ନୂଆଦିଲ୍ଲୀ,୩୦/୦୮: ଆମେରିକା ରାଜନୀତି ଓ ଅର୍ଥବ୍ୟବସ୍ଥାରେ ହଲଚଲ ଦେଖିବାକୁ ମିଳିଛି । ବିଭିନ୍ନ ଦେଶ ଉପରେ ବିଶେଷ କରି ଭାରତ ଉପରେ ୫୦% ଟାରିଫ୍ ଲଗାଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଏହାକୁ ନେଇ ବଡ଼ ନିଷ୍ପତ୍ତି ଶୁଣାଇଛନ୍ତି ଆମେରିକା କୋର୍ଟ । ଅଧିକାଂଶ ଟାରିଫ୍କୁ ବେଆଇନ କହିବା ସହ ଏହାକୁ ଲାଗୁ କରିବାକୁ ଅଧିକାର ନାହିଁ ବୋଲି କହିଛନ୍ତି କୋର୍ଟ । ଶୁଳ୍କକୁ ନେଇ ସାରା ବିଶ୍ୱରେ ହଇଚଇ ସୃଷ୍ଟି ହୋଇଥିବା ବେଳେ ଅପିଲ୍ସ କୋର୍ଟଙ୍କ ଏହି ନିଷ୍ପତ୍ତି ଟ୍ରମ୍ପଙ୍କୁ ଏକ ବଡ଼ ଝଟକା ଦେଇଛି ।
'ଶୁଳ୍କ ବେଆଇନ' -ଟ୍ରମ୍ପଙ୍କ ଟାରିଫ୍କୁ ନେଇ ଆମେରିକା ଅପିଲ୍ସ କୋର୍ଟ କହିଛନ୍ତି, '' ବିଭିନ୍ନ ଦେଶ ଉପରେ ଲାଗୁ ହୋଇଥିବା ଟ୍ରମ୍ପଙ୍କ ଅଧିକାଂଶ ଟାରିଫ୍ ବେଆଇନ । ଏହାକୁ ଲାଗୁ କରିବାର ଅଧିକାର ନାହିଁ । ଟାରିଫ୍ ଲଗାଇବାର କ୍ଷମତା ରାଷ୍ଟ୍ରପତିଙ୍କର ନାହିଁ । କ୍ଷମତାର ଦୂରୁପଯୋଗ କରାଯାଇଛି । ଇଚ୍ଛା ଅନୁଯାୟୀ ବିଭିନ୍ନ ଦେଶ ଉପରେ ଶୁଳ୍କ ଲଗାଇବାର କୌଣସି ଆଇନଗତ ଅଧିକାର ନାହିଁ । ଆମେରିକାର ଅର୍ଥନୀତିକୁ ଧ୍ୟାନରେ ରଖି, ଟ୍ରମ୍ପ ନିଷ୍ପତ୍ତିକୁ ତୁରନ୍ତ ବନ୍ଦ କରାଯାଇ ନାହିଁ । '' ଅକ୍ଟୋବର ୧୪ ଯାଏଁ ଟାରିଫ୍ ଜାରି ରଖିବାକୁ ସମୟ ଦେଇଛନ୍ତି କୋର୍ଟ ।
କ'ଣ କହିଲେ ଟ୍ରମ୍ପ ? ଟାରିଫ୍କୁ କୋର୍ଟ ବେଆଇନ କହିବା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କୋର୍ଟର ନିଷ୍ପତ୍ତି ଉପରେ ଅସନ୍ତୋଷ ପ୍ରକାଶ କରିଛନ୍ତି । କୋର୍ଟଙ୍କ ନିଷ୍ପତି ପରେ ବି ନଇଁବାକୁ ରାଜି ନାହାନ୍ତି ଟ୍ରମ୍ପ । କୋର୍ଟଙ୍କ ନିଷ୍ପତ୍ତିକୁ ପକ୍ଷପାତପୂର୍ଣ୍ଣ କହି ସମାଲୋଚନା କରିଛନ୍ତି । ସେ କହିଛନ୍ତି ଯେ, ''ଟାରିଫ୍ ଦେଶର ହିତ ପାଇଁ କରାଯାଇଛି । ଯଦି କୋର୍ଟଙ୍କ ଏହି ନିଷ୍ପତ୍ତିକୁ କାର୍ଯ୍ୟକାରୀ କରିବାକୁ ଅନୁମତି ଦିଆଯାଏ, ତେବେ ଏପରି ଫଇସଲା ଆମେରିକାକୁ ବର୍ବାଦ କରିଦେବ । ଆମେ ସୁପ୍ରିମକୋର୍ଟ ଯିବୁ । ଆଗକୁ ବି ଟାରିଫ୍ ଜାରି ରଖିବୁ । '' ଏ ବାବଦରେ ହ୍ୱାଇଟ୍ ହାଉସର ମୁଖପାତ୍ର କୁଶ ଦେଶାଇ କହିଛନ୍ତି, ଟ୍ରମ୍ପ ଆଇନ ଅନୁଯାୟୀ କାର୍ଯ୍ୟ କରିଛନ୍ତି ଏବଂ ସର୍ବଶେଷରେ ଆମେ ଏହି ମାମଲା ଜିତିବୁ । ଅର୍ଥାତ୍, ଟ୍ରମ୍ପ ପ୍ରଶାସନ ଏବେ ନିଷ୍ପତ୍ତିକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିବାକୁ ଯାଉଛି ।
କ୍ଷତି ରୋକିବା ପାଇଁ ଏକ ନିଷ୍ପତ୍ତି- ଆମେରିକୀୟ ଆଇନ ବିଶେଷଜ୍ଞମାନେ ବିଶ୍ୱାସ କରନ୍ତି ଯେ, ଏହି ନିଷ୍ପତ୍ତି କ୍ଷତିକୁ ରୋକିପାରିବ, ଟ୍ରମ୍ପଙ୍କ ଦ୍ୱାରା ଲାଗୁ କରାଯାଇଥିବା ଶୁଳ୍କର ପ୍ରଭାବ କ’ଣ ହେବ ତାହା ବର୍ତ୍ତମାନ ସ୍ପଷ୍ଟ ନୁହେଁ । ତଥାପି, କୋର୍ଟ ଆମେରିକୀୟ ବାଣିଜ୍ୟର ସ୍ୱାର୍ଥକୁ ଦୃଷ୍ଟିରେ ରଖି ଏହି ନିଷ୍ପତ୍ତି ଦେଇଛନ୍ତି । ଏବେ ଯଦି ଏହି ନିଷ୍ପତ୍ତି ସୁପ୍ରିମକୋର୍ଟରେ ଅକ୍ଷୁର୍ଣ୍ଣ ରହେ, ତେବେ ଏହା ଟ୍ରମ୍ପ ସରକାରଙ୍କ ପାଇଁ ଏକ ବଡ଼ ଚେତାବନୀ ପରି ହେବ, ଯେଉଁଥିରେ ଏହା ସ୍ପଷ୍ଟ ହୋଇଯିବ ଯେ ଟ୍ରମ୍ପ ନିଜେ କିଛି କରିପାରିବେ ନାହିଁ ।
