ନୂଆଦିଲ୍ଲୀ,୨୨/୦୩: ଆଜିର ସମୟରେ, କ୍ରେଡିଟ୍ ସ୍କୋର ଆର୍ଥିକ ସ୍ଥିରତା ପାଇଁ ଏକ ଗୁରୁତ୍ୱପୂର୍ଣ୍ଣ ମାନଦଣ୍ଡ ପାଲଟିଛି। ଲୋକମାନେ ଏହାକୁ ବଜାୟ ରଖିବା ବିଷୟରେ ସତର୍କ, କିନ୍ତୁ କେତେକ ସମୟରେ ସେମାନେ ଅଜାଣତରେ ଏପରି ନିଷ୍ପତ୍ତି ନିଅନ୍ତି ଯାହା ସେମାନଙ୍କ କ୍ରେଡିଟ୍ ସ୍କୋର ଉପରେ ନକାରାତ୍ମକ ପ୍ରଭାବ ପକାଇପାରେ। ଏଥିମଧ୍ୟରୁ ଗୋଟିଏ ହେଉଛି ପୁରୁଣା କ୍ରେଡିଟ୍ କାର୍ଡ କିମ୍ବା ଋଣ ଆକାଉଣ୍ଟ ବନ୍ଦ କରିବା। ଏହି ନିଷ୍ପତ୍ତି କେତେକ ସମୟରେ କ୍ଷତିକାରକ ପ୍ରମାଣିତ ହୋଇପାରେ, କାରଣ ଏହା ଆପଣଙ୍କ କ୍ରେଡିଟ୍ ହିଷ୍ଟ୍ରୀ ଏବଂ କ୍ରେଡିଟ୍ ସ୍କୋରକୁ ପ୍ରଭାବିତ କରେ। ପୁରୁଣା ଋଣ ଆକାଉଣ୍ଟ ବନ୍ଦ କରିବା ଦ୍ୱାରା କ’ଣ ପ୍ରଭାବ ପଡ଼ିପାରେ ତାହା ଆସନ୍ତୁ ବିସ୍ତୃତ ଭାବରେ ବୁଝିବା।
ସିଭିଲ୍ ଉପରେ ପ୍ରଭାବ:
କ୍ରେଡିଟ୍ ସ୍କୋର କାଲକୁଲେସନ୍ରେ କ୍ରେଡିଟ୍ ହିଷ୍ଟ୍ରୀ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ଯେତେବେଳେ ଆପଣ ଏକ ପୁରୁଣା କ୍ରେଡିଟ୍ କାର୍ଡ କିମ୍ବା ଋଣ ଆକାଉଣ୍ଟ ବନ୍ଦ କରୁଛେ, ଏହା ଧୀରେ ଧୀରେ ଆପଣଙ୍କ କ୍ରେଡିଟ୍ ରିପୋର୍ଟରୁ ହଟିଯାଏ। ଏହା ଆପଣଙ୍କର ସାମଗ୍ରିକ କ୍ରେଡିଟ୍ ହିଷ୍ଟ୍ରୀକୁ ହ୍ରାସ କରିପାରେ, ଯାହା ଫଳରେ ଆପଣଙ୍କର ସ୍କୋରରେ ହ୍ରାସ ଘଟିପାରେ। ଏକ ଦୀର୍ଘ ଏବଂ ଭଲ କ୍ରେଡିଟ୍ ହିଷ୍ଟ୍ରି ବଜାୟ ରଖିବା ଦ୍ବାରା ଭବିଷ୍ୟତରେ କୌଣସି ଋଣ କିମ୍ବା କ୍ରେଡିଟ୍ କାର୍ଡ ପାଇବାରେ ସାହାଯ୍ୟ କରିଥାଏ।
କ୍ରେଡିଟ୍ ୟୁଟିଲାଇଜେସନ୍ ରେସିଓ ଆପଣଙ୍କର ମୋଟ କ୍ରେଡିଟ୍ ସୀମା ଅନୁସାରେ ଆପଣ ବ୍ୟବହାର କରୁଥିବା କ୍ରେଡିଟ୍ ପରିମାଣକୁ ବୁଝାଏ। ବିଶେଷଜ୍ଞଙ୍କ ମତରେ, ଏହି ଅନୁପାତକୁ ୩୦% ତଳେ ରଖିବା ଭଲ। ଉଦାହରଣ ସ୍ୱରୂପ, ଯଦି ଆପଣଙ୍କର ମୋଟ କ୍ରେଡିଟ୍ ସୀମା ଏକ ଲକ୍ଷ ଟଙ୍କା ରହିଛି ଏବଂ ଆପଣ ୩୦ ହଜାର ଟଙ୍କା ପର୍ଯ୍ୟନ୍ତ ଖର୍ଚ୍ଚ କରିବା ଆବଶ୍ୟକ। ତେବେ ଆପଣଙ୍କର କ୍ରେଡିଟ ରେସିଓ ବା ଋଣ ଅନୁପାତ ସନ୍ତୁଳିତ ହୋଇ ରହିବ। କିନ୍ତୁ ଯଦି ଆପଣ ଏକ ପୁରୁଣା କ୍ରେଡିଟ୍ କାର୍ଡ ବନ୍ଦ କରୁଛନ୍ତି ଏବଂ ଆପଣଙ୍କର ମୋଟ ସୀମା ୫୦, ୦୦୦ ଟଙ୍କା ରହିଯାଏ, ତେବେ ଆପଣଙ୍କର ଏହି ରେସିଓ ବଢ଼ି ୬୦% ପର୍ଯ୍ୟନ୍ତ ବୃଦ୍ଧି ପାଇପାରେ, ଯାହା ଆପଣଙ୍କ କ୍ରେଡିଟ୍ ସ୍କୋରକୁ ନକାରାତ୍ମକ ଭାବରେ ପ୍ରଭାବିତ କରିବ।
ପୁରୁଣା କ୍ରେଡିଟ୍ ଆକାଉଣ୍ଟ ବନ୍ଦ କରିବା ଦ୍ୱାରା ପ୍ରାୟତଃ କ୍ରେଡିଟ୍ ସ୍କୋରରେ ଅସ୍ଥାୟୀ ହ୍ରାସ ଘଟିଥାଏ। ଯଦି ନୂତନ ଆକାଉଣ୍ଟଗୁଡ଼ିକ ସମ୍ପ୍ରତି ଖୋଲାଯାଇଛି, ତେବେ ଏହା ସୂଚାଇପାରେ ଯେ ବ୍ୟକ୍ତି ଆର୍ଥିକ ଭାବରେ ଅସ୍ଥିର, ଯାହା ଋଣଦାତାଙ୍କ ବିଶ୍ୱାସକୁ ହ୍ରାସ କରିପାରେ। ଯଦି କ୍ରେଡିଟ୍ କାର୍ଡ ବନ୍ଦ କରିବା ଆବଶ୍ୟକ ହୁଏ, ତେବେ ପ୍ରଥମେ ଏହାର ବ୍ୟବହାର ଏବଂ ଚାର୍ଜ ସମୀକ୍ଷା କରନ୍ତୁ। ନୂଆ କାର୍ଡ ପାଇବା ପରେ ହିଁ ପୁରୁଣା କାର୍ଡ ବନ୍ଦ କରନ୍ତୁ ଯାହା ଦ୍ଵାରା ଆପଣଙ୍କ କ୍ରେଡିଟ୍ ସ୍କୋର ଉପରେ କମ୍ ପ୍ରଭାବ ପଡ଼ିବ। ତେଣୁ, ପୁରୁଣା ଆକାଉଣ୍ଟଗୁଡ଼ିକୁ ବନ୍ଦ କରିବା ପୂର୍ବରୁ ଏହାର ପ୍ରଭାବ ବୁଝିବା ଗୁରୁତ୍ୱପୂର୍ଣ୍ଣ, ଯାହା ଦ୍ଵାରା ଆପଣଙ୍କର କ୍ରେଡିଟ୍ ସ୍କୋର ଦୃଢ଼ ରହିବ।
