ଢେଙ୍କାନାଳ,୦୫/୦୭: ଥମୁନି ହାତୀ ଉପଦ୍ରବ। ଶୌଚ ହେବାକୁ ପୋଖରୀକୁ ଯାଇଥିବା ବେଳେ ବୃଦ୍ଧଙ୍କୁ ଟେକି କଚାଡିଲା ଦନ୍ତା । ଫଳରେ ବୃଦ୍ଧଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି।ତେବେ ଢେଙ୍କାନାଳ ବନଖଣ୍ଡ ସଦର ବନାଞ୍ଚଳ ଭାପୁର ଫରେଷ୍ଟ ସେକ୍ସନ ଅଧୀନ କାଲିକାପ୍ରସାଦ ଗ୍ରାମ ଦଲକସାହିରୁ ସାମ୍ନାକୁ ଆସିଛି ଏଭଳି ଘଟଣା ।
ସୂଚନା ମୁତାବକ, କାଲିକାପ୍ରସାଦ ଗ୍ରାମ ଦଲକସାହିର ୬୦ ବର୍ଷୀୟ ଉଦ୍ଧବ ଦେହୁରୀ ଶନିବାର ସକାଳେ ଗ୍ରାମ ଦଲକ ପୋଖରୀକୁ ଶୌଚ ହେବା ପାଇଁ ଯାଇଥିଲେ। ଏହି ସମୟରେ ଏକ ଦନ୍ତା ହାତୀ ତାଙ୍କ ନିକଟକୁ ଆସି ଆକ୍ରମଣ କରିଥିଲା । ଫଳରେ ଉଦ୍ଧବ ଗୁରୁତର ଆହତ ହୋଇଥିଲେ।ଏନେଇ ସ୍ଥାନୀୟ ଲୋକେ ଏହା ଜାଣିପାରି ପୁଲିସ ଓ ବନ ବିଭାଗକୁ ଖବର ଦେଇଥିଲେ। ଭାପୁର ଫରେଷ୍ଟର ଓ ଫାଣ୍ଡି ପୁଲିସ କର୍ମଚାରୀଙ୍କ ଦ୍ଵାରା ଉଦ୍ଧାର କରାଯାଇ ଉଦ୍ଧବଙ୍କୁ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ସେଠାରେ ତାଙ୍କର ଚିକିତ୍ସା ଜାରି ରହିଛି। ଦନ୍ତା ହାତୀ ଚଳପ୍ରଚଳକୁ ନେଇ ଗ୍ରାମରେ ଭୟଭୀତ ବାତାବରଣ ସୃଷ୍ଟି ହୋଇଛି।
