ନୂଆଦିଲ୍ଲୀ ୩୦/୮ : ଟେକ୍ନୋଲୋଜି ଯୁଗରେ ସବୁକିଛି ସ୍ମାର୍ଟଫୋନ୍ ଜରିଆରେ ହେଉଛି । ଛୋଟ ପିଲାଙ୍କଠୁ ବୃଦ୍ଧ ସମସ୍ତେ ସ୍ମାର୍ଟଫୋନ୍ ମାୟାରେ ପଡ଼ିଛନ୍ତି । ତେବେ ଆବଶ୍ୟକଠୁ ଅଧିକ ସ୍ମାର୍ଟଫୋନ୍ ବ୍ୟବହାର ସମସ୍ତଙ୍କ ପାଇଁ ଉଭୟ ମାନସିକ ଓ ଶାରୀରିକ ରୂପେ ବିପଦପୂର୍ଣ୍ଣ । ଏହାକୁ ଦୃଷ୍ଟିରେ ରଖି ଜାପାନର ଏକ ସହରରେ ମୋବାଇଲ ଫୋନ୍ ସ୍କ୍ରିନ୍ ଟାଇମ୍କୁ କମ୍ କରିବା ପାଇଁ ସରକାର ଆଇନ ପ୍ରଣୟନର ପ୍ରସ୍ତାବ ଦେଇଛନ୍ତି । ଆଇଚୀ ପ୍ରାନ୍ତର ନଗରପାଳିକା ଟୋୟୋଆକେ ବିଧାନସଭାରେ ସରକାର ଏହି ପ୍ରସ୍ତାବ ରଖିଛନ୍ତି । ଏଥିରେ କୁହାଯାଇଛି, ପରିବାରରେ ସମସ୍ତେ ପରସ୍ପର ସହ କଥା ହୋଇ ସ୍ଥିର କରନ୍ତୁ ଯେ ଘରର ବଡ଼ ଓ ପିଲାମାନେ ଇ-ଡଭାଇସ୍ରେ କେତେ ସମୟ ବିତାଇବେ ।
ପ୍ରାଥମିକ ସ୍କୁଲ ପିଲା ରାତି ୯ଟା ପର୍ଯ୍ୟନ୍ତ ଏବଂ ବଡ଼ ଲୋକ ଓ ପିଲା ରାତି ୧୦ଟା ପର୍ଯ୍ୟନ୍ତ ଡିଭାଇସ୍ ବ୍ୟବହାର କରନ୍ତୁ ବୋଲି ପ୍ରସ୍ତାବ ଦିଆଯାଇଛି । ମେୟର ମାସାଫୁମି କୋକି କହିଛନ୍ତି, ଏହି ପ୍ରୟାସର ଉଦ୍ଦେଶ୍ୟ ଅଧିକାରଗୁଡ଼ିକ ଉପରେ କଟକଣା ଲାଗୁ କିମ୍ବା ଦଣ୍ଡବିଧାନ ନୁହେଁ । ସ୍ୱାସ୍ଥ୍ୟ, ଶିକ୍ଷା ଓ ପାରିବାରିକ ଜୀବନ ଉପରେ ଅତ୍ୟଧିକ ସ୍କ୍ରିନ୍ ଟାଇମ୍ ଯୋଗୁ ହେଉଥିବା କ୍ଷତି ବିଷୟରେ ଲୋକଙ୍କୁ ଜଣାଇବା । ଆଶା କରୁଛି ଯେ ପ୍ରତ୍ୟେକ ପରିବାର ପାଇଁ ସ୍ମାର୍ଟଫୋନ୍ରେ ବିତାଉଥିବା ସମୟ ଓ ଦିନର କେଉଁ ସମୟରେ ଡିଭାଇସ୍ ବ୍ୟବହାର କରାଯିବ, ତାହା ଉପରେ ବିଚାର କରିବାର ଏହା ଏକ ଅବସର ହେବ । ଏହି ପ୍ରସ୍ତାବ ପରେ ବିତର୍କ ଆରମ୍ଭ ହୋଇଛି । ଗତ ୨୧ରୁ ୨୫ ତାରିଖ ମଧ୍ୟରେ ସହରକୁ ୧୨୦ରୁ ଅଧିକ କଲ୍ ଓ ଇମେଲ୍ ମିଳିଛି, ଯେଉଁଥିରେ ଅଧିକାଂଶ ଏହାକୁ ବିରୋଧ କରିଛନ୍ତି । ଅନ୍ୟପକ୍ଷେ, ସମର୍ଥକମାନେ ଏହାକୁ ସ୍ୱାଗତ କରି କହିଛନ୍ତି, ଏହା ଦ୍ୱାରା ସ୍ମାର୍ଟଫୋନ୍ ନିଶା କମିବ । ଯଦି ଏହି ବଧେୟକ ପାସ୍ ହୁଏ, ତେବେ ଜାପାନର ଏହି ସହରରେ ପ୍ରଥମ ଥର ପିଲାଙ୍କ ସମେତ ସମସ୍ତ ବାସିନ୍ଦାଙ୍କ ପାଇଁ ନିର୍ଦ୍ଦେଶ ଲାଗୁ ହେବ ।
