନ୍ଦେହ ନ ଉପୁଜିବା ପାଇଁ ଜନଗହଳିପୂର୍ଣ୍ଣ ଜାଗାକୁ ଡେଲିଭରି ପଏଣ୍ଟ କରିବାକୁ ବାଧ୍ୟ ହେଉଛୁ । ସେଠାରୁ ଦେହଜୀବୀମାନଙ୍କୁ ଗରାଖଙ୍କୁ ଧରାଇ ଦେବା ପରେ ଆମେ ଟେନସନ ମୁକ୍ତ । ଯାହା ପାଖରେ ହୋଟେଲ ସୁବିଧା ନାହିଁ । ସେମାନଙ୍କୁ ଆମ ସେଟିଂ ଥିବା କିଛି ଓୟୋ ହୋଟେଲକୁ ପଠାଉଛୁ ।
ଡିମାଣ୍ଡରେ ବାଂଲାଦେଶୀ ଦେହଜୀବୀ
ଭୁବନେଶ୍ୱରରେ ବାଂଲା ସୁନ୍ଦରୀ ଛାଇଗଲେଣି । ଦେହଜୀବୀ ମହଲରେ ଏମାନଙ୍କ ସଂଖ୍ୟା ବଢ଼ିବାରେ ଲାଗିଛି । ଗରାଖଙ୍କ ପ୍ରଥମ ପସନ୍ଦ ପାଲଟିଛନ୍ତି । କିଏ ଚାକିରି ଲୋଭ ତ ଆଉ କିଏ ଦଲାଲଙ୍କ ଜାଲରେ ପଡ଼ି ଲୁଚାଛପାରେ ସୀମା ଡେଇଁ କୋଲକାତାରେ ପହଞ୍ଚୁଛନ୍ତି । ସେଠାରୁ ଦଲାଲଙ୍କ ଜରିଆରେ ଭୁବନେଶ୍ୱରରେ ପହଞ୍ଚିବା ପରେ ପାଲଟି ଯାଉଛନ୍ତି ବୃତ୍ତିଗତ ଦେହଜୀବୀ । ରାଜମହଲ, ପଟିଆ, ଘାଟିକିଆ, କଳିଙ୍ଗନଗରର କିଛି ଆପାର୍ଟମେଣ୍ଟ ଓ ଡୁପ୍ଲେକ୍ସରେ ଏମାନଙ୍କୁ ମାସ ମାସ ଧରି ରଖାଯାଉଛି । ଦଲାଲଙ୍କ ଜରିଆରେ ବହୁ ବାଂଲା ଦେହଜୀବୀଙ୍କ ଫଟୋ ଏବେ ସୋସିଆଲ ମିଡିଆରେ ଘୂରି ବୁଲୁଛି । ସମ୍ପୃକ୍ତ ଦେହ ଦଲାଲଙ୍କ ସୂଚନା ମୁତାବକ, ଏବେ ବାଂଲାଦେଶୀ ଦେହଜୀବୀଙ୍କ ଡିମାଣ୍ଡ ଅଧିକ । କାହିଁକି ନାଁ ଏମାନେ କମ୍ ଟଙ୍କାରେ ଦେହ ବିକିବାକୁ ରାଜି ହେଉଛନ୍ତି । ରାତିକ ପାଇଁ ୩ରୁ ୫ ହଜାର ଟଙ୍କାରେ ବାଂଲା ସୁନ୍ଦରୀ ଯାଉଛନ୍ତି ।
ଠିକଣା ଖୋଜିବାକୁ ଡିସିପିଙ୍କ ନିର୍ଦ୍ଦେଶ
ଡିସିପି ପିନାକ ମିଶ୍ର କହିଛନ୍ତି, ଭୁବନେଶ୍ୱରରେ ତୀକ୍ଷ୍ମ ନଜର ରଖିଛୁ । ଏ ବାବଦରେ କୌଣସି ଖବର କିମ୍ବା ଅଭିଯୋଗ ହସ୍ତଗତ ହେଲେ, ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବୁ । ଗୁଇନ୍ଦା ଶାଖାକୁ ଆଲର୍ଟ କରାଇଛୁ । ବାଂଲାଦେଶୀ ଦେହଜୀବୀଙ୍କ ରହଣିସ୍ଥଳ ଓ ଡେଲିଭରି ପଏଣ୍ଟ ଖୋଜାଚାଲିଛି । ହୋଟେଲ ଓ ଲଜ୍ଗୁଡି଼କୁ ମଧ୍ୟ ରିତିମତ ଯାଞ୍ଚ ହେଉଛି ।
