ନୂଆଦିଲ୍ଲୀ,୨୯/୦୮: ୟୁରୋପର ଭୁଲ୍, ଭୋଗିବ ବିଶ୍ବ । ମନୁଷ୍ୟ ବର୍ବାଦିର କାରଣ ସାଜିବ ମହାଦେଶ । ଗଭୀର ସମୁଦ୍ରରେ ପଡ଼ିଛି ପରମାଣୁ ଆବର୍ଜନା । ଆଟଲାଣ୍ଟିକ୍ ଓସିଏନରେ ଛାଡ଼ୁଛି ବିକିରଣ । ଗୋଟିଏ କି ଦୁଇଟା ନୁହେଁ, ଆଟଲାଣ୍ଟିକ୍ ମହାସାଗରରେ ହଜାର ହଜାର ସଂଖ୍ୟାରେ ରେଡିଓ ଆକ୍ଟିଭ୍ ପଦାର୍ଥ ପଡ଼ି ରହିଛି । ଫ୍ରାନ୍ସ ଠାରୁ ଶତାଧିକ ମାଇଲ୍ ଦୂରରେ ପ୍ରାୟ ୧୩ ହଜାର ଫୁଟ୍ ଗଭୀର ସମୁଦ୍ରରେ ୩,୩୫୫ଟି ବିନାଶକାରୀ ପରମାଣୁ ବିକିରଣ ଛାଡ଼ୁଥିବା ବ୍ୟାରେଲ୍ ଚିହ୍ନଟ ହୋଇଛି । ଯାହାକୁ ୟୁରୋପ ଦେଶ ଗୁଡ଼ିକ ୧୯୪୭ରୁ ୧୯୯୧, କୋଲ୍ଡ ଓ୍ବାର ସମୟରେ ପକାଇଥିଲେ । ଏହି ବିନାଶକାରୀ ଆବର୍ଜନାଯୁକ୍ତ ବ୍ୟାରେଲ ସଂଖ୍ୟା ୨ଲକ୍ଷରୁ ଅଧିକ ହେବ । ସେତେବେଳେ ଏହା ଥିଲା ପୃଥିବୀ ପୃଷ୍ଠରୁ ରେଡିଓ ଆକ୍ଟିଭ୍ ରେଡିୟସନ୍ ଠାରୁ ଲୋକଙ୍କୁ ସୁରକ୍ଷିତ ରଖିବାର ସର୍ବୋତ୍ତମ ଉପାୟ । ଏହାର ପରିଚାଳନା ପାଇଁ ୩୪ଟି ଦେଶ ମିଶି ‘ନ୍ୟୁକ୍ଲିୟର ଏନର୍ଜି ଏଜେନ୍ସି’ ଗଠନ କରିଥିଲେ । ଏହି ସଂଗଠନ ଏହା ଉପରେ ନୀରିକ୍ଷଣ ମଧ୍ୟ କରିଥିଲା । ହେଲେ ବର୍ତ୍ତମାନ ସମୟରେ ଜୀବଜଗତ ପାଇଁ ଏହି ଆବର୍ଜନା ବଡ଼ ବିପଦ ସାଜିଛି ।
ମଣିଷ ପାଇଁ ମାଡ଼ି ଆସୁଛି ମହାବିପଦ । ୟୁରୋପ ପାଇଁ ଲୋପ ପାଇଯିବ ଜୀବଜଗତ । କାରଣ ଆଟଲାଣ୍ଟିକ୍ ମହାସାଗରରେ ପଡ଼ିରହିଥିବା ପରମାଣୁ ଆବର୍ଜନା କ୍ରମାଗତ ଭାବେ ବିକିରଣ ଛାଡ଼ୁଛି । ଏହି ରେଡିଓ ଆକ୍ଟିଭ୍ ପଦାର୍ଥ ଖାଦ୍ୟ ଶୃଙ୍ଖଳା ମାଧ୍ୟମରେ ମନୁଷ୍ୟ ଶରୀରରେ ପ୍ରବେଶ କରିବ ଏବଂ ଲୋକଙ୍କ ପାଇଁ କାଳ ସାଜିବ । ସମୁଦ୍ର ବିଜ୍ଞାନୀ ମତ ରଖିଛନ୍ତି, ପରମାଣୁ ଆବର୍ଜନା ପ୍ରଥମେ ସମୁଦ୍ରଜୀବୀମାନଙ୍କ ଦ୍ବାରା ଶୋଷିତ ହେବ । ପରେ ଏହି ପ୍ରଦୂଷିତ ସି-ଫୁଡ୍କୁ ମଣିଷ ଆହାର କଲେ ତାହା ମାନବ ଶରୀର ଭିତରକୁ ପ୍ରବେଶ କରିବାର ବହୁତ ସମ୍ଭାବନା ରହିଛି । ଏହାଦ୍ବାରା ମନୁଷ୍ୟ ଠାରେ ଦୀର୍ଘ କାଳୀନ ସ୍ବାସ୍ଥ୍ୟ ସମସ୍ୟା ଦେଖାଦେବା ସହ ପରମାଣୁ ବିକିରଣ କୋଷିକା କ୍ଷତି ପହଞ୍ଚାଇବ ଏବଂ କ୍ୟାନସର ଭଳି ଦୂରାରୋଗର ଆଶଙ୍କା ବଢ଼ାଇବ ବୋଲି ବୈଜ୍ଞାନିକମାନେ ଗବେଷଣା କରି ସତର୍କ କରାଇଛନ୍ତି ।
ଅନ୍ୟପଟେ ପରୁମାଣୁ ଆବର୍ଜନାକୁ ଯେଉଁ ବ୍ୟାରେଲରେ ଭର୍ତ୍ତି କରି ଆଟଲାଣ୍ଟିକ୍ ମହାସାଗରରେ ଫୋପଡ଼ା ଯାଇଛି, ତାହା ଚିରକାଳ ପାଇଁ ସୁରକ୍ଷିତ ରଖିପାରିବା ସମ୍ଭବ ନୁହେଁ । ଏହି ବ୍ୟାରେଲ୍ ଗୁଡ଼ିକର ଆୟୁଷ ମାତ୍ର ୨୦ରୁ ୨୬ ବର୍ଷ, ଯାହା ପୂର୍ବରୁ ଏକ୍ସପାଏରି ହୋଇଯାଇଛି । ଯାହାକୁ ନେଇ ଫ୍ରାନ୍ସିସ୍ ବୈଜ୍ଞାନିକମାନେ ଟେନସନରେ ରହିଛନ୍ତି । କାରଣ ଏହି ବିକିରଣ ପଦାର୍ଥ ମହାସାଗରର ସନ୍ତୁଳନୁ ବିଗାଡ଼ିବ । ଗବେଷଣା ବେଳେ କିଛି ଗୁରୁତ୍ବପୂର୍ଣ୍ଣ ଦିଗ ଉପରକୁ ବୈଜ୍ଞାନିକଙ୍କ ଧ୍ୟାନ ଯାଇଥିଲା । ପ୍ରଥମ ପର୍ଯ୍ୟାୟରେ ସୋନାର ଏବଂ ଏକ ସ୍ବଂୟ ଚାଳିତ ରୋବଟ୍ ବ୍ୟବହାର କରି ଆଟଲାଣ୍ଟିକ୍ ମହାସାଗର ଭିତରେ ଆବସାଲ୍ ସମତଳ ଅଞ୍ଚଳକୁ ମାପିଥିଲେ । ଆଉ ଜାଣିବାରୁ ପାଇଥିଲେ, ବିକିରଣଶୀଳ ପଦାର୍ଥ ଧୀରେ ଧୀରେ ନଷ୍ଟ ହେଉଛି । ଏହା ମାନବ ସମାଜ ପାଇଁ ଏତେ ବିପଦପୂର୍ଣ୍ଣ ନୁହେଁ । ହେଲେ ଏହି ପରମାଣୁ ଆବର୍ଜନା କିଛି ବର୍ଷ ପରେ ବିପଦ ସୃଷ୍ଟି କରିବ । କାରଣ ବ୍ୟାରେଲର ଥିବା ଟାଇଟାନିୟମ୍ ବହୁତ ଦୁର୍ବଳ । ମାତ୍ର ବାକି ଅଂଶ ବିଟା ଏବଂ ଗାମା ରଶ୍ମି ରହିଛି । ଏହା ସମୟ ସହିତ ନଷ୍ଟ ହୋଇଥାଏ । ହେଲେ ଦୁଇ ପ୍ରତିଶତ ଆଲଫା ରେଡିୟସନ ଜୀବଜଗତ ପାଇଁ ବିପଦ ସୃଷ୍ଟି କରିଥାଏ । ତେଣୁ ସମୟ ପୂର୍ବରୁ ଏହି ଗୁରୁତର ସମସ୍ୟା ସମାଧାନ କରବା ଉଚିତ୍ । ନହେଲେ ପରମାଣୁ ଆବର୍ଜନାର ବିକିରଣ ମହାସାଗରର ଇକୋ ସିଷ୍ଟମକୁ ନଷ୍ଟ କରିବା ସହିତ ମନୁଷ୍ୟର କ୍ଷତି ପହଞ୍ଚାଇବ, ଏଥିରେ ତିଳେ ମାତ୍ର ସନ୍ଦେହ ନାହିଁ...
