ପୁରୀ,୦୪/୧୨: ରାଷ୍ଟ୍ରପତିଙ୍କ ଗସ୍ତ ପୂର୍ବରୁ ପୁରୀରେ ଘଟିଛି ବିଭତ୍ସ ହତ୍ୟା। ବିଶ୍ୱେଶ୍ୱରୀ ମନ୍ଦିର ସାମ୍ନା ଶ୍ରୀସେତୁ ତଳେ ଜଣେ ବ୍ୟକ୍ତିଙ୍କ ମୁଣ୍ଡରେ ପଥର ଛେଚି ହତ୍ୟା କରାଯାଇଛି । ଅନ୍ଧାର ରାତିରେ ଏହି ହତ୍ୟାକାଣ୍ଡ ଘଟିଥିବା ବେଳେ ମୃତକ ଖଣ୍ଡିଆ ବନ୍ଧର ସୁଦର୍ଶନ ସାହୁ (୪୫) ବୋଲି ଜଣାପଡ଼ିଛି ।

ସୂଚନା ମୁତାବକ, ମାର୍କେଟ ଛକରେ ସୁଦର୍ଶନ ସାହୁଙ୍କ ଏକ ଜଳଖିଆ ଦୋକାନ ରହିଛି । ମଙ୍ଗଳବାର ରାତି ସାଢ଼େ ୧୨ଟାରେ ସୁଦର୍ଶନ ଦୋକାନ ବନ୍ଦ କରିଥିଲେ। ୨ଜଣ ସାଙ୍ଗଙ୍କ ସହ ସେ ଶୌଚ ହେବା ପାଇଁ ଶ୍ରୀସେତୁ ତଳକୁ ଆସିଥିଲେ । ତେବେ ବୁଧବାର ଭୋର ସମୟରେ ରକ୍ତ ଜୁଡୁବୁଡୁ ଅବସ୍ଥାରେ ସୁଦର୍ଶନଙ୍କ ମୃତ ଦେହ ଶ୍ରୀସେତୁ ତଳେ ପଡିଥିବା ଦେଖିବାକୁ ପାଇଥିଲେ ସ୍ଥାନୀୟଲୋକେ । ଏହା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଟାଉନ ଥାନା ଆଇଆଇସି ସୁନୀଲ ପ୍ରଧାନ ଓ ସ୍ପେଶାଲ ସ୍କ୍ୱାର୍ଡ ପହଞ୍ଚି ଘଟଣାସ୍ଥଳରେ ଛାନଭିନ ଆରମ୍ଭ କରିଛନ୍ତି । କିଏ ସେହି ୨ଜଣ ସାଙ୍ଗ ତାଙ୍କ ପରିଚୟ ମିଳିନଥିବାବେଳେ, ସେମାନଙ୍କୁ ଖୋଜି ଘଟଣାର ତନ୍ତ କରୁଛି ପୋଲିସ।