କୋକସରା, ୨୮/୦୭: ଗୋଚର ଜମି ବିବାଦରୁ ମହିଳାମାନଙ୍କୁ ମାଡ଼ ହୋଇଥିବା ଅଭିଯୋଗ ହୋଇଛି । କଳାହାଣ୍ଡି ଜିଲ୍ଲା କୋକସରା ଥାନା ଅନ୍ତର୍ଗତ ବେହେରା ଗ୍ରାମ ପଞ୍ଚାୟତ ଅନ୍ତର୍ଗତ ଦଳସର୍ଗି ଗାଁରେ ଏଭଳି ଘଟଣା ଦେଖିବାକୁ ମିଳିଛି । ସରକାରୀ ଗୋଚର ଜମି ଜବରଦଖଲ ବିବାଦରୁ ଦଳିତ ମହିଳାମାନଙ୍କୁ ମାଡ଼ ହୋଇଥିବା ଅଭିଯୋଗ ହୋଇଛି ।
ସୂଚନାନୁସାରେ, ଆଜକୁ ଦୀର୍ଘବର୍ଷ ହେବ ଦଳସର୍ଗି ଗ୍ରାମର ଧନମତି ଭରତିଆ, ବୈକୁଣ୍ଠ ଭରତିଆ, ଜୟ ଭରତିଆ, ଲଳିତ ଭରତିଆଙ୍କ ପରିବାର ଦଳସର୍ଗୀ ନଦୀ କୂଳରେ ଥିବା ସରକାରୀ ଗୋଚର ଜମିରେ ରହିବା ସହ ଚାଷବାସ କରି ଆସୁଛନ୍ତି । ସେହି ସରକାରୀ ଜମି ରାସ୍ତା ଦେଇ ଦଲସର୍ଗି, କାଣ୍ଡପଡ଼ାର ଲୋକମାନେ ମଧ୍ୟ ଯାତାୟାତ କରିବା ସହ ଗାଈଗୋରୁ ନେବା ଆଣିବା କରିଥାନ୍ତି । ଗତ ୨୬ ତାରିଖରେ ଅଭିଯୋଗକାରୀଙ୍କ କରିଥିବା ଚାଷକୁ କାଣ୍ଡପଡ଼ାର ଲୋକମାନେ ଗାଈଗୋରୁ ଚରାଇ ନଷ୍ଟ କରି ଦେବାରୁ ଦଳିତ ପରିବାରର ମହିଳାମାନେ ଏହାର ପ୍ରତିବାଦ କରିଥିଲେ । ଏହାପରେ କାଣ୍ଡପଡ଼ାର ୩୦ରୁ ଉର୍ଦ୍ଧ୍ୱ ଲୋକ ଆସି ଘରେ କେହି ନଥିବା ସମୟରେ ଧନମତି ଓ ତାଙ୍କ ପରିବାରର ମହିଳାମାନଙ୍କୁ ଅଶ୍ଳୀଳ ଭାଷାରେ ଗାଳି ଗୁଲଜ କରିବା ସହ ମାଡ଼ ମାରିଥିବା ନେଇ କୋକସରା ଥାନାରେ ଅଭିଯୋଗ ହୋଇଛି । ଅଭିଯୋଗକୁ ଭିତ୍ତିକରି କୋକସରା ଥାନା ଅଧିକାରିଣୀ ସ୍ନିଗ୍ଧାରାଣୀ ସୁନା ଘଟଣାସ୍ଥଳରେ ପହଞ୍ଚି ତଦନ୍ତ କରି ୩୧ ଜଣଙ୍କ ନାଁରେ ମାମଲା ରୁଜୁ କରିଥିବା ଜଣାପଡ଼ିଛି ।
ଏହି ଘଟଣାରେ ଦୁଇ ଗୋଷ୍ଠୀ ମଧ୍ୟରେ ଉତ୍ତେଜନା ପ୍ରକାଶ ପାଇଥିବା ବେଳେ କାଣ୍ଡପଡ଼ାବାସୀଙ୍କ ପାଲଟା ଅଭିଯୋଗ ପରେ ଦଲସର୍ଗୀ ଗ୍ରାମକୁ ଧର୍ମଗଡ଼ ଉପଖଣ୍ଡ ଏସଡିପିଓ ଡୋଳାମଣି ଭୋଇ, ତହସିଲଦାର ପହଞ୍ଚି ଘଟଣାର ତଦନ୍ତ କରିଛନ୍ତି । ନଦୀକୁ ଯାଉଥିବା ରାସ୍ତାକୁ ବନ୍ଦ କରି ଦେବାରୁ କାଣ୍ଡପଡ଼ାର ଲୋକମାନେ ନାନା ସମସ୍ୟାର ସମ୍ମୁଖୀନ ହେଉଥିବାରୁ ପ୍ରତିବାଦ କରିଥିଲେ । ଧର୍ମଗଡ଼ ଏସଡିପିଓ ଜିଲ୍ଲାପାଳଙ୍କ ସହ ଆଲୋଚନା କରି ଉଭୟ ଗୋଷ୍ଠୀଙ୍କ ଉପସ୍ଥିତିରେ ଶାନ୍ତି କମିଟି ଗଠନ କରି ଉକ୍ତ ବିବାଦର ସମାଧାନ କରିବା ସହ ଦୋଷୀମାନଙ୍କ ବିରୁଦ୍ଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି ।
