ନୂଆଦିଲ୍ଲୀ,୩୦।୮: ୟମନର ରାଜଧାନୀ ସନାରେ ଇସ୍ରାଏଲର ଏୟାରଷ୍ଟ୍ରାଇକ୍। ଆକ୍ରମଣରେ ହୁତି ନିୟନ୍ତ୍ରିତ ସରକାରର ପ୍ରଧାନନ୍ତ୍ରୀ ଅହମ୍ମଦ ଅଲ୍-ରହାଓ୍ବିଙ୍କ ମୃତ୍ୟୁ ହୋଇଥିବା ଜଣାପଡିଛି। ବିଦ୍ରୋହୀ ଶାସକ ଗୋଷ୍ଠୀ ହୁତି ପକ୍ଷରୁ ଶନିବାର ସୂଚନା ଦିଆଯାଇଛି। କୁହାଯାଇଛି ଯେ, ଗୁରୁବାର ହୋଇଥିବା ଆକ୍ରମଣରେ ଅନ୍ୟ ମନ୍ତ୍ରୀଙ୍କ ସହ ହୁତି ପ୍ରଧାନମନ୍ତ୍ରୀଙ୍କ ମୃତ୍ୟୁ ହୋଇଛି। ଏହି ଆକ୍ରମଣ ସେତେବେଳେ ହୋଇଥିଲା ଯେବେ ଅଧିକାରୀମାନେ ଗତ ଏକ ବର୍ଷରେ ସରକାରଙ୍କ ପ୍ରଦର୍ଶନର ସମୀକ୍ଷା ପାଇଁ ଏକ ଓ୍ବାର୍କସପ୍ରେ ଭାଗ ନେଇଥିଲେ।
ରିପୋର୍ଟ ଅନୁସାରେ, ଆକ୍ରମଣ ସମୟରେ ହୁତି ପ୍ରତିରକ୍ଷା ମନ୍ତ୍ରୀ ମହମ୍ମଦ ଅଲ୍ଲ ଅତି ଓ ସେନା ମୁଖ୍ୟ ମହମ୍ମଦ ଅବଦ ଅଲ୍ କରିମ ଅଲ ଘମାରି ମଧ୍ୟ ରହାଓ୍ବିଙ୍କ ସହ ଓ୍ବାର୍କସପ୍ରେ ଉପସ୍ଥିତ ଥିଲେ। ଏହି ଦୁହିଁଙ୍କର ମୃତ୍ୟୁ ହୋଇଥିବାର ମଧ୍ୟ ଆଶଙ୍କା କରାଯାଉଛି। ତେବେ ହୁତି ପକ୍ଷରୁ ଏପର୍ଯ୍ୟନ୍ତ ଦୁହିଁଙ୍କ ମୃତ୍ୟୁ ନେଇ କିଛି ସ୍ପଷ୍ଟ ହୋଇପାରିନି।
ଇରାନ ସମର୍ଥିତ ଗୋଷ୍ଠୀ ହୁତି ୨୮ ଅଗଷ୍ଟରେ ୟେମେନରୁ ଇସ୍ରାଏଲ ଉପରେ ମିସାଇଲ ଓ ଡ୍ରୋନ ଆକ୍ରମଣ କରିଥିଲା। ଏହାର ଜବାବରେ ଇସ୍ରାଏଲ ଏୟାରଫୋର୍ସ ହୁତି ନିୟନ୍ତ୍ରିତ ସନା ଉପରେ ବୋମାମାଡ଼ କରିଥିଲା ଓ ବିଦ୍ରୋହୀ ଗୋଷ୍ଠୀ ସେନା ଆଡ୍ଡା ଓ ରାଷ୍ଟ୍ରପତି ଭବନକୁ ଟାର୍ଗେଟ କରିଥିଲା। ରିପୋର୍ଟ ଅନୁସାରେ, ଇସ୍ରାଏଲର ଏୟାରଷ୍ଟ୍ରାଇକ୍ରେ ଅତି କମ୍ରେ ୧୦ ହୁତି କମାଣ୍ଡରଙ୍କ ମୃତ୍ୟୁ ହୋଇଛି। ସେଭଳି ୯୦ ରୁ ଅଧିକ ଆହତ ହୋଇଛନ୍ତି।
